1 Maa shia fuu lopom na, la, buuro tɛɛ mu paara u pan na mu lɛ wi. Paara nyanyjɛbɛɛlɛ pre pan na mu ŋmbilɛ lɛ, 2 mu paara chiɛlɛ pre pan na mu loolo lɛ, mu paara bichabɛɛlɛ pre pan na mu jaala lɛ, imi na ki fna. 3 Ta lekuchiɛlɛ mblɛ lɛ lekuchiɛlɛ titie pre kaan buuro. 4 Na lekuchlↄ waa wa na biile ni kre, ndee na nanae ni kre, pre fna mbe klu yire pe katoo mbe Nyiɛkpↄↄ sumiɛ kolo chiriri twan, mbra pini mbra pre titi sele leele kaan, na e pe ma kre, kena e e sefɛɛnlɛ na e lelɛɛlɛ fↄlↄ tↄ, a kre na Nyiɛkpↄↄ yiɛ shↄ. 5 Chlↄ ŋmba u pe lekuchlↄ kprafun, a u n wa ndro ni wra u le kre, wre u kaan Nyiɛkpↄↄ na, mbra Nyiɛkpↄↄ tali mbe u ya u na lafo na ble. 6 La, lekuchlↄ ŋmba u uyɛ wru mu taa wejiniŋge yirɛ kro kre, u le chↄ, nde u ku. 7 Sumifɛɛnlɛ pre nyina yire kee nyjɛ, mbe ndro wa pe kee ka ta mbe yo. 8 La, na wa n u katoo ndro, ndee wre titi sele ndro le kre kolo ŋga na kre, kena u shↄnlie kolo wa, u fun sisam wɛ ndro ŋmba u n shↄnli na. 9 Maa shia lekuchↄ ŋmba u n li yɛlɛ fuloetaarɛ kre tↄↄnri mbe chaa lekuchiɛlɛ nu. A ki fna mbe u pe blↄ nunu leŋgefun, 10 a u pe ndro ŋmba ndro kro u chin na u kepele nyu, mu pe chlↄ ŋmba u u biile pↄↄri chichie, mu fumblↄ yii mu chin, mu na Nyiɛkpↄↄ leele jeelee jee, mu na yaa kanyanafɛɛnlɛ na, mu ja na chichie ŋga mu chin ŋga kro pini. 11 La, maa shia lekuchiɛlɛ bichabɛɛlɛ tↄↄnri mbe ya lekuchiɛlɛ na, ŋgi na, na leŋgeere niŋge pe yii pe ja na laari Kristo kro, 12 na ndro pe ma, kena u u danyi jle nyjɛ u da pimi li. 13 Kre kro ni pe gbashia twan, mbe yiri mbra kila kalonyi nu. Ŋga ki n prↄ kuraa yi na pe leele kro yuu, na nyu leni leele kee nyjɛ nu pe n fna nu, kaalɛɛ nyjɛ yi n fna yo wee kro pe yi yuu. 14 Kena pre bichabɛɛlɛ pre, ni jawa na, na pe ndru mu leŋge, mu se, mu pre titi katooe le kre, ki nyu, mbe ki ti mbe o loŋgo wa o sisaa ka ta mbe yo. 15 Lekuchiɛlɛ plɛ laa mu sɛ taa Sutna kro. 16 Kena na chlↄ waa wa mu pe shↄnlifun, a lekuchiɛlɛɛ wa u sele nu kre, u gbeŋmba wra pe le, waa pe wru mbe wa sumifɛɛnlɛ pre na, na, pra pe le mbe ki ti sumifɛɛnlɛ pre kolo ta mbra lekuchiɛlɛ mblɛ pe n lefɛɛnlɛ ni pre le. 17 Sumifɛɛnlɛ pre loplombo mblɛ pe tnumu tuni imi na ki fna kre, e pe ŋga buuro kpↄↄ, mblɛ pe tnumu tuni kpↄↄ na kee kre kpali leele nyina ki yi kre. 18 Ŋgi na, Nyiɛkpↄↄ kee kre pe nyunↄ mu tɛɛ kre nyina mbo, "Na nuu nyaari bleju na, na yi tru, maa shia u nyu pↄ", a "tnumu tunfun fna na u fↄtↄↄrↄ ni." 19 Na ndro pan mu lopom wa kee sisaa ka yo, yaa shia ki shↄ mbe li, fↄna dansiɛfɛɛnlɛ shiin ndee taarɛɛ wa ki na. 20 Na wa sisaa pe kre, e u yiɛ kee yo u pan leele pre kro yiɛ na, mbe ki ti mbe hamblɛ pre fiɛ. 21 Ni yire Nyiɛkpↄↄ na Yesu Kristo, na nyjeeri bitumblↄ yiɛ, na yuu mu pan na mu li kee nyjɛ ni yo ŋga kro na. A maa shia fiɛlɛ mbe wa gbun na pimi ni, ndee mbe ndro yiɛ le mbe chiin kee ka pe. 22 A maa shia fiɛlɛ mbe kɛ taa ndro na, mbe u wↄ na u Nyiɛkpↄↄ tnumu ka tun. Maa shia muyɛ le wa sisam nu, muyɛ pe cheche. 23 Mu lɛɛyira, na ŋga mu yaa nyaanyaa kre ndra na, maa na nyumu chiin gboo, ta simi gboo fiɛn fiɛn. 24 Leele plɛɛ wa, pe sisamuu wa fimi na, mu yiɛklu pe pan na shie na pe ni Nyiɛkpↄↄ Kpra kuↄn nu, a plɛ sisam wa jaa nya fuŋgaami. 25 Pan chↄↄ kepele chichie nyaa chasi, a nyjɛ yii wa a yi n na nyaa chiriri kre, yaa jaa ndra.
