Timotio Hlɛ Jle 3

1Ki pe kpra kee a pra ki yuu na, na lewo chaa mbe pe sumifɛɛnlɛ yɛklo kre, kena u tnumu chichie wru. 2La, sumifɛɛnlɛ yɛklo fna mbe pe lewo ŋmba na kee ka n wa mbe lewo ta mbe yo, ki fna mbe u chↄ pe nunu, mbe u yiɛ to, mbe pe jawalafun, mbe pe lewo ŋmba u uyɛ nyjiri kee kro nu, mbe pe lewo ŋmba u fumblↄ yii mu chin, mbe pe lewo ŋmba we jaa leele nyina: 3U n fna mbe pe gbↄgbↄↄ, ndee mbe pe lewo ŋmba uu nyanya, la, ki fna mbe u nyjii, mbe wa pe kakↄtuŋu, mbe wa pe lewo ŋmba yiɛ ki nyinai swa na. 4U fna mbe pe lewo ŋmba u ja na wre titi sele le chichie, mbe jaa ti u biile u ŋga buuro, mbe ndie tɛɛ u pan. 5Na lewo wa jaa wre titi sele le chichie, mni we pe mbe jaa Nyiɛkpↄↄ sumifɛɛnlɛ pre le hin? 6U n fna mbe pe lewo ŋmba u chinɛ fↄŋgↄ, na kre ma, we uyɛ kpↄↄ mbe yire wa mbe to, imi na Sutna na to kre. 7U fna mbe pe lewo ŋmba fimifɛɛnlɛ kaan buuro, imi kie pe mbe nyifɛɛrɛ ka nyini wa u gbo, mbe waa sɛ to Sutna pɛlɛ nu. 8Sumifɛɛnlɛ pre loplombo pre fna mbe pe kepele nyu, mbe pe kpra ni, pe n fna mbe pe gbↄgbↄↄlↄ, pe n fna mbe pe yiɛ na nyinai swa na. 9pe ti mbe pe jawala saan pe na, mbe pe kpra kee ŋga kra ndra, a Nyiɛkpↄↄ ki wↄ mu pe nyina, a pe ki shↄ mu li kre yii kɛshiin. 10Pe kepele fna mbe le chichie, na pe kepele nyu kre, mbe pe chiin sumi. 11Pan chↄↄ pe chiɛlɛ fna mbe pe kepele nyu, pia na leele kro yuu, pe yiɛ fna mbe to, mbra kpra lii kee kro nu. 12Sumifɛɛnlɛ lopom fna mbe u chↄ pe nunu, a ki fna mbe u jaa na u chↄ na u biile le chiriri. 13Loplombo mblɛ pe sumi chiriri kre, pe mɛɛ chichie taa, mbe jaa gbun ta mbe pe shↄnlie ŋga pe ta Yesu Kristo nu kre kee yo. 14Ni shↄnli na kia mu, mbe pan e pan wa, la, ni chaa mbe e nyunↄ yire kee nyjɛ. 15La, na kia pan na ni mu naa, hlɛ ŋga ni nyunↄi ŋga we ti mbe e chin kepele ŋga ki fna mbe lewo pe Nyiɛkpↄↄ sele nu, pre lɛ Nyiɛkpↄↄ ŋmba u le wre sumifɛɛnlɛ, a pre na kpra kre yire. 16O sumiɛ ŋga kee Nyiɛkpↄↄ wↄ mu o nyina kre, ndro wa jaa yo na ki kee nsra shian. Nyiɛkpↄↄ na kaari lewo, a Kpra Ŋumu na tia o na u nya na u fraka, a nyjeeri bitumblↄ na u nya, a pra u kee kpali lawee lawee nu, a pra u shↄ mu li waŋgra ŋga nu, a wra sɛ nyjeeri.

will be added

X\