Timotio Hlɛ Jle 2

1Ŋga ki yiɛ klu yi na, e na nyiɛtali kpↄↄ e na leele kro kaan, e Nyiɛkpↄↄ tali mbe u pe fooro chin, e na Nyiɛkpↄↄ kaan mboo kee nyjɛ we pee pe ŋga yire ndra na. 2E na nyiɛtali e na ŋulo, na jaŋgafɛɛnlɛ kro kaan, mbe ki ti o jaa tni komm, na wejinyiŋge ni, mbe jaa Nyiɛkpↄↄ sumi kolo chiriri na. 3Kre kee ŋga nyu, mu tna o ŋmaashↄfun Nyiɛkpↄↄ wre pan. 4Wre u chaa mbe ndro kro ŋmaa ta, mbe paan kpra kre chin. 5Ŋgi na, Nyiɛkpↄↄ wree nunu, a Yesu Kristo wree wa, wre u lewo na Nyiɛkpↄↄ lalaa gbeele, 6wre wra u ŋmaa tɛɛ mu sra wↄ mu lewo ŋga, kre kee ŋga na pe dansiɛ kee nyjila ŋga ki fna nu, mu nyina na Nyiɛkpↄↄ chaa mbe lewo kro ŋmaa ta. 7Kre kra tia pra ni wↄ bituŋu, a ndaa sɛ leele mblɛ pe n pe Judae pre nyina shↄnlie na kpra kee kre. Kala ma ni fnɛ, kpra titi ni yuu kre. 8Ni chaa lawee kro nu mbe bilɛ kɛnyi yire nyjeeri mbe nyiɛtali, pe fna mbe pe leele mblɛ pe pe cheche, mblɛ nu krↄ, ndee kakrↄ kee ka n wa. 9Pan chↄↄ ni chaa mbe chiɛlɛ na dodonyi nyjɛ yi fna leni, mbe pe yiɛto, mbe peyɛ nyjii, pia na pe ndrɛ nyjuro pini ka sembremu mbra chaa mbe yi nyu mbe tro. A pia na swa nyiɛ yirɛ, ndee dnɛ chichiele saanrɛɛ teeri mbra peyɛ sani, a pia na dodonyi nyjɛ ndrↄ yi sheli mu tro leni. 10La, pe ti mbe pe kepele nyu na chiɛlɛ mblɛ pe Nyiɛkpↄↄ sumi lɛ. 11Chiɛlɛ fna mbe chin na ki fna mbe pra pieri, mbe peyɛ nyjii, mbe twan. 12Ndaa ti mbe chiɛlɛ bilɛ nyina, ndee mbe jaŋga ta pe na, pe fna mbra pieri. 13Ŋgi na, Adam pra klu mu gbeele, mna chin mu Hawa gbeele. 14Adam ma wↄↄ wre na fana, la, Hawa wↄↄ wre na fana mna tia wra Nyiɛkpↄↄ mbra taan. 15Ki tia Nyiɛkpↄↄ tia chiɛlɛ na kala nyaa sehaa, la, na pe u shↄnli, mu peyɛ nyjii, mu pe cheche, mu koroo ta kre, we pe shↄ.

will be added

X\