Tesalonika Hlɛ Jle 2

1Ni wolo, yire titi chin na shaaraa ŋga o pan mu e shaari kre nsra pe waara. 2E chin imi na pra o fiŋge, mna o tɛɛlɛ Filipi na, a o na chin mu pan e pan Tesalonika na. Nde o Nyiɛkpↄↄ wre na o ŋga gbun, a o na ketaan ŋga ki yiri u pan kre kee yo e pan, la, na lenɛɛrɛ wa na o nyu kaanri. 3Ŋga o naa chaa mbe taa ketaan kre kro kre, o nsra e fana, ndee mna nɛɛrɛ kee ka pe, a o nsra tro na e ni dnumu kolo ka na. 4La, imi na Nyiɛkpↄↄ naa chaa mbe o paara e pan kre, pan o na pe, ŋgi na, wra o le na o nyu, mna ketaan kre le o kɛɛ. Chaa ma o naa chaa mbe o kee lewo yiɛ nyi, la, o naa chaa mbe Nyiɛkpↄↄ yiɛ nyi, wre u o lam kee chin. 5Yire titi chin na nyu tnam kee ma o na pan mu yo e pan, a o nsra pan mu paara e pan mbe yire ki na mbe yaka shↄ e pan jajaara kolo na, Nyiɛkpↄↄ wi o dansiɛfun. 6O nsraa mɛɛ chaa mbe yiri lewo, ndee e wa pan. 7Ŋga o pe Yesu Kristo bitumblↄ ŋga, kaa oo wa kolo ni na oo oyɛ kpↄↄ e na. La, ŋga o naa wa e jaara kre, o na oyɛ nyjii, pan o na pe na bifiun na u lo wi. 8Imi na o e kori kre ndra na, ketaan ŋga ki yiri Nyiɛkpↄↄ pan kre chiin ma o chaa mbe e loo, la, o chaa mbe ku e tlo. Ŋgi na, o na e kori kpↄↄ mu tro. 9O wolo, e sↄↄnri na wre titi naa o kɛ nyu tnumu tuni e nu, o naa tnumu tunu lafo na blee, imi kie pe mbe waa yire ketaan ŋga ki yiri Nyiɛkpↄↄ pan kre kpalaa na mbe e gbun na fↄlↄ ni. 10Yire titi we jaa o dansiɛrɛ li, a pan Nyiɛkpↄↄ o dansiɛrɛ li na. O kepele ŋga nu wre na yire shↄnlifɛɛnlɛ pre na tni kre na nyu, mna pe cheche, nɛɛrɛ ka nsraa wa o na. 11E chin na pan o na oyɛ yii na ndro na u biile lɛ. 12O na e le gbeŋmbaa, mna e gbunnyiŋge, mnaa yuu e pan na e ti mbe e tnimu nyu, mbe tna Nyiɛkpↄↄ pan, wre u e yeeri mu pan u Ŋunumu na yɛnyiŋge nu. 13Kre kee ŋga ni paan mbe yo ŋga ndra na, ni Nyiɛkpↄↄ kaan mboo nyjila kro nu. Ŋga o na pan mu Nyiɛkpↄↄ kee kre yo e pan kre, e na ki loo, mna ki yii kɛshiin, e nsra ki pe na lewo kee yi, la, e na ki yii na Nyiɛkpↄↄ kee yi, a Nyiɛkpↄↄ kee yi yɛŋgɛ. Yire mblɛ e shↄnli kre, Nyiɛkpↄↄ wa na tnumu tuni e nu. 14O wolo, kee nyjɛ Judea sumifɛɛnlɛ mblɛ pe pe Yesu Kristo wolo pre nya yire yɛ yi e nyaa kre. Imi na Judae pre na pe fiŋge kre, pan yire titi leele e fiŋge kre. 15Pre Judae pre pra O Tafun Yesu wre, na Nyiɛkpↄↄ kee nyanyofɛɛnlɛ pre gbo, mna wre fiŋge. Nyiɛkpↄↄ yiɛ n shↄ pre leele pre na, a pre na ndro wa na wa n tna. 16Hali praa chaa mbe o tↄ kolo, mbe waa kolo ta mbe kee ŋga kie leele mblɛ pe n pe Judae pre ŋga ŋmaashↄmu kre kpali pe pan, kre sisam ŋga tia nyjila kro nu sisam pe piin. La, fuŋgaami ŋga Nyiɛkpↄↄ krↄ kuↄn kre pan pe na. 17Ni wolo, wre rɛ, ŋga o na laa e na chiɛri kre, e la na o ta, a o naa e chaa mbe nya na, kraa wa na wre titi nsraa wa e jaara, nde e kee naa wa o jawala nu. 18O naa chaa mbe ndruu pan e pan wa. Mi Pↄↄl na gbeŋmba na mbe pan wa, kra wɛ gbee mni na, na Sutna na o ŋga kolo. 19Ni chaa mbe paan e nya, ŋgi na, yire lɛ o dankna, na o yɛshↄↄrↄ. Na O Tafun Yesu Kristo wre waa pan, a o yire u yiɛ kre, yire ni oo oyɛ kpↄↄ kee nyjɛ o pe na. 20Ki pe kpra na yire ni oo oyɛ kpↄↄ, a yire lɛ o yɛshↄↄrↄ.

will be added

X\