Tesalonika Hlɛ Jle 1

1Mi Pↄↄl, na Silas na Timotio pan hlɛ ŋga yiri, na shie sumifɛɛnlɛ mblɛ pee wa Tesalonika na, mu pe o lɛ Nyiɛkpↄↄ, na O Tafun Yesu Kristo wolo kre pan. Yire na dumiɛ na wejinyiŋge e tni. 2Nyjila kro nu o Nyiɛkpↄↄ kaan mboo e kro ndra na, na e sↄↄnri nyiɛtalaa nu. 3Ŋgi na, na o o lɛ Nyiɛkpↄↄ wre tali kre, tnumu ŋga e shↄnlie na tia e na tun, na tnumu kpↄↄ ŋga e koroo ŋga e na ta kre na tia e na tun kre, o yi sↄↄnri, mu na e dankna kpↄↄ ŋga e ta o Tafun Yesu Kristo wre nu kre sↄↄnri na. 4O wolo, o chin na Nyiɛkpↄↄ e kori, mu e wↄ na e pe u wolo. 5Ŋgi na, o na pan mu ketaan kre kpali e pan, paaraa chiin ma o na pan mu paara, o na e nyina Kpra Ŋumu wre jaŋga, mna e nyina na ketaan kre pe kpra kee. Ŋga o naa wa e jaara kre, e na chin tnimu ŋga nu o na nyi, yi krɛrɛ e e chichie ndra na yi. 6E na tia e tnimu na pe na wre na o Tafun wi, ŋgi na, e na kala nya, nde e na ketaan kre yii na yɛshↄↄrↄ ŋga ki yiri Kpra Ŋumu wre pan ni. 7Ki tia e na pe leele mblɛ Makedonia, na Achia sumifɛɛnlɛ pre we le mbe twan. 8Makedonia na Achia leele pre chiin ma pra yire e tnimu kre na mna o Tafun wre kee kre loo, la, imi e na Nyiɛkpↄↄ shↄ mu li kre, leele ki loo lawee kro nu. E kee ka n wa mbe o ta mbe yo leele pan na. 9Ŋga o na pan mu e shaari, a e na o yii chichie kre, leele pre kroo wa na ki kee yuu. A ŋga e na laa sɛɛnlɛ kro, mu pan na Nyiɛkpↄↄ kprafun ŋmba u le wre sumi, 10na u Pↄ wre sri mbe u yiri nyjeeri mbe pan, u Pↄ Yesu Kristo ŋmba wra nyi mu yili kuulo nu kre, wre u wↄ mu yili Nyiɛkpↄↄ krↄ kuↄn ŋga ki paan kre nu.

will be added

X\