Pita Hlɛ Jle 4

1Ŋga Kristo na kala nya u wejiŋge nu kre ndra na, e eyɛ kna, e jawa na pan ee kala nya. Ŋgi na, lewo ŋmba we kala nya kre kolo ŋga na kre, wa uyɛ le sisam nu na. 2Kena mu yire fuŋgaami na shie kre, e tnimu nu tra mna kre, e tni Nyiɛkpↄↄ chaara nu, mbe yaa taa lewo niŋge yirɛ na na. 3E na nyjila kla tataara, mu kee nyjɛ leele mblɛ pe n Nyiɛkpↄↄ chin chaa yire pe. E tnimu nu kee nyjɛ e naa pini na yi, chachaara, na niŋge sisaa, na simi gbↄↄrↄ, na pnaa fuɛn, na ble yɛ woni na fni na simi gboo, na sɛɛn sumiɛ ni. 4A fuŋgaami, ki leele mblɛ pe n Nyiɛkpↄↄ chin kre pe kawako na yire na pre n chaa na yire kefuɛn nyjɛ pe pini na, ki tia pra e tɛɛlɛ. 5La, pie sɛ pe kee nyu wↄ Nyiɛkpↄↄ ŋmba u uyɛ kna mbe gboolo, na mblɛ pe le kro kala li wre yiɛ. 6Kre ki tia Yesu na sɛ ketaan kre kpali gboolo pan kre, la, ŋga praa wa na le kre, pimi ŋga lewo kro na li kre, pra ka li na, a kra tia pra ku, la, mbe pe yire ketaan kre loo na, mbe tni Ŋumu nu na Nyiɛkpↄↄ wi. 7Yirɛ kro nyukↄↄnrↄ dani. Kena e jawala ta, e eyɛ kna, e na nyiɛtali. 8E eyɛ kori kpↄↄ, koroo ki wɛ kee kro na, ŋgi na, koroo sisam tataara toni. 9Na wa le u ŋmbrↄ pan fuŋu, u u le chichie, yaa na taanri. 10Kpra Ŋumu wre kɛyira ŋga wa ta kpan, u ki tɛɛ mbe u ŋmbilɛ sumi, mbe pe nyina Nyiɛkpↄↄ dumiɛ kpↄↄ kre. 11Na wa we kee kpali kre, u Nyiɛkpↄↄ kee kpali, na wa we sumi kre, u u faŋga ŋga Nyiɛkpↄↄ u ŋga kre tɛɛ mbe u sumi, mbe ki yire ki na mbe leele yire Yesu Kristo na mbe Nyiɛkpↄↄ ŋga mboo kee kro na. Wre wo yi yɛnyiŋge, na faŋga nyjila kro nu. Amin. 12Ni wolo mblɛ ni kori, yaa ti mbe ki e pe kawako na e kanyana penlee nyaa, yaa jawa na kee fↄŋgↄ ka ki e dani. 13La, e ti mbe e yiɛshↄ na e Yesu kanyana yire yɛ nyaa, kena na Nyiɛkpↄↄ waa u yɛnyiŋge kre wↄ mu nyina kre, mbe e yɛshↄↄrↄ kpↄↄ ta. 14Na pe yila Kristo na mu na e tɛɛlɛ kre, e wo yi dwamu, na ki pan ma kena e chin na Nyiɛkpↄↄ Ŋumu wre, yɛnyiŋge Ŋumu wree wa e nu. 15Na e wa kala nyaa kre, waa shia ti mbe ki yire linkuuro, ndee juuro, ndee kefↄↄn, ndee leele kee yoo na. 16La, na mu pe Kristo ndro a mu yire kre na na kala nyaa kre, maa shia ti ki mu pe nyifɛɛrɛ ni, la, Nyiɛkpↄↄ ŋga mboo na Kristo mɛɛ taa mu na. 17Nyiɛkpↄↄ kpra kun nyjila kre da, a Nyiɛkpↄↄ wre titi leele nu we klu mbe yire. Na Nyiɛkpↄↄ kpra kuↄn kre we klu yire wre na, kena mblɛ pe n ketaan ŋga ki yiri wre Nyiɛkpↄↄ pan kre shↄ mu li kre, mni pre we taa hin? 18Imi na Nyiɛkpↄↄ kee kre pe nyunↄ mu tɛɛ kre yo kre mbo, "Na ki sheli na leele mblɛ pe fraka shↄ ndie tinii kɛɛ kre, kena sisampefɛɛnlɛ mblɛ pe n Nyiɛkpↄↄ chin kre, mni pre we taa hin?" 19Kena leele mblɛ pe kala nyaa, a ki pe Nyiɛkpↄↄ chaara kre, pra ŋga ki nyu pini, mbe pe yɛ wru mbe le pe gbeelefun kprafun wre kɛɛ.

will be added

X\