Pita Hlɛ Jle 2

1Kena e eyɛ wↄ e yili sisam kee kro nu, yaa na kala fnɛ, ndee mbra yɛnyumu kee pini, ndee mbe pe kɛyirafɛɛnlɛ, ndee mbra leele kro yuu. 2E pe na bifimble lɛ, e ti mbe Ŋumu kee ŋga ki pe na nyinimi nyumu yi kre klo e ta, mbe ki ti na e ki ta mu ŋgↄↄri kre, mbe e lɛ mbe ŋmaa ta. 3Imi na Nyiɛkpↄↄ kee kre pe nyunↄ mu tɛɛ kre yo kre mbo, "E pan mu nya na o Tafun wre lɛɛ tna." 4E pan o Tafun wre jaara, wre wi dnɛ ŋga nu ŋmaa nyi, a leele ki je, na ki le yira waa, la, Nyiɛkpↄↄ ki wↄ na ki kee tnu ni. 5Kena e pe na dnɛ nyjɛ nu ŋmaa nyi yi, e ti mbe pe e tɛɛ mbe Ŋumu wre nyuŋgo sin, mbe e yire Yesu Kristo wre na mbe pe Sↄfue mblɛ pe pe cheche, mbe tnumu tun suminyuŋgo kre nu, mbe sra ŋga ki pe Ŋumu wre wo, mu tna Nyiɛkpↄↄ pan wↄ. 6Ŋgi na, Nyiɛkpↄↄ kee kre pe nyunↄ mu tɛɛ kre yo mbo, "Mi Nyiɛkpↄↄ ni dnɛ teeri Ziↄn na, mi ni ki wↄ a ki pe dnɛ ŋga kee ki pe tnu ni, a ŋmba we u shↄ mbe li kre, wa ti mbe nyifɛɛrɛ u gbo." 7Kre dnɛ ŋga ki tnu kpↄↄ mu yire mblɛ e shↄ mu li kre ŋga, la, mblɛ pe n shↄ mu li kre; "Kre dnɛ ŋga nyuŋgo sinfɛɛnlɛ pre na je kre, kre ki kↄ mu pe nyuŋgo kre ndra dnɛ." 8A Nyiɛkpↄↄ kee ŋga pe nyunↄ mu tɛɛ kre yo lawee fↄŋgↄ ka nu na mbo, "Kre dnɛ ŋga kie ti mbe leele gbro, kre dnɛ ŋga kie ti mbe pe to." Pra gbro, ŋgi na? Pe nsra kee kre shↄ mu li, a pan Nyiɛkpↄↄ naa chaa mbe pe pe. 9La, yire lɛ leele mblɛ Nyiɛkpↄↄ wↄ, a e pe Ŋulo, mu pe Sↄfue, mu pe leele mblɛ e pe cheche, mu pan mu pe u leele, a wre u e wↄ mbe e paan u kawako kee nyjɛ u pe yire kee kpali. Wre u e yeeri mu yili wↄmu nu, mu pan na e ni u kawako kania kre nu. 10Nyjila ka nu na Nyiɛkpↄↄ leele ma yire, la, fuŋgaami ŋga Nyiɛkpↄↄ leele lɛ yire. Nyjila ka nu na e n Nyiɛkpↄↄ foorochiɛn kre chin, la, fuŋga rɛ u e fooro chin. 11Ni wolo, ni e tali, ŋga e sɛ pe fumblↄ mblɛ ee wa mu tni waŋgra ŋga nu nyjila chiɛri ŋga, yaa eyɛ wru mbe wejiŋge niŋge yirɛ ŋga, yire yi e toni kolo e ŋmaa lawee nyjila kro nu. 12E ti mbe e kepele nyu leele mblɛ pe n Nyiɛkpↄↄ chin pre nu, kena na pe yuu na sisampefɛɛnlɛ lɛ yire kuraa kre, pie kↄↄ e kee chiriri nyjɛ e pini yire nya, mbe yire yi na, na Nyiɛkpↄↄ wre waa pan, mbe pe u ŋga mɛɛ. 13O Tafun wre saara na, e eyɛ nyjii e jaŋgafun kro ŋga, e eyɛ nyjii e waŋgra kro ŋunu wre ŋga, 14wre na u loplombo mblɛ u tuni pra sisampefɛɛnlɛ ndie tini, na chichie pefɛɛnlɛ kaan mɛɛ kre kro. 15Ŋga Nyiɛkpↄↄ chaa e pe yi na, ee kee chichie nyjɛ e pini tɛɛ mbe mblɛ pe n yaka chin, mu na jijiere paaraa paara kre kee tↄ kolo. 16E ti mbe ndro kro e tnimi nya na e eyɛ ta, yaa e yɛtaara kre wru mbra e sisam toni, la, e tni na Nyiɛkpↄↄ tinlɛ lɛ. 17E na ndro kro kaan buuro, e e wolo shↄnlifɛɛnlɛ pre kori, e na Nyiɛkpↄↄ fiɛ, e na waŋgra kro ŋunu wre kaan buuro. 18Sumifɛɛnlɛ, e eyɛ nyjii e e tafɛɛnlɛ ŋga, mbra pe kaan buuro ŋga ki fna, ki n pe leele mblɛ pe nyjii, a pe lɛɛ tna na e ni kre chiin ki fna e na kaan buuro, la, mblɛ pe e pini nyanya kre kro, e pe ŋga buuro. 19Na ndro yila Nyiɛkpↄↄ na mu frↄ mu kanyana ŋga ki n fna na u ni nya kre, Nyiɛkpↄↄ we u dwan. 20Na mu sisaa pe, a mu frↄ mu tia pe mu gbun gbↄↄn ŋga ki n fna na mu ni, mɛɛ ŋgi kii wa ki nu hin? La, na mu kee ŋga ki fraka pe, a mu frↄ mu kala nya ki tlo, Nyiɛkpↄↄ we mu dwan ki na. 21Kre na Nyiɛkpↄↄ na e yeeri, ŋgi na, Kristo wre titi na kala nya e tlo, mbe e u le mbe twan, mbe taa u dumble na. 22"U nsra sisaa ka pe, ndro nsra kafinɛ kee ka loo mu yili u nyuu." 23Pra kefuɛn yo u na, nde u nsra nyu nyaa mu ndro tɛɛ. Wra kala nya, nde u nsra ndro piɛri na kee ka ni, la, Nyiɛkpↄↄ ŋmba u leele kpra kuun kpra kolo na wre, wre nu u dankna kro na nyi. 24Kristo wre titi wra o sisam tio na u wejiŋge ni mna sɛ kanyana kumu kaan kre na, mbe ki ti mbe o o sisam ti, mbe ŋga ki fraka pe. E yire u klɛɛ tlo yire na mu saanla yira kɛɛ. 25Pan e na nyi na mbaala mblɛ pe fun pe kolo na lɛ, la, fuŋga pe e kna mu pan mu taa mbaala lefun ŋmba u e le wre kro.

will be added

X\