Pita Hlɛ Jle 1

1Mi Pita, Yesu Kristo bituŋu wre, mi pan hlɛ ŋga yiri na shie Nyiɛkpↄↄ leele mblɛ pe fɛ mu nyina Ponto, na Galatia, na Kapadokia, na Asia, na Bɛtani tra nu kre pan. 2O lɛ Nyiɛkpↄↄ wre na e chin fa, mna chin mu e wↄ, mna yire u Kpra Ŋumu wre na mu e pe u biile mblɛ pe pe cheche, mbe e ndie tɛɛ Yesu Kristo wre pan mbe u u nyimi kre tɛɛ mbe e weli. Nyiɛkpↄↄ u e dumi mbe e ŋga wejinyiŋge imi na ki fna. 3E ti mbe o Nyiɛkpↄↄ, o Tafun Yesu Kristo lɛ wre ŋga mboo. Ŋgi na, u foorochiɛn kpↄↄ, a u yire Yesu Kristo nyiɛ ŋga u nyi mu yili kuulo nu kre na, mu o ŋga ŋmaa fↄŋgↄ. Mu tia o dankna ŋga nu ŋmaa nyi ta. 4Ki tia o yiɛ wa na yirɛ nyjɛ Nyiɛkpↄↄ tɛɛ u biile pan kre sri. U yire yirɛ yire tɛɛ e pan nyjeeri, na yii wa bawa yia kla, ndee mbe fↄↄn, ndee mbe lɛ. 5E wee yi, yire mblɛ e shↄ mu li, a Nyiɛkpↄↄ yire u jaŋga na mu na e le, mbe sɛ na e ni ŋmaashↄmu nu. Kre ŋmaashↄmu ŋga, we ki wↄ mbe e nyina ble haŋa kre nu. 6E ti mbe e yiɛshↄ kee nyjɛ ni yo ŋga na, la, aada penlee kanyana nyjɛ yi e dani fuŋgaami kre we ti mbe e yiɛ je chiɛri. 7Yire penlee kanyana yire yi e nyina na e shↄnlie yire. Imi na pe swanyiɛ leni kanhun mbe ki chin mbe nyu kre, pan chↄↄ pie yire penlee kanyana na mbe e shↄnlie ŋga ki kpↄↄ Nyiɛkpↄↄ pan mu wɛ swanyiɛ na kre pe mbe le. Na e waa ja mu frↄ mu yire kre, ŋga ble Nyiɛkpↄↄ we Yesu Kristo wↄ mbe nyina kre, ee mɛɛ, na yɛnyiŋge, na kpↄↄmu ta. 8E u kori, nde e n da mu u nya tun. E n ta mu u nya, nde e u shↄ mu li, mu yɛnyiŋge yɛshↄↄrↄ ta, hali ndro wa jaa e yɛshↄↄrↄ kre nyini nyina ndro pan. 9Ŋgi na, yira ŋga na e yila mu shↄnlie ta, a ki pe e ŋmaashↄmu kre, e ki ta. 10Kre ŋmaashↄmu ŋga, Nyiɛkpↄↄ kee nyanyofɛɛnlɛ na ki lawee wie, mna ki haa cha, mna dumiɛ ŋga ee ta kre kee nya mu yo. 11Kristo wre Ŋumu wre wraa wa pe nu kre na klu mu wre Kristo wre kanyana yire, na u yɛnyiŋge ŋga kie pan u kanyana yire kro kre yo pe pan, a praa chaa mbe nyjila na kolo ŋga na yire kee yire we yire mbe pe chin. 12Nyiɛkpↄↄ na u kee nyanyofɛɛnlɛ pre nyina na, tnumu ŋga pe tuni kre, pre titi nyumu na ma pe ki tuni, la, yire nyumu na yi. Yire kee nyjɛ e ta mu loo fuŋgaami mu yiri ketaan kre kpralifɛɛnlɛ pan kre, pre pe yire Kpra Ŋumu ŋmba Nyiɛkpↄↄ pe ŋga mu yiri nyjeeri wre jaŋga na mu yi kpali e pan. A yire kee nyjɛ nyjeeri bitumblↄ chaa mbe yi nↄↄ loo. Nyiɛkpↄↄ e yeeri na e paan pe cheche 13Kena e eyɛ kna, e ti mbe e yiɛto, mbe e ti mbe e dankna kro pe dumiɛ ŋga ee ta kre na, na Nyiɛkpↄↄ waa Yesu Kristo wↄ mu nyina kre, ee dwamu ta. 14E li Nyiɛkpↄↄ kee na, yaa ti mbe e niŋge ti mbe e tnimu pe na nyjila ŋga e nsra chin kre yi. 15La, e pe cheche kee ŋga e pini kro nu, imi na Nyiɛkpↄↄ ŋmba u e yeeri wre pe cheche kre. 16Nyiɛkpↄↄ kee kre pe nyunↄ mu tɛɛ kre yo mbo, "Ki fna e pe cheche. Ŋgi na, ni pe cheche." 17Na e Nyiɛkpↄↄ tali kre, e u yeeri Ndoo, wre u ndro kro kpra kuun imi na u kepele nyi, wra ndro yiɛ le. Kena nyjila ŋga ni ee wa tra ŋga nu ŋga, e Nyiɛkpↄↄ fiɛ e tnimu nu. 18Ŋgi na, yire titi, e yira ŋga Nyiɛkpↄↄ kla e na, a e chin mu e yɛ ta mu yili e tolɛɛlɛ kewɛɛ yire krↄ e li yire kɛɛ. Swanyiɛ, ndee swa fiŋge nyjɛ yie jaa kla yire ka ni ma Nyiɛkpↄↄ na tɛɛ mu e lↄ. 19Yesu Kristo sra kpↄↄ ŋga wra wↄ kre, na e na yire mu eyɛ ta. Wre wra pe na mbↄↄ pↄ ŋmba na tlo ndee nɛɛrɛ ka nsraa wa. 20Nyiɛkpↄↄ na u wↄ mna chin mu waŋgra gbeele mu yila e na mu u wↄ mu nyina ble hɛnyi nyjɛ nu. 21Wre na ee yire mbe Nyiɛkpↄↄ shↄ mbe li. Nyiɛkpↄↄ wra u nyi mu yili kuulo nu, mu u ŋga yɛnyiŋge, mbe ki ti e yire u na, mbe e shↄnlie na e dankna kro pe Nyiɛkpↄↄ nu. 22Ŋga e ndie tɛɛ kpra kre pan ŋga, e eyɛ pe cheche, mu yire ki na mu pan mu e ŋmbilɛ sumifɛɛnlɛ kori na kpra ni, E e ŋmbilɛ sumifɛɛnlɛ kori kpↄↄ na e lolonyi kro ni. 23E yire Nyiɛkpↄↄ nyu kee ŋga kii wa mu tni blenyini kre na, a Nyiɛkpↄↄ e se fↄŋgↄ, na biile mblɛ lɛ wa ku wi. 24Imi na Nyiɛkpↄↄ kee kre pe nyunↄ mu tɛɛ kre yo kre mbo, "Pan lewo kro nyi na nyaa yi, pan pe yɛnyiŋge kro nyi na toto yi. Nyaa yuai, a toto kre kun mbe to, 25la, Nyiɛkpↄↄ kee kree wa nyjila kro nu." A kre kee kre yi ketaan ŋga pe kpali e pan kre.

will be added

X\