Jↄn Hlɛ Jle 4

1Ni wolo mblɛ ni kori, yaa na mblɛ pe yuu na Kpra Ŋumu wree wa pe nu pre kro shio mbra lii, la, e pe le chichie, na Ŋumu ŋmba uu wa pe nu wre, na Nyiɛkpↄↄ Ŋumu wi. Ŋgi na, kafinɛ Nyiɛkpↄↄ kee nyanyofɛɛnlɛ tataara pan mu nyina waŋgra nu kro. 2Kolo ŋga na ee yire mbe Nyiɛkpↄↄ Ŋumu wre chin yi kre. Ndro ŋmba we nyu nyaa mbe yo na Yesu Kristo na pan na lewo wi kre, mu chin na Nyiɛkpↄↄ Ŋumuu wa u nu. 3A ŋmba we yo na Yesu Kristo nsra pan ma kre, mu chin na Nyiɛkpↄↄ Ŋumu ma uu wa u nu. Kre ŋumu kre yiri Kristo loŋgo wre pan. E na loo na wre loŋgo ŋmba paan, u le waŋgra nu fuŋga ma. 4Ni biile, yire rɛ, Nyiɛkpↄↄ wolo lɛ yire, a kafinɛ Nyiɛkpↄↄ kee nyanyofɛɛnlɛ pre wa jaa e fana, ŋgi na, Ŋumu ŋmba uu wa e nu wre, uu jaŋga ni mu wɛ ŋumu ŋmba uu wa waŋgrafɛɛnlɛ nu kre na. 5Pre kafinɛ Nyiɛkpↄↄ kee nyanyfɛɛnlɛ pre, waŋgra kee pe yuu, a waŋgra leele na ndru pe pan, ŋgi na, waŋgra wolo lɛ. 6La, Nyiɛkpↄↄ wolo lɛ wre. Ŋmba u Nyiɛkpↄↄ chin kre, u ndie teeri o pan, a ŋmba u n pe Nyiɛkpↄↄ wo kre, wa ndie tɛɛ mbe loo o pan. Kena ŋga na oo yire mbe Kpra Ŋumu na kafinɛ ŋumu wre chin. 7Ni wolo mblɛ ni kori, e ti mbe o oyɛ kori. Ŋgi na, Nyiɛkpↄↄ pan koroo yiri. Ndro ŋmba nu koroo nyi kre, Nyiɛkpↄↄ ndro wi, a u Nyiɛkpↄↄ chin. 8Ŋmba nu koroo n wa kre, u n Nyiɛkpↄↄ chin, ŋgi na, koroo wa Nyiɛkpↄↄ nu. 9Kolo ŋga na Nyiɛkpↄↄ u koroo nyina yi kre, wra u Pↄ nunu chom wre tun a wra pan waŋgra nu, mbe o yire u na mbe ŋmaa ta. 10Kre kee ŋga yi koroo, ki n pe na wre o Nyiɛkpↄↄ kori, la, wre u o kori, mu yila ki na mu u Pↄ tun, mbe ki yire u na mbe o sisam tinkɛɛ ta. 11Ni wolo mblɛ ni kori, na kre kolo ŋga na Nyiɛkpↄↄ o kori waa, kena ki fna mbe o oyɛ kori. 12Ndro n da mu Nyiɛkpↄↄ nya tun, na o oyɛ kori kre, kena Nyiɛkpↄↄ wa o nu, a o u koroo kre na chirɛ o nu. 13Ŋga na oo yire mbe chin na oo wa Nyiɛkpↄↄ nu, a uu wa o nu, kre yi na, u o ŋga u Kpra Ŋumu wre, 14a o nya na yuu plɛ pan na, o Lɛ Nyiɛkpↄↄ wre wra u Pↄ wre tun na u paan pe waŋgra ŋmaashↄfun. 15Ŋmba we yo na Yesu wi Nyiɛkpↄↄ kre, kena Nyiɛkpↄↄ wa u nu, a uu wa Nyiɛkpↄↄ nu. 16A o Nyiɛkpↄↄ koroo ŋga u o kori chin mu ki shↄ mu li. Koroo wa Nyiɛkpↄↄ nu, ki tia ndro ŋmba nu koroo nyi kre uu wa Nyiɛkpↄↄ nu, a Nyiɛkpↄↄ wa u nu. 17Na o koroo ta chiriri kre, kie ti mbe o gbun ta mbe yire Nyiɛkpↄↄ kpra kun ble kre nu, ŋgi na, imi na Kristo nyi kre, pan o nyi waŋgra ŋga nu. 18Mna koroo nyi kre, fiɛrɛ n wa wa, koroo chiriri fiɛrɛ kro nini. Kena ŋmba nu fiɛrɛ nyi kre, u n koroo chiriri ni, ŋgi na, fiɛrɛ na ndietiniɛ ki nyaari. 19O Nyiɛkpↄↄ kori, ŋgi na, Nyiɛkpↄↄ u klu mu o kori. 20Na ndro yo na, "Ni Nyiɛkpↄↄ kori", la, mu u ŋmbrↄ pra kre, kena kala u fnɛ. Ŋgi na, wa jaa Nyiɛkpↄↄ ŋmba u n nya wre kori mbe u ŋmbrↄ ŋmba u nya wre pra. 21Mbra ŋga Kristo na o ŋga yi kre, mbo, "Ŋmba u Nyiɛkpↄↄ kori kre, ki fna mbe u u ŋmbrↄ kori na."

will be added

X\