Jↄn Hlɛ Jle 2

1Ni biile, ni e nyunↄi yire kee nyjɛ imi kie pe mbe yaa sisaa pe, la, na wa sisaa pe kre, oo wa na Yesu Kristo ni, wre u fraka, a wre u o Lɛ Nyiɛkpↄↄ wre tali o pan. 2A wre Kristo wre na ki yire a o na sisam tinkɛɛ taa, a ki n pe wre chiin, la, wre na waŋgra leele kro. 3Na o li Nyiɛkpↄↄ mbra na kre, kena o chin na o u chin yɛngɛ. 4Na ndro yo na, "Ni u chin," la, na ufun n li u mbra na kre, ufun wre pe kafnu, a kpra n wa u nu. 5La, ŋmba we li u kee kre na kre, wrefun wre nu Nyiɛkpↄↄ koroo nyi chiriri. Ŋga na oo yire mbe chin na wre na Nyiɛkpↄↄ pe nunu yi kre, 6ŋmba we yo wre na Nyiɛkpↄↄ ndro wi kre, u tni imi Yesu na nyi kre. 7Ni wolo, mbra fↄŋgↄ ma ni nyunↄi, la, mbra lɛɛ ŋga e na ta jle kre yi. Mbra lɛɛ kre yi kee ŋga e da mu loo fa kre. 8La, kolo ka na kre, mbra ŋga e nyunↄi kre pe mbra fↄŋgↄ, a ki kpra kro, yire na Kristo nu ki nyaa. Ŋgi na, wↄmu kre troi mbe sɛ, a kpra kania kre na nyaa. 9Ŋmba we yo na u nyaari kania kre na, la, mu u ŋmbrↄ pra kre, u fuun wa wↄmu nu tɛ. 10Ŋmba u u ŋmbrↄ kori kree wa kania kre na, a kee ka n wa u nu, ŋga kie ti mbe ndro sisaa pe. 11La, ŋmba u u ŋmbrↄ pra kree wa wↄmu nu, na nyaari ki nu, a u n chin mna u shie. Ŋgi na, wↄmu kre tia u fun nyiɛlɛ na. 12Ni biile ni e nyunↄi hlɛ, ŋgi na, Kristo mɛɛ kre saara na, e sisam tinkɛɛ ta. 13Ndooe, ni e nyunↄi hlɛ, ŋgi na, ŋmba wraa wa a pra chin mna yirɛ kro gbeele wre, e u chin. Nyanyjɛbɛɛlɛ, ni e nyunↄi hlɛ, ŋgi na, e Sutna wre ja. 14Biile, ni e nyunↄi hlɛ, ŋgi na? E o Lɛ Nyiɛkpↄↄ wre chin. Ndoe, ni e nyunↄi hlɛ, ŋgi na? E ŋmba wraa wa, a yirɛ kro na chin mu gbeele wre chin. Nyanyjɛbɛɛlɛ, ni e nyunↄi hlɛ, ŋgi na? Faŋgaa wa e nu, Nyiɛkpↄↄ kee kree wa e nu, a e Sutna wre ja. 15Yaa waŋgra ŋga kori, na yirɛ nyjɛ yii wa ki nu ni. Na wa waŋgra ŋga kori kre, kena o Lɛ Nyiɛkpↄↄ wre koroo n wa u nu. 16Yirɛ nyjɛ yii wa waŋgra ŋga nu a yi pe lewo niŋge sisaa yirɛ na nyjɛ lewo nyaa mbra yi chaa, na nyjɛ ni lewo uyɛ kpↄↄri nyjɛ kro, yi ka n yiri Ndoo wre pan, yi krɛrɛ waŋgra ŋga nu yi yiri. 17Waŋgra, na ki niŋge sisam yirɛ nyjɛ kro nyjila troi mbe sɛ, la, ŋmba u ŋga Nyiɛkpↄↄ wre chaa pini kre we tni blenyini. 18Ni biile, nyjila haŋa kre nu o nyi kre, a imi na e na klu mu loo na, Kristo Loŋgo wre paan kre, fuŋgaami ŋga u loŋgoolo pre yiri, ki tia o chin na nyjila kre dani. 19Pre leele mblɛ nyini n chaa o nu, kre ki tia pe ku o na kre, na pra chaa o nu kre, wre na pre oo na tni. La, pe n pan mu chaa o nu, ki nyina chasi na pe n wa o nu. 20La, Kristo e ŋga Kpra Ŋumu wre, a ki tia e kro kpra kre chin. 21Ni e nyunↄi hlɛ, ki n pe na ŋga e n kpra kre chin na ni e nyunↄi, la, ŋga e kpra kre chin kre na yi, a e chin na kafinɛ kee ka n wa kpra kre nu. 22Kena ŋmbi wi kafnu hin? Kafnu wi ŋmba u yuu na Yesu ma Kristo wre. Wrefun wi Kristo loŋgo wre, wrefun u o lɛ Nyiɛkpↄↄ na u Pↄ wre je. 23Ŋgi na, ŋmba we Pↄ wre je kre, u u Lɛ wre je na, ŋmba we Pↄ wre shↄ kre, u u Lɛ wre shↄ na. 24E ti mbe ketaan ŋga e na klu mu loo jle kre tni e nu. Na e tia kee ŋga e na klu mu loo jle kre tni e nu kre, kena yire na Pↄ wre na u Lɛ wre we pe nunu. 25Yira ŋga Kristo wre titi yo mu tɛɛ na we o ŋga yi blenyini ŋmaa. 26Leele mblɛ pe e fana pre kee ni e nyunↄi kre. 27La, yire rɛ, Kristo e ŋga Kpra Ŋumu wre. Ŋga u Ŋumu wree wa e nu ŋga, e n ndro shian mbe u e nyina na. Ŋgi na, Kpra Ŋumu wre e nyina kee kro, a nyjɛ u e nyina yire pe kpra, kafinɛ n wa yi nu. E li kee nyjɛ Ŋumu wre e nyina yire na, mbe yire na Kristo tni. 28Ni biile, yire na Kristo wre e tni, kena na u pan ble kre waa to, mbe o gbun ta mbe nyifɛɛrɛ waa o gbo mbe o sɛ ndra. 29E chin na Kristo fraka, kena ki fna e chin na ŋmba u kee ŋga ki fraka pini kpan, Nyiɛkpↄↄ pↄ wi.

will be added

X\