Korintoe Hlɛ Jle 6

1Na e wa na u ŋmbrↄ ta, ŋgi ki tii mbe u sɛ na u ni waŋgra kpra kunfɛɛnlɛ pan, mbe Nyiɛkpↄↄ leele pre ti hin? 2E n chin na Nyiɛkpↄↄ sumifɛɛnlɛ pie waŋgra leele kpra kun ree? A kena na yire ee kↄↄ waŋgra kpra kun, kena e n da mbe jaa kee bɛɛlɛ nyjɛ kpra kun ree? 3E n chin na wre oo kↄↄ nyjeeri bitumblↄ kpra kun ra? A mni kie pe mbe o pra waŋgra ŋga yirɛ kee yoo na hin? 4Kena na yire kee nyjɛ pan, ŋgi ki tii mbe e sɛ na yi ni leele mblɛ pe n yire haa ni e sumiɛ nu ŋga pan hin? 5Nyifɛɛrɛ ki e gbo kre. Kena kachiŋu nunu chom n wa e nu, na kala pan wa na u ŋmbrↄ lalaa, mbe u jaa ki gbeele ree? 6A e na shie na eyɛ ni leele mblɛ pe n shↄnli yiɛ. 7Ŋga e ta na tuni, na shie na eyɛ ni kala lihaa ŋga kuraa nyina na e to. Ŋgi ki tia yaa ti mbe e ŋmbilɛ e dnumu hin? 8A yire titi kna na sisaa, na dnumu kee pini e wolo Kristofɛɛnlɛ na. 9E n chin na mblɛ pe n fraka kre wa Nyiɛkpↄↄ ŋunumu kre ta mbe li ra? Kena yaa eyɛ fna. Tiɛrifɛɛnlɛ na sɛɛn sumifɛɛnlɛ, na leŋgeere klafɛɛnlɛ, bilɛ mblɛ pe tiɛri pe ŋmbilɛ bilɛ na, 10juolo, na jajaarafɛɛnlɛ, na gbↄgbↄↄlↄ, na kabaarafɛɛnlɛ, na dnumufɛɛnlɛ kro, wa wa Nyiɛkpↄↄ ŋunumu kre ka ta mbe li. 11Pan e plɛ na nyi fa, la, pe e weli, mu e pe cheche, mu e ŋga tam, o Tafun Yesu Kristo mɛɛ, na Nyiɛkpↄↄ Ŋumu nu. 12Wa we yo mbo, "Koloo wa mbe ni jaa kee ŋga ni chaa kro pe." Pan ki nyi. La, kee kro ma ki nyu mu mu ŋga. Mbe jaa yo na nii kolo ni na mbe kee ŋga ni chaa kro pe, la, mba ti mbe kee ka ni ta tnu. 13A lefuŋu we yo mbo, "lɛɛ wo yi sro, a sro wo yi lɛɛ." A nde Nyiɛkpↄↄ we ti mbe yi kro nyu to. Pe nsra lewo wejiŋge gbeele na u tiɛri na ki ni. La, lewo fna mbe u wejiŋge tɛɛ mbe o Tafun wre sumi, mbe o Tafun wre paan tni wejiŋge kre nu. 14Nyiɛkpↄↄ na o Tafun nyi mu yili kuulo nu, a we yire u jaŋga kre na mbe o nyi na. 15E n chin na Kristo wejiŋge ka yi e wejiŋge ree? Kena ki fna mbe ni Kristo wejiŋge ka wru mbe sɛ tiɛri ree? Pan ma ki nyi. 16E n chin na blↄ ŋmba we uyɛ wru mbe taa tɛtiɛrↄↄ na kre, kena wre na wre wejiŋge pe nunu ra? Pe ki nyunↄ Nyiɛkpↄↄ hlɛ kre nu mu tɛɛ chasi mbo, "Pre shiin pre we pe wejiŋge nunu." 17La, ŋmba na o Tafun pie mbra kre, wre na wre we pe nunu ŋumu nu. 18E tiɛrɛɛ ti, sisaa ŋga lewo pini kpan kra u wejiŋge kla, la, ŋmba u tiɛri kre, u sisaa pini na u wejiŋge klai. 19E n chin na e wejiŋge pe Kpra Ŋumu wre nyuŋgo, a Nyiɛkpↄↄ wre wra e ŋga u wi, a uu wa e nu ra? Yire titi ma e eyɛ ta, Nyiɛkpↄↄ wolo lɛ yire. 20Wra e lↄ ndrↄ shelee. Kena e e wejinyi tɛɛ e Nyiɛkpↄↄ ŋga yɛnyiŋge.

will be added

X\