Korintoe Hlɛ Jle 16

1Mu wru swa nyjɛ pe waari na Nyiɛkpↄↄ sumifɛɛnlɛ kaan kre haa kre, e pe imi na ndaa yo Galatia sumifɛɛnlɛ pan na pe pe kre. 2Aliɛri ŋga kie to kpan, swa ŋga ŋufun ta kranu kre nu kre, ki fna mu ki le, mbe imi ki fna wↄ mbe tɛɛ, na ni waa pan kre, kena tↄↄ shↄↄ ka n wa na. 3Na mbaa pan, leele mblɛ yire titi we wↄ kre, mbe hlɛ ŋga ni pie pe chin nyunↄ mbe ya e swa kre na, mbe pe tun mbe pe sɛ na ki ni Jerusalɛm na. 4A na kia fna na mbe ka sɛ naa, kena mi na pre we sɛ. 5Na ndaa yiri Makedonia na, mbe pan e pan wa. Makedonia na ni chaa mbe tro tun. 6Aada mbe ble yɛ li e pan wa, na kia nyu, mbe zaara nyjila kre li wa, mbe ki ti mna mbe na chaa mbe sɛ kpan, mbe e ya ni na. 7Ni n na chaa mbe ni shaaraa kre sɛ pe na shaari ni e shaari mbe troo sɛ lawee ka nu. Ni chaa na o Tafun wre li ki na kre, mbe ni tni e jaara mbe mu chiɛri. 8La, mbe tni Efiso na mna mbe sɛ su Pentikↄs ble kre nu. 9Ŋgi na, kolo badaaŋga nyaa mu ni ŋga, a ndaa ketaan kre kpali, a kee nɛɛrɛ na pini, la, loŋgoolo pe nɛɛ. 10Na Timotio waa pan, e u le chichie, mbe wa fiɛrɛ wru mbe tni e nu. Ŋgi na? O Tafun wre tnumu u tuni na mi wi na. 11Kena yaa shia u le fiɛn. E u wa kolo na wejinyiŋge ni, mbe u ndru mbe pan ni jaara. Nii wa na wre na o wolo hamblɛ pre sri. 12O ŋmbrↄ Apolo rɛ, ni u tali, mbe wre na o wolo pre pan mbe e shaari. U n na chaa mbe pan fuŋgaami. La, na waa kolo ta we pan. 13E na dↄↄtaa, e yire gbiŋmbi e shↄnlie nu, e yire blɛm kɛ na, e sheli. 14E ta e yirɛ kro pini na koroo ni. 15Ni wolo, e chin na Stefana na, u sele wolo na lɛ shↄnlifɛɛnlɛ mblɛ pra klu mu shↄnli Achia na, a pe peyɛ wru mu Nyiɛkpↄↄ sumifɛɛnlɛ tnumu kre ŋga. 16Ni wolo, e jande, e eyɛ nyjii e pre leele mblɛ ŋga, pre na mblɛ pe Nyiɛkpↄↄ tnumu tuni kre kro. 17Ni yiɛshↄ Stefana, na Fↄↄtunato, na Akaiku paan kre na. Ŋgi na, pe pan mu ŋga ee na pe ni pan kre pe. 18Pe tia ni yiɛshↄ, imi na pe tia e yɛshↄↄrↄ ta wa kre. Pre leele mblɛ nyini ki fna mbe e eyɛ nyjii mbe ŋga chiriri. 19Sumifɛɛnlɛ mblɛ pee wa Asia na kre, pe e shaari. Akwila na Prisila, na sumifɛɛnlɛ mblɛ pe fni pe katoo wa kre kro e shaari chichie o Tafun mɛɛ nu. 20O wolo pre kro e shaari. E eyɛ shaari chichie ni pan. 21Mi Pↄↄl, mi titi kɛ nyunↄmu shaaraa yi ŋga. 22Ŋmba u n o Tafun kori kre, Nyiɛkpↄↄ we u sun. O Tafun pan ɛ! 23Yire na o Tafun Yesu dumiɛ e tni. 24Ni koroo ki tni e jaara Yesu Kristo mɛɛ nu. Amin.

will be added

X\