Korintoe Hlɛ Jle 15

1Ni wolo, fuŋga ni chaa mbe e sↄↄnri ketaan kre ndaa kpali e pan, a e na ki shↄnli, mu wa mu yire ki nu tɛ kre. 2Kre na ee yire mbe ŋmaashↄmu ta, na e kee ŋga ni kpali e pan kre yii gbiŋmbi wala. Na ki n pan ma, kena e shↄnlie pe waara. 3Kee ŋga ndaa ta kre, kre ndaa e nyina, a kre ki pe keshian kpↄↄ, na Kristo na ku o sisam ndra na, imi na pra ki nyunↄ Nyiɛkpↄↄ hlɛ kre nu kre, 4a pra u le, a wra nyi ki ble taarɛ ble na, imi Nyiɛkpↄↄ hlɛ kre yo kre. 5Wra uyɛ wↄ mu Pita nyina, mna chin mu uyɛ wↄ mu bitumblↄ kɛmbↄshiin pre nyina. 6Kre kↄkro ni, wra uyɛ wↄ mna o ŋmbilɛ plɛ nyina lawee ka nu, pra wɛ leele lafɛɛ knↄ na, pre leele mblɛ, pe nɛɛrɛɛ wa tɛ, a pe plɛ ku. 7Wra uyɛ wↄ mna Jemisi nyina, mna chin mu uyɛ wↄ mu bitumblↄ pre kro nyina. 8Ŋga ki kro tↄ kuraa kre, mi ŋmba ni n na pe sumifun nyjila ŋga kra fna nu kre, wra uyɛ wↄ mu ni nyina na. 9Mi ni pe fiɛn kuraa bitumblↄ pre nu, a ni n fna mbe pe ni yeeri bituŋu, ŋgi na, ndaa Nyiɛkpↄↄ sumifɛɛnlɛ pre pra. 10La, Nyiɛkpↄↄ dumiɛ saara na ni pe imi na ni nyi aŋga ŋga, a u dumiɛ ŋga u ni dumi kre n pe finfin, ŋgi na, ni tnumu tun mu wɛ bitumblↄ hamblɛ pre na, la, mi titi ma ni ja mu ki pe niyɛ, Nyiɛkpↄↄ u ni dumi, mu ni tɛɛ mu tnumu tun. 11Na mi ni tun kpↄↄ o, na pre lɛ o, ŋga ki shian yi na, o na ketaan kre kpali, a e na ki shↄnli. 12Kena, na o ki kpali e pan na Kristo nyi mu yili kuulo nu, ŋgi ki tia e plɛ na yuu na kunnyiɛ n wa ŋga hin? 13La, na kunnyiɛ n wa, kena Kristo nsra nyi hin? 14A na Kristo nsra nyi, kena o kee ŋga o yuu kre pe waara, a e shↄnlie pe finfin. 15A leele we o le na kala o fnɛ na taari Nyiɛkpↄↄ na, ŋgi na, o yuu na Nyiɛkpↄↄ Kristo nyi mu yili kuulo nu, na kpra yi na kunnyiɛ n wa kre kena u nsra nyi. 16Kena na kunnyiɛ n wa kre, kena Kristo nsra nyi. 17A na Kristo nsra nyi, kena e shↄnlie pe finfin, a ee wa e sisam nu tɛ. 18Kena mblɛ pe ku Kristo mɛɛ nu kre fun. 19Na ŋmaa ŋga nu o nyi ŋga chiin na o dankna ta Kristo nu kre, kena wre lɛ leele mblɛ kee kii fooro ni kpↄↄ mu wɛ ndro kro na. 20La, kpra kee ŋga kii wa ki nu yi na, Kristo nyi mu yili kuulo nu, mu nyina na kuulo we kↄↄ nyi. 21Ŋgi na, imi na ki yire ndro nunu na, a kumu pan kre, pan chↄↄ ki yire ndro nunu na, a kunnyiɛ pan na. 22A imi na leele na Adam pe nunu mu na kuu kre, pan chↄↄ leele nyi mbe ŋmaa ta, ŋga pre na Kristo pe nunu kre na. 23Ndro kro na u taamu yi, Kristo u yiɛklu, a na waa ndru mu pan shiin wo kre, mblɛ pe pe u wolo pre we nyi. 24Kre nu yirɛ kro nyu we to. Na waa jaŋgafɛɛnlɛ, na faŋgafɛɛnlɛ kro kla kre, we u ŋunumulie kre kna mbe u Lɛ Nyiɛkpↄↄ wre ŋga. 25Ŋgi na, Kristo fna mbe ŋunumu li mbe hɛ sun na we u jeelee taa u loŋgoolo kro na. 26Loŋgo ŋmba we kla haŋa wi kumu. 27Pe ki nyunↄ Nyiɛkpↄↄ hlɛ kre nu mu tɛɛ mbo, "Nyiɛkpↄↄ tia u jeelee taa yirɛ kro na." Na pe yo "Nyiɛkpↄↄ tia u Kristo jeelee taa yira kro na kre," ki nↄↄ nyina chasi na Nyiɛkpↄↄ wre titi u tia u jeelee taa yirɛ kro na kre, u n chaa. 28Na Nyiɛkpↄↄ waa yirɛ kro le u jaara mu kↄ kre, kre u Pↄ wre titi we uyɛ le Nyiɛkpↄↄ ŋmba u yirɛ kro le u jaara wre jaara na, mbe Nyiɛkpↄↄ wre titi ŋunumuli yira kro na. 29A na kunnyiɛ n wa, kena mblɛ pe tia pe pe ndrɛ je kuulo titɛɛ ŋga hin? Yira ŋgi pe chaa mbe nya hin? Na yɛŋgɛ kee pe yuu na kunnyiɛ n wa wala, kena ŋgi ki tia pra pe ndrɛ jee kuulo titɛɛ hin? 30A kena mni a o tia kumu na wre tↄndↄ, a o na kala nyaa nyjila kro nu ŋga hin? 31Ni wolo, ki pe kpra na ni kumu nyaa blenyini, a pan ki pe kpra chↄↄ, na ni e teeri na niyɛ kpↄↄri, o Tafun Yesu Kristo wre nu. 32A na tnu ŋga mbe ta tra mna na yi kre, kaa mi na Efiso bilɛ mblɛ pe nyaai na nyaalam yurɛ lɛ kre wa na wi. Na kunnyiɛ n wa yɛŋgɛ waa, kena "e ti o na lii mbra gboo, ŋgi na, baŋga imi, na o ku." 33Yaa ti mbe pe e fana. "Nↄↄlↄ sisaa wruu kepele chiriri klai." 34E yiɛ tɛɛ, mbe yaa na sisaa pini. Ŋgi na, plɛɛ wa e nu a pe n Nyiɛkpↄↄ chin. E ti mbe nyifɛɛrɛ e gbo na ni kre kee ŋga yuu e pan. 35Aada wa we wie na, "Mni sembremu kuulo nyini hin? A wejiŋge ŋgi sembremu ni pie nyi hin?" 36Jijuo, ŋga mu luu kre wa jaa yiri, fↄna ki fↄↄn tun. 37A na mu chaa mbe yua, ndee yira ka sembremu luu kre, ki bie mu le tra, ki tiŋge ŋga kie yiri kre ma mu le tra. 38La, Nyiɛkpↄↄ u ki kaan wejiŋge ŋga u chaa. Yira bie ŋga mu luu kpan, kre na ki tiŋge nyini yi. 39Wejiŋge kro n nunu, leele wejinyi nyinii nunu, a yurɛ wee nyinii nunu, a hanyiɛlɛ wee nyinii nunu, a mbroe wee nyinii nunu. 40A nyjeeri wejiŋgee wa, a tra wejiŋgee wa, la, nyjeeri wejiŋge nyumu nyinii nunu, a tra wejiŋge nyumu nyinii nunu. 41Yila nyumu nyinii kiyɛ, a nyiɛpↄ nyumu nyinii kiyɛ, a wↄɛlɛɛ nyumu nyinii yi yɛyɛ. Wↄɛlɛɛ yire yɛ nyinii wa, yire na yire nyumu nyini yi. 42Kena imi na kuulo nyiɛ nyi yi kre. Wejiŋge ŋga kie le tra kre we fↄↄn, ŋga kie nyi kre wa fↄↄn fio. 43Ŋga kie le tra yɛkuuro nu kre, kie nyi mbe yɛnyiŋge ta. Kie le tra, na faŋga n wa ki nu, la, kie nyi faŋga ni. 44Kie pe tra wejiŋge mbe pe ki le tra, la, ŋga kie nyi kre we pe ŋumu wejiŋge. Na tra wejiŋgee wa kre kena ŋumu wejiŋgee wa, 45Pre ki nyunↄ Nyiɛkpↄↄ hlɛ kre nu mu tɛɛ mbo, "Adam jle ŋmba Nyiɛkpↄↄ na klu mu wa kre, ŋmaa wra u ŋga," la, ŋmba u kro tↄ wre rɛ, Kpra Ŋumu ŋmba u ŋmaa kaan wi. 46La, ŋumu wejiŋge ma kra klu mu pan, la, tra wejiŋge kre kra klu mu pan, a ŋumu wejiŋge kre na chin mu taa. 47Lewo ŋmba Nyiɛkpↄↄ klu mu wa kre, tra ŋga pooro ni pra u faanri, a lewo shiin wo wre, nyjeeri wre yiri. 48Imi na ŋmba pra faanri pooro ni wre na nyi kre, pan chↄↄ mblɛ pee wa tra mna kre nyi. A imi ŋmba u yiri nyjeeri wre nyi kre, pan nyjeeri wolo nyi na. 49Imi na o nyi na tra mna ndro wre wi kre, pan chↄↄ oo kↄↄ pe na nyjeeri wo wre wi. 50Ni wolo, ŋga ni yuu e pan yi na, wejikaara na nyimi wa jaa sɛ Nyiɛkpↄↄ ŋunumu kre nu, ŋga kie fↄↄn kre, kia jaa ŋga kia fↄↄn kre krↄ li. 51E loo, ndrandra kee mbe yo e pan kre. O kro wa ku, la, o kro we chinɛ, 52na bnↄ haŋa kre waa tin, o kro we chinɛ nyjila nunu chom na, nyini wa gbun gbee shiin kple. Na bnↄ kre waa tin kre, Kristo leele mblɛ pe ku pre we nyi, mbe ŋmaa ta, a pia ku na, a wre mblɛ o le kre kro we chinɛ. 53A ŋga kie jaa ku mbe fↄↄn kre we chinɛ mbe kaari ŋga kia jaa ku mbe fↄↄn kre. 54Kena na ŋga kie ku mbe fↄↄn kre, na kia chinɛ mu kaari ŋga kia ku mbe fↄↄn kre, kena kee kre pe nyunↄ Nyiɛkpↄↄ hlɛ kre nu mu tɛɛ na, "U kumu jaŋga gbo, mu jaŋga ta ki na" kre we pe yɛŋgɛ. 55"Kumu, sena mu jaŋga ŋga ni mu kuu kre nyi hin? A sena mu faŋga ŋga ki yaa titi kre nyi hin?" 56Sisam ki kumu kaan faŋga, a Mbose mbra yire nu sisam faŋga ta. 57La, Nyiɛkpↄↄ wo yi mboo, wre u yire o Tafun Yesu Kristo na mu o ŋga jaŋga. 58Kena ni wolo mblɛ ni kori kre, e yire gbiŋmbi, yaa shia ti yaka e kↄ e titɛɛ. E eyɛ wru e o Tafun tnumu kre ŋga poŋgo nyjila kro nu. Ŋgi na, yire titi chin na o Tafun tnumu ŋga ee tun kre, yaa ki tun waara.

will be added

X\