Korintoe Hlɛ Jle 14

1Kena e klu e koroo haa cha, e ti e yiɛ nyina Kpra Ŋumu wre yirɛ nyjɛ u kee yire na, la, ŋga ki nyu yi nu yi Nyiɛkpↄↄ kee nyanyoo. 2Ŋmba u yolo fↄnyi yuu kre, leele ni ma u paara, la, Nyiɛkpↄↄ ni u paara. Ŋgi na, ndro n na u yolo yire nↄↄ ndru. Ŋumu wre jaŋga ni u kpra kee nyjɛ yi ndra yire yuu. 3La, ŋmba u Nyiɛkpↄↄ kee nyaa na yuu kre, leele pan u yi yuu, na yaa pe na mbe pe lɛ Nyiɛkpↄↄ kee kre nu, na pe leni gbeŋmbaa na faŋga. 4Kpra Ŋmba u yolo fↄnyi yuu kre, uyɛ u leni faŋga, la, ŋmba u Nyiɛkpↄↄ kee nyaa na yuu kre faŋga u leni sumifɛɛnlɛ pre nu. 5Ni chaa mbe e kro naa yolo fↄnyi yuu, la, ŋga ni chaa titi yi na, e kro we pe Nyiɛkpↄↄ kee nyanyofɛɛnlɛ. Ŋmba u kee kre nyaa na yuu wre u kpↄↄ mu wɛ yolo fↄnyi yofun wre na, fↄna ndroo wa mbe jaa yolo fↄnyi yire nↄↄ nyina, mbe ki sumifɛɛnlɛ pre le gbeŋmbaa. 6Ni wolo, kena na ni pan na yolo fↄnyi yuu e nu, a e n na yi nↄↄ ndru, tnu ŋgi ee ta ni pan hin? Fↄna ni Nyiɛkpↄↄ kee ŋga u ni ŋga kre yo e pan, ndee fↄna ni kachindɛ kee yo e pan, ndee fↄna ni Nyiɛkpↄↄ kee nya mu yo e pan, ndee fↄna ni e nyina Nyiɛkpↄↄ kee kre. 7Hali yirɛ nyjɛ nu ŋmaa n wa, a yi ja na gble kre, imi na bnↄ, na juru nyi ŋga, na yi n na tini chiriri, mni ndro we pe mbe mɛɛ ŋga luuro pe koni na ki ni chin hin? 8A na ndro ŋmba u ŋunↄwibnↄ foo kre n ki fↄ chiriri, ndro ŋmbi we uyɛ kna mbe sɛ ŋunↄ hin? 9Pan chↄↄ ki nyina, na mu yolo fↄnyi yo, a ndro n yi nↄↄ loo, mni we pe mbe kee ŋga mu yo kre nↄↄ loo hin? Kena kie pe na fuflɛ na mu paara mu wo finfin. 10Yolo nyininyinii wa waŋgra nu tataara, nde yi kroo nↄↄ ni. 11La, na ni n na yolo ka ndru kre, mbe ŋmba u ki yuu wre le yolo ka nyini yo fun, mbe wrefun mi le yolo ka nyini yofun na. 12Kena yire chↄↄ, ŋga e yiɛ nyina, a e na Kpra Ŋumu wre yirɛ yire chaa ŋga, e gbeŋmba e ŋga kie jaa ya sumifɛɛnlɛ pre na cha kpↄↄ. 13Kena ŋmba u yolo fↄnyi yuu kre, u nyiɛtali mbe jaa na yi nↄↄ nyina. 14Ŋgi na, na ni nyiɛtali yolo ŋga ni n na ndru nu kre, kii wa na ni ŋumu nyiɛtali, nde ni jawala n chin ŋga ni yuu. 15Kena mni ki fna mbe ni pe hin? Mbe nyiɛtali yolo fↄnyi nu, mbe ndru mbe nyiɛtali yolo nyjɛ nↄↄ ni ndru nu. Mbe mɛɛ kↄ yolo fↄnyi nu, mbe ndru mbe mɛɛ kↄ yolo nyjɛ nↄↄ ni ndru nu. 16Na ŋu na ndro tni, a mna Nyiɛkpↄↄ kaan mboo yolo fↄnyi nu, mni we pe mbe yo "Amin" hin? Na u n chin ŋga mu yo. 17Hali na mu mboo ŋga mu kaan kre nyu, ŋmba ŋu na wre tni kre wa tnu ka ta ki nu. 18Ni Nyiɛkpↄↄ kaan mboo na ni yolo fↄnyi yuu nɛɛrɛ mu wɛ e kro na. 19La, na nii wa sumifɛɛnlɛ pre nu kre, na ni ni jawala tɛɛ mu kalɛɛ knↄ yo, a pe yi nↄↄ loo, a ni plɛ nyina kre, kre nyu mu wɛ ŋga mbe kee kagbeŋge yo yolo fↄnyi nu na. 20Ni wolo, yaa pe biile tɛ, mbra bimi kee jawa, la, sisam haa kre, e eyɛ pe na bifimble lɛ, la, e loplombo jawala le. 21Pe ki nyunↄ Nyiɛkpↄↄ hlɛ kre nu mu tɛɛ mbo, "O Tafun yo na, leele mblɛ pe kayooro fↄnyi yuu, na le fumblↄ na mbe yire mbe paara leele mblɛ pan, a nde kre naa kɛ ni, pia ki loo." 22Kena yolo fↄnyi yoo n pe jaaraa sɛmbɛɛrɛ mu shↄnlifɛɛnlɛ ŋga, la, yi pe jaaraa sɛmbɛɛrɛ ni mu mblɛ pe n shↄnli kre ŋga. La, Nyiɛkpↄↄ kee nyanyoo yaa shↄnlifɛɛnlɛ na mbe pe lɛ Nyiɛkpↄↄ kee kre nu, la ki n na yaa mblɛ pe n shↄnli pre na. 23Kena na yire sumifɛɛnlɛ sɛ fni, a e kro na yolo fↄnyi yuu poŋgo, a fimi leele, ndee mblɛ pe n shↄnli pre pan e nu kre, pia yo na tↄↄlↄ e tↄↄlↄ ree? 24La, na e kro Nyiɛkpↄↄ kee nyaa na yuu kre, na ŋmba u n shↄnli, ndee fimi ndro pan e nu kre, nyjɛ we loo kre we u pimi kun, mbe ti u chin uyɛ lam na u sisaa pe. 25A kee ŋga kii wa u lam kpan, pie ki yo fimi na, mbe u kosie kan, mbe yo nyu lam na, "kpra na, Nyiɛkpↄↄ wa e lalaa." 26Kena mni mbe yo na hin? Ni wolo, Na e fni titɛɛ kre, waa wa na mɛɛ ni mbe kↄ, a waa wa kee ni mbe nyina, a waa wa wↄnnyina kee ni, a waa wa mbe yolo fↄnyi yo, a waa wa chↄↄ mbe yi nↄↄ nyina. E ti mbe yi kro na pini kolo ŋga na sumiɛ kre we sɛ yiɛ. 27Na plɛ we yolo fↄnyi yo kre, ki fna leele shiin, na pe nɛɛ kuraa kre, pe fna taarɛ, na ŋmba yo, mbe ŋmba yo, mbe wa yi nↄↄ nyina. 28La, na ndro n wa mbe yi nↄↄ nyina kre, kena pe pieri, mbe pre na Nyiɛkpↄↄ na yi paara. 29A Nyiɛkpↄↄ kee nyanyofɛɛnlɛ pre, shiin ndee taarɛ pe paara, mbe leele hamblɛ pre pe kee yire kpra kun. 30La, na wa waa na Nyiɛkpↄↄ kee nyaa na yuu, a shiin wo waa yiri kre, ki fna mbe jle wo wre pieri. 31Ŋgi na, e kro fna mbe yo nununu, mbe e kro jaa yaka twan mbe yili nyjɛ pe yuu yire nu, mbe yi e le gbeŋmbaa. 32Nyiɛkpↄↄ kee nyanyofɛɛnlɛɛ jaŋga ni na, na kee yire pan, mbe pe jaa frↄ, mbe peyɛ shie. 33Ŋgi na, Nyiɛkpↄↄ n pe Nyiɛkpↄↄ ŋmba u kee piin sakasaka, la, u pe wejinyiŋge Nyiɛkpↄↄ. Imi na ki nyi Nyiɛkpↄↄ sumifɛɛnlɛ kro nu kre, 34na e fni, ki fna mbe chiɛlɛ na pieri. Ŋgi na? Pe n kolo ni na pie paara, imi na Mbose mbra nyina kre, pe fna mbe peyɛ nyjii. 35Na kee ka pe chaa mbe chin kre, ki fna mbe pe sɛ pe pilɛ wie katoo. Ŋgi na, ki pe nyifɛɛrɛ kee na chlↄ we yiri mbe paara sumifɛɛnlɛ lalaa. 36Ndee e jawa na yire na Nyiɛkpↄↄ kee kre klu mu yire mu pan ra? Ndee yire chiin na kee kre da ree? 37Na wa jawa na Nyiɛkpↄↄ kee nyanyofun wi, ndee Kpra Ŋumu wree wa u nu kre, ufun fna mbe chin na kee ŋga ni e nyunↄi ŋga, na o Tafun wre mbra yi. 38Kena na wa n kre kee ŋga ni yuu ŋga wru mu pe keshian kre, yaa shia u wru mbe pe yaka. 39Kena ni wolo, e ti mbe e yiɛnyina Nyiɛkpↄↄ kee nyanyoo na, la, yaa yolo fↄnyi yoo tↄ kolo, 40la, yira kro fna mbe pe ki kolo na.

will be added

X\