1 Ni wolo, a mu wru Kpra Ŋumu wre yirɛ kɛɛ na kre, ni n na chaa mbe ki ka ndra e na. 2 E chin na nyjila ŋga nu e n na pe Kristo wolo kre, sɛɛnlɛ na e naa nyaari na tro, a yia jaa paara, a yira e wa mu fun. 3 Kena ni chaa mbe e chin na, na Nyiɛkpↄↄ Ŋumuu wa ndro nu kre, wa jaa Yesu tɛɛ. A ndro wa ja mbe Yesu yeeri Tafun, fↄna Kpra Ŋumu wre ya u na. 4 Kpra Ŋumu wre yirɛ nyjɛ u kee yire nyini nɛɛ, la, Kpra Ŋumu nunu wre u yi kro kaan. 5 Sumiɛ kolo nɛɛ, la, Tafun nunu o kro sumi. 6 Kooloe nyjɛ na Nyiɛkpↄↄ yire na tnumu tuni o nu kre nɛɛ, la, Nyiɛkpↄↄ nunu wre u yi kro tuni lewo nu. 7 Kpra Ŋumu wre yire wa na, na uyɛ woni na nyina, mbe ki pan tnu ni mbe plɛ ŋga. 8 Kpra Ŋumu wre wa kaan paaranyinaa kachindɛ, na tii mbe wa Nyiɛkpↄↄ kee nↄↄ loo mbe yo leele pan. 9 Ŋumu wre chↄↄ wa kaan shↄnlie kpↄↄ, na wa kaan jaŋga wra leele trai. 10 Kpra Ŋumu wre nunu wre chↄↄ wa kaan jaŋga wra kawako kee pini, mu na wa kaan jaŋga wra Nyiɛkpↄↄ kee nyaa na yuu, na wa kaan jaŋga mbe u ja mbe Ŋumu ŋga ki pe Nyiɛkpↄↄ wo, na ŋga ki n pe u wo chin, na wa kaan jaŋga mbe u jaa yolo fↄnyi yo, na wa kaan jaŋga mbe u ja mbe yolo fↄnyi yire nↄↄ nyina. 11 Kpra Ŋumu nunu wre u yire yirɛ nyjɛ kro pini, mu na ndro kro kaan ŋga wre Kpra Ŋumu wre titi chaa. 12 Imi na lewo wejiŋgee nunu, a ki kokoe nɛɛ kre, pan Kristo nyi, kii wa na u sumifɛɛnlɛ nɛɛ, nde leele nunu lɛ. 13 Pan Judae, na mblɛ pe n pe Judae, na tinlɛ, na lebiile kro, u pe o ndrɛ je Ŋumu nunu wre ni, mu o pe leele nunu, mu tia o kro Ŋumu nunu wre ta. 14 Lewo wejiŋge n pe kokoo nunu, ki kokoe nɛɛ. 15 Na ki pe na jele we yo na, kɛ ma mi, ki tia wejiŋge wo ma mi, kie jaa ti mbe kia pe wejiŋge kre kokoo ka ra? 16 A na ndie yo na, nyini ma mi, ki tia wejiŋge wo ma mi, kie jaa ti mbe kia pe wejiŋge kre kokoo ka ree? 17 Na wejiŋge kre poŋgo na pe nyini, mni kie na pe mbraa ndru hin? A na wejiŋge kre kro poŋgo na pe ndie, mni kie na pe mbraa ndiom ndru hin? 18 La, imi na ki nyi kre, Nyiɛkpↄↄ lewo kokoe yire pe mu le wejiŋge nunu nu imi na u chaa. 19 Na lewo wejiŋge na pe kokoo nunu chom, kaa sena wejiŋge kre nyi hin? 20 La, lewo kokoe yire nɛɛ, a nde wejiŋge nunu yi. 21 Ki tia nyini wa jaa yo kɛ pan na, "ni n mu shian." A ndra wa ja mbe yo jele pan na, "ni n mu shian." 22 La, lewo wejiŋge kokoo ŋga o jawa na ki kee n shian kre, kre kee ki shian kpↄↄ. 23 A lewo wejiŋge kokoo ŋga o shↄnli na ki n pe yaka yira kuraa kre, kre o toni yira ni, mu ki wru mu pe yira kpↄↄ, a kokoe nyjɛ yi pe nyifɛɛrɛ ni kre, yire o toni yirɛ ni chiriri, 24 a o wejinyi kokoe nyjɛ yi nyaa fimi na yire, yi n yire yirɛ nyjɛ shian. La, Nyiɛkpↄↄ u wejiŋge kre pe, mu tia kokoo ŋga pe n wru mu pe yaka kuraa kre, a ki mɛɛ ta kpↄↄ. 25 Ki tia ma jaa wejiŋge kokoo ka wↄ kiyɛ, la, ki kokoe yiree yi yɛyɛ, nde yi kro keshiaan wa yiyɛ na. 26 Kena na kokoo nunu ka kala nyaa kre, yi kroo wa kanyana nu. A na pe kokoo nunu ka ŋga mɛɛ kre, yi kro yiɛshio. 27 Kena e kro, Kristo wejiŋge lɛ yire, a u wejiŋge kokoe lɛ yire nununu. 28 Nyiɛkpↄↄ plɛ wↄ sumifɛɛnlɛ nu mu tɛɛ. Mblɛ pe yiɛklu lɛ bitumblↄ, mblɛ pe taa shiin lɛ Nyiɛkpↄↄ kee nyanyofɛɛnlɛ, mblɛ pe taa taarɛ lɛ nyinafɛɛnlɛ, na kawako kee pe fɛɛnlɛ, na yambla trafɛɛnlɛ, na mblɛ pe yaa leele na, na loplombo, na mblɛ pe yolo fↄnyi yuu. 29 Pe kro n pe bitumblↄ, a pe kro n pe nyinafɛɛnlɛ, a pe kro ma pe kawako kee pini, 30 a pe kro ma pe yambla trai, a pe kro ma pe yolo fↄnyi yuu, a pe kro n na yolo fↄnyi nↄↄ nyina. 31 La, e yiɛnyina e yire Ŋumu kɛyirɛ nyjɛ chichiele titi ta. A mbe e nyina kolo ŋga ki nyu mu wɛ nyjɛ krɛrɛ na.
