1 E ni le, e ni kepele twan, imi na ni Kristo kepele twan kre. 2 Ni e kaan mɛɛ, ŋgi na, e ni sↄↄnri nyjila kro nu, mu li kee nyjɛ ndaa e nyina yire kro na. 3 La, ni chaa mbe e chin na, blↄ kro ndra wi Kristo, a chlↄ ndra wi u plↄ, a Nyiɛkpↄↄ wi Kristo ndra. 4 Blↄ ŋmba we na nyiɛtali, ndee mbra ketaan kre kpali mbe juulee juule kre, kena u tia nyifɛɛrɛ Kristo gbo. 5 La, chlↄ ŋmba we na nyiɛtali, ndee mbra ketaan kre kpali, a u n sɛsɛ pↄ kre, kena u tia nyifɛɛrɛ u plↄ gbo. Chlↄ ŋmba u piin ma kre, pan u nyi to, na chlↄ ŋmba ndra pe klu wi. 6 Na chlↄ je na wa sɛsɛ pↄ kre, kena u u ndra knumu mbe wo, a ŋga ki pe nyifɛɛrɛ ni mu chlↄ ŋga na we u ndra knumu, ndee mbe ki klu kre ndra na, ŋga ki fna mbe chlↄ pe yi na we sɛsɛ pↄ. 7 A blↄ n fna mbe u ndra tↄ, ŋgi na, Nyiɛkpↄↄ u pe wre titi wrumu na, a wraa Nyiɛkpↄↄ wre yɛnyiŋge nyina. La, chlↄ rɛ, blↄ yɛnyiŋge u nyina. 8 Ŋgi na, blↄ ma pra gbeele mu yili chlↄ nu, la, chlↄ pra gbeele mu yili blↄ nu. 9 A chlↄ na ma pra yila mna blↄ gbeele, la, blↄ na pra yila mna chlↄ gbeele 10 Nyjeeri bitumblↄ ndra na, ki fna mbe chlↄ u ndra pↄ na sɛsɛ ni, mbe ki nyina na uu wa blↄ jaara. 11 O tnimu nu o Tafun nu kre, chlↄ blↄ shian, a blↄ chlↄ shian. 12 Ŋgi na hin, imi na Nyiɛkpↄↄ na chlↄ gbeele mu yili blↄ nu kre, pan chↄↄ ki pe, a chlↄ yiri mu kna na blↄ sii, la, Nyiɛkpↄↄ pan yira kro yiri. 13 Yire titi e kpra yo, ki nyu na chlↄ we yire mbra nyiɛtali, mbe u ndra ti waaraa? 14 Lewo titi chin na, na blↄ u nyjuroe ti a yi nɛɛ, a u n yi knumu kre, ki pe nyifɛɛrɛ mu u ŋga. 15 La, na chlↄ ndra nyjuroe tↄ mu nɛɛ kre, ki u kaan yɛnyiŋge, ŋgi na, chlↄ ndra nyjuroe pe yirɛ nyjɛ Nyiɛkpↄↄ u ŋga, wra u ndra toni. 16 La, na wa kre kee ŋga lii kakra kre, kee ŋga ni yuu e pan yi na, wre na Nyiɛkpↄↄ sumifɛɛnlɛ pre kro pan o pini. 17 La, kee nyjɛ mbe yo ŋga na rɛ, mba e ŋga mɛɛ yi na, ŋgi na, e fninlihaa kre, e na kee chichie pe wa, kee fuɛn nyjɛ e pini yire wɛ chichie nyjɛ e pini na. 18 Kee ŋga ki yiɛklu, pe pan mu yo ni pan na, e fnihaa kre, e eyɛ yↄↄlɛ, a ni shↄnli na nyjɛ pe pan mu yo ni pan yire ka we pe kpra. 19 Kakra n wa ki na, yɛŋgɛ yi, na ki pan ma a e eyɛ yↄↄlɛ kre, kie ti mbe e kpra sumifɛɛnlɛ pre nya eyɛ nu chasi. 20 Na e pan mu fni titɛɛ mbe li kre, o Tafun wre sro kre lie ma e ki lii kre. 21 Ŋgi na? Na e pan mu fni lihaa wa kre, e e sro lii eyɛyɛ, e na e ŋmbilɛ shie, mbe ki ti mbe klo plɛ ta, mbe plɛ gbↄ mbe to. 22 E n katoe ni mbe jaa na lii wa, mbra gboo wa ree? Ndee Nyiɛkpↄↄ sumifɛɛnlɛ pre pe fni kre, e pe le fiɛn, mu tia nyifɛɛrɛ na pↄlɛfɛɛnlɛ mblɛ pee wa e nu kre kuu ra? Kena kee ŋgi e chaa mbe ni yo e pan hin? Ni e ŋga mɛɛ ra? Kre na rɛ, mba e ŋga mɛɛ. 23 Ŋgi na, kee nyjɛ ndaa ta mu yili o Tafun wre pan kre, yire ndaa e nyina kre. O Tafun Yesu wre, blee ŋga pra u wↄ mu ŋga kre, wra paanu wru, 24 mna Nyiɛkpↄↄ ŋga mboo, mna ki pile, mna kna mbo, "Ŋga yi ni wejiŋge ŋga ni kaan, mbe ki ti e ŋmaa ta. E na ki piin e na ni sↄↄnri." 25 A pan chↄↄ, ŋga pra li mu kↄ kre, wra gbↄyira wru mna kna mbo, "Ŋga yi nyu nunu fↄŋgↄ ŋga kii wa ni nyimi nu. Nyjila ŋga nu ee gbↄ ki nu kpan, e ki pe e ni sↄↄnri." 26 Kena nyjila ŋga nu ee kre paanu ŋga ka, mbe gbↄ gbↄyira ŋga nu kre, kena o Tafun kumu kre kee e kpali mbe hɛ su na we ndru mbe pan. 27 Kena ŋmba we paanu kre ka, mbe gbↄ gbↄyira kre nu imi na ki n fna kre, we pimi li, kena u sisaa pe mu o Tafun wejiŋge, na u nyimi kre taan. 28 Kena ŋmba we yo we paanu kre ka, mbe gbↄ gbↄyira kre ni kre, ufun u uyɛ le chichie. 29 Kena ŋmba we paanu kre ka, mbe gbↄ gbↄyira kre ni, a u n yiɛ wa mu o Tafun wre wejiŋge kre le, mu ki nↄↄ chin kre, kena u ka, mu gbↄ mu uyɛ gbun na pimi ni. 30 Kre ki tia e nɛɛrɛ na yaa, plɛ na pↄlɛ e nu, a plɛ ku e nu kre. 31 La, na o oyɛ le chichie kre, Nyiɛkpↄↄ wa o gbun pimi ni. 32 La, o Tafun wre o kpra kuun, na o ndie tinii, imi kie pe mbe wa wre na waŋgrafɛɛnlɛ pre chaa mbe kla. 33 Kena ni wolo, na e fni mbe o Tafun sro kre li kre, e eyɛ shie. 34 Na klo e wa ta mu tro kre, u li katoo mbe chiin pan, mbe wa kↄↄ uyɛ gbun pimi ni e fninlihaa. Kaalɛɛ hɛnyi yire, na ni waa pan, mbe e nyina imi ee pe.
