Korintoe Hlɛ Jle 10

1Ni wolo, ni chaa mbe e kee nyjɛ o tolɛɛlɛ mblɛ pra taa Mbose na pre na nya yire sↄↄnri. Tlo kre na pe kro tↄ, a pe kro na nyaari mu tro epo nyiɛ kre lam. 2Ŋga pra tro epo kre nu, a tlo kre na pe tↄ kre, pan kra nyi to na pe ndrɛ pe je mu le Mbose kɛɛ. 3A pe kro na chaa mna sro ŋga Kpra Ŋumu wre na pe ŋga kre li. 4A pe kro na chaa mna nyumu ŋga Kpra Ŋumu wre na pe ŋga kre gbↄ. Dnɛ ŋga nu Ŋumu wre na tia nyumu na yili a pra gbↄ kre, kra pe sɛmbɛɛrɛ na Kristo wra pe ŋga ki yi. 5Hali nyjɛ krɛrɛ kↄkro kre, Nyiɛkpↄↄ yiɛ nsra shↄ pe nɛɛrɛ kepele na, a kra tia pe nɛɛrɛ na ku fimi tra kre nu. 6Yire kee nyjɛ pe o pan jaaraa fuŋgaami, mbe waa na sisam kee jawa mbe pe na pre lɛ, 7ndee mbra sɛɛnlɛ sumi imi na pe plɛ na pe kre. Imi na pe ki nyunↄ Nyiɛkpↄↄ hlɛ kre nu mu tɛɛ kre mbo, "Leele pre na tni mu li, mu gbↄ, mna yiri mu yↄ." 8Yaa ti mbe o tiɛri imi na pe plɛ na tiɛri, a leele kagbeŋ fulo na taarɛ na to mu ku ble nunu kre. 9Yaa ti mbe o o Tafun wre pe mbe le, imi pe plɛ na u pe mu le, a wↄↄlↄ na pe niↄ mu gbo kre. 10A yaa ti mbe o na taanri imi na pe plɛ naa taanri, a nyjeeri bituŋu ŋmba u leele kuu wre na pan mu pe gbo kre. 11Yire kee nyjɛ krɛrɛ na yili pe na, mna pe jaaraa mna plɛ ŋga, a pra yi nyunↄ mu tɛɛ mbe yi pe jaaraa wre mblɛ nyjila waŋgra paan mbe kla kre pan. 12Kena e ti mbe ŋmba u jawa na u yire gbiŋmbi kre uyɛ dↄↄta, mbe wa to. 13Nyu chaara kee ŋga ki da mu pan mu wɛ e na kpan, pan yi nyini leele dani. La, Nyiɛkpↄↄ pe kprafun, a wa ti na pe e nyu chaa, mbe ki wɛ e faŋga na. Nyjila ŋga nu pie na e nyu chaa kre, wre we ti e jaa eyɛ yii, mbe u e nyina kolo ŋga na ee tro mbe yili yi nu. 14Kena ni wolo mblɛ ni kori, e eyɛ wↄ e yili sɛɛnlɛ sumiɛ nu. 15Ni paara na e ni na kachimblɛ lɛ yire. Yire titi, e kee ŋga mbe yo e pan ŋga kpra kun. 16Gbↄyira ŋga Nyiɛkpↄↄ dwan, a o mboo ŋga ki na kre, na o gboo ki nu, kena Kristo nyimi kre ma o gboo ree? A paanu ŋga o pile kre, na o ki kaa, kena Kristo wejiŋge ma o kaa ra? 17Ŋgi na, paanu kree nunu, a wre nɛɛ, la, wejiŋge nunu lɛ wre, ŋgi na? O kro paanu nunu kre ka. 18E yiɛ wa e Israel leele pre le, mblɛ pe yirɛ nyjɛ ni pe sra woni sragbuɛnlɛɛ yire na, na Nyiɛkpↄↄ kaan yire kaa kre, pe n pe nunu na Nyiɛkpↄↄ ni ra? 19Kena mni ni chaa mbe nyina hin? Ni chaa mbe nyina na sro nyjɛ ni pe sɛɛnlɛ peerii yire nyu ree? Ndee ni chaa mbe nyina na sɛɛn pe yira titi ra? 20Pan ma ni yo. Ni yo na yirɛ yire ni pe sɛɛnlɛ peerii kre, ŋumufuɛn pe yi woni na kaan, Nyiɛkpↄↄ ma. Kena ni n na chaa mbe yire na ŋumufuɛn pe nunu. 21Yaa jaa gbↄ o Tafun gbↄyira nu, mbe ndruu sɛ gbↄ ŋumufuɛn gbↄyira nu. Yaa jaa sɛ li o Tafun lihaa, mbe ndruu sɛ li ŋumufuɛn lihaa. 22O chaa mbe ti o Tafun wre krↄ kun na o ni ra? O faŋga wɛ u wo na ra? 23Koloo wa mbe o jaa kee kro pe, la, kee kro ma ki nyu mu o ŋga. Koloo wa mbe o jaa kee kro pe, la, yi kro wa sɛ na o ni yiɛ. 24Yaa na yire chiin chichie jawa, e ta e ŋmbilɛ jawa chichie ni na. 25Kaara ŋga nyini pe prɛ jafa na kpan, ee jaa ki ka, yaa shia kaara ŋga nyini yi wie, a yaa na lɛɛlɛ ki kaa na. 26Tra yirɛ nyjɛ yii wa ki na kro, Nyiɛkpↄↄ u yi ta. 27Na leele mblɛ pe n shↄnli kre, na pe wa e wa yeeri mbe ŋu na wre sɛ li, a maa ki nↄↄloo, na mu sɛ kre, sro ŋga nyini we tɛɛ mu yiɛ kpan, ta lii, maa shia sro ŋga nyini yi wie, ŋga mu kↄↄ na kawa na ki ni kre ndra na. 28La, na wa waa yo mu pan na, "ŋga rɛ, prɛ o wↄ na ki ni" kre, ŋmba u ki yo mu pan wre jawala, na imi we na kawa na ki ni kre na, maashia ki li. 29Ŋga ŋu titi we na kawa na ki ni kre ndra na ma, la, ŋmba u ki yo mu pan wre na. Wa we yo na, "ŋgi ki tia ni niyɛ ta, mbe jaa ŋga ni chaa pe, a kee ŋga ni ŋmbrↄ jawa na, mba jaa ŋga ni chaa pe ŋga hin? 30Na ni ta mu Nyiɛkpↄↄ ŋga mboo ni sro ŋga mbe li na mu kↄ, mni mbe ndro ni kee yo ki na na hin?" 31Kena kee ŋga mu pe kpan, na lii mu lii o, na gboo mu gboo o, ki pe kolo ŋga na Nyiɛkpↄↄ we yiɛnyiŋge ta. 32Wa waa shia pe gbrontohaa mbe Judae ndro, ndee ŋmba u n pe Judae wo, ndee Nyiɛkpↄↄ sumifun wa pan. 33E pe imi na ni pini kre. Nyjila kro nu ni chaa ŋga mbe pe kpan, mbe ni ndro kro yiɛ nyi, ŋga ki nyu mu ni ŋga na ma ni yiɛ nyina, la, imi kie pe mbe pe ŋmaa ta na yi.

will be added

X\