Korintoe Hlɛ Jle 1

1Mi Pↄↄl ŋmba Nyiɛkpↄↄ na yire wre titi chaara na, mna ni yeeri na ni paan pe Yesu Kristo bituŋu kre, na o ŋmbrↄ Sostene pan hlɛ ŋga yiri, 2na shie Nyiɛkpↄↄ sumifɛɛnlɛ mblɛ pee wa Korinto na kre pan. Pre Nyiɛkpↄↄ yeeri mu yire Yesu Kristo na mu pe pe cheche, pre na leele mblɛ pee wa lawee kro nu, mu na o Tafun Yesu Kristo wre yeeri pe Tafun, na o kro Tafun kre. 3O Lɛ Nyiɛkpↄↄ na o Tafun Yesu Kristo wre pe e dumi, mbe e ŋga wejinyiŋge. 4E ndra na ni Nyiɛkpↄↄ kaan mboo nyjila kro nu, ŋga u yire Yesu Kristo na mu e dumi kre ndra na. 5Ŋga yire na Kristo pe nunu kre saara na, u e dwan kee kro na, e paara mu chin, a ee jawala ni na. 6Ŋgi na, Yesu Kristo kee ŋga e na loo kree wa e nu chichie. 7Ki tia yirɛ nyjɛ Ŋumu wre kaan yire ka keshian n kro e na, ŋga ee wa na sri mbe Nyiɛkpↄↄ o Tafun Yesu Kristo wↄ mbe e nyina kre na. 8Nyiɛkpↄↄ we ti e yire gbiŋmbi mbe sɛ kↄ, imi kie pe ŋga ble o Tafun Yesu Kristo we pan kre, mbe wa pimi kee ka nya e na. 9Kprafun wi Nyiɛkpↄↄ, wre u e yeeri na e pan mbe yire na u pↄ Yesu Kristo, o Tafun wre pe nunu. 10Ni wolo, ni e tali o Tafun Yesu Kristo wre mɛɛ ni, e na eyɛ nↄↄ ndru, imi kie pe mbe yaa na eyɛ yↄↄlɛ, la, mbe e jaa chaa mbe pe nunu, mbe e jawala pe nunu kee nunu na. 11Ni wolo, leele plɛ yiri Kloe sele nu mu pan mu ni wↄ ndie na, e tuni eyɛ na. 12Kee ŋga ni nyina yi na, e plɛ yuu na, "Pↄↄl wo wi mi, a plɛ na yuu na Apolo wo wi mi, a plɛ na yuu na Kefa wo wi mi, a plɛ na yuu na Kristo wo wi mi." 13Pe Kristo yↄↄlɛ ree? Ndee mi Pↄↄl pra kan kanyana kumu kaan na mu e ŋga rↄ? Ndee mi Pↄↄl mɛɛ nu pra e ndrɛ je mu le rↄ? 14Ni Nyiɛkpↄↄ kaan mboo na ni nsra e wa ndra je, fↄna Krispↄs, na Gaiu. 15Kena e wa waa shia yo na ni mɛɛ nu pra u ndra je mu le. 16Ni sↄↄnri na ndaa Stefana na u katoo wolo ndrɛ je na, mu ta mu kↄ pre na, ni n sↄↄnri na ndaa e wa ndra je na. 17Ŋgi na, Kristo nsra ni tun na ni pan mbra leele ndrɛ jee. Wra ni tun na ni paan ketaan kre kpali, a ki n pe lewo kachindɛ ni. Na lewo kachindɛ ni yi kre, jaŋga ŋga kii wa Kristo kum ŋga wra ku kanyana kum kaan na kre jaŋga wra ndra. 18Ŋgi na, kanyana kumu kaan kre, mblɛ pe shie mbe sɛ fun kre, pe ki kee le kewaa. La, wre mblɛ ŋmaa Nyiɛkpↄↄ shio kre, o chin na Nyiɛkpↄↄ jaŋga titi yi wre pan. 19Ŋgi na, pe ki nyunↄ Nyiɛkpↄↄ hlɛ kre nu mu tɛɛ mbo, "Mbe kachimblɛ kachindɛ kla, mbe ti kachimblɛ kee nyjɛ pe chin kro pe waara." 20Sena kachiŋu nyi hin? Ndee sena mbra nyinafun nyi hin? A sena waŋgra ŋga kakralifɛɛnlɛ pre nyi hin? Nyiɛkpↄↄ tia waŋgra ŋga kachindɛ pe jijiere kee. 21Nyiɛkpↄↄ pe kachiŋu, ki tia leele n ja mu yire pe kachindɛ na mu u chin. Kra tna Nyiɛkpↄↄ pan, na we yire kee ŋga plɛ yeeri jijiere kee ŋga o kpali kre na, mbe mblɛ pe shↄnli kre ŋmaa shↄ. 22Ŋgi na, Judae kawako kee chaa mbe nya, mbe chin mbe shↄ mbe li, a mblɛ pe n pe Judae pre na kachindɛ wie. 23La, Kristo ŋmba pra kan kanyana kumu kaan na, a u pe gbrontohaa mu Judae ŋga, a u kee pe jijiere kee mblɛ pe n pe Judae pan kre, wre kee o kpali kre. 24La, Judae, na mblɛ pe n pe Judae, a Nyiɛkpↄↄ pe yeeri kre, pre pan rɛ, kee kre Kristo wi, a wre wi Nyiɛkpↄↄ jaŋga, na Nyiɛkpↄↄ kachindɛ. 25Ŋgi na, Nyiɛkpↄↄ kee ŋga plɛ yeeri jijiere kee kre, ki kachindɛ wɛ lewo kachindɛ na, a na Nyiɛkpↄↄ pↄlɛ kruaa kre u faŋga wɛ lewo faŋga na. 26Ni wolo, e jawa imi e na nyi, a Nyiɛkpↄↄ na chin mu e yeeri. E chiɛri plɛ pra kala chin waŋgra haa, e kro ma e na pe jaŋgafɛɛnlɛ, a e kro ma pra se lebiile. 27La, yira ŋga leele jawa jijiere yira kre, Nyiɛkpↄↄ u ki wↄ, mu tia nyifɛɛrɛ kachimblɛ gbo. A yira ŋga leele jawa na ki pↄlɛ kuraa kre, Nyiɛkpↄↄ u ki wↄ, mu tia nyifɛɛrɛ faŋgafɛɛnlɛ gbo. 28A yira ŋga leele le yira waara, mu na jawa na yaka yira ma kuraa kre, kre Nyiɛkpↄↄ wↄ mu tɛɛ mu ŋga leele jawa na ki pe keshian yira kre kla. 29Ki tia ndro wa jaa uyɛ kpↄↄ Nyiɛkpↄↄ yiɛ. 30La, Nyiɛkpↄↄ u tia yire na Yesu Kristo pan mu pe nunu. A wre u tia Kristo pan mu pe o kachindɛ. U saara na, o fraka Nyiɛkpↄↄ yiɛ, mu pan mu pe Nyiɛkpↄↄ leele mblɛ pe pe cheche, a u o shↄ. 31Kena e ti o pe imi na pe ki nyunↄ Nyiɛkpↄↄ hlɛ kre nu tɛɛ mbo, "Ŋmba u chaa mbe uyɛ kpↄↄ kre, u uyɛ kpↄↄ kee ŋga Nyiɛkpↄↄ pe nu."

will be added

X\