1 Kake ŋko̱ ne̱ leŋpoo akɔɔre̱po̱ bwe̱e̱tɔ na bamo̱ ne̱ bo̱ tii si ne̱ Yudaa awuye e̱ te̱e̱ bamo̱ ɛ e̱bɔye̱ awaapo̱-ɔ a ba a bo̱ bo̱ nu Yeesuu ase̱ŋ. 2 Ne̱ Farisii awuye na Wuribware̱ mbraa akaapo̱po̱ ko̱ ne̱ bo̱ bo̱ mfe̱ŋ-ɔ a ko̱so̱ ba tɛɛ fe̱yɛ, “Ke̱e̱, ɔnyare̱ mɔ e̱ sa ne̱ abɔye̱waapo̱ e̱ ba mò̱ ase̱ hare̱e̱ mò̱ aa bamo̱ i gyi ateese.” 3 Mfe̱ŋ ne̱ Yeesuu a tɔwe̱ kitee mɔ gywii bamo̱. 4 “Mo̱n' taa fe̱yɛ mo̱ne̱ ɔko̱ de e̱sanne̱ ke̱rafa, ne̱ ɔ de̱e̱re̱ bamo̱ se̱ e̱fa-rɔ, ne̱ bamo̱ ɔko̱ ya fo̱, e̱me̱ne̱ ne̱ se̱sɛ-ɔ e̱ waa? To, ɔ yɔwe̱ adukpanɔɔ na akpanɔɔ ne̱ baa saŋ-ɔ a ɔ bo̱ sii ɔko̱ ase̱ ne̱e̱, na ɔ ya buwi kpa ɔko̱ŋko̱-ɔ bo̱ fo̱ saŋ ne̱ o ŋu mò̱-ɔ. 5 Mò̱ ya ŋu mò̱, amɔ mò̱ akatɔ a gyi na ɔ taa mò̱ bo̱ da abaakpa-rɔ. 6 Na ɔ so̱rɔ ya pe̱. Na ɔ te̱e̱ mò̱ nyare̱-ana na mò̱ akye̱nabɛɛpo̱ bo̱ gyaŋŋe̱ na ɔ tɔwe̱ gywii bamo̱ fe̱yɛ, ʻMo̱ a ŋu mo̱ sanne̱ ne̱ ɔɔ fo̱-ɔ, ne̱ mo̱ akatɔ a gyi, amo̱se̱-ɔ mo̱n' sa a ane̱ gyi akatɔ.ʼ 7 Mo̱ e̱ tɔwe̱ a n gywii mo̱ne̱ fe̱yɛ ane̱ŋ dɛɛ ne̱ Wuribware̱ na mò̱ mbɔɔ akatɔ i gyi ɔbɔye̱waapo̱ ko̱ŋko̱ ne̱ o nu mò̱ e̱ye̱e̱ na o kiŋŋi le̱e̱ mò̱ e̱bɔye̱-rɔ-ɔ se̱ a bo̱ kyo̱ŋ ase̱sɛ adukpanɔɔ na kamɛɛ ne̱ bo̱ yɛ bo̱ kyɔ ba bu Wuribware̱, ne̱ a mo̱ŋ tiri fe̱yɛ bo̱ be̱e̱ nu bamo̱ e̱ye̱e̱-ɔ.” 8 Ne̱ Yeesuu yɛ, “To, mo̱n' be̱e̱ taa fe̱yɛ ɔkye̱e̱ ko̱ de asare̱e̱-rɔ mpini kudu, ne̱ mmo̱-rɔ kako̱ŋko̱ ya fo̱, e̱me̱ne̱ ne̱ ɔ waa? To, ɔ kyaŋŋe̱ fetiraa ne̱e̱, na ɔ kpa pesi na ɔ kpane̱ mò̱ lɔŋ-nɔ pɛɛɛ ɔ de̱e̱re̱ dame̱naŋsɛ ɔ kpa kamo̱ ane̱ŋ-aaa, amɔ ɔ bo̱ ŋu. 9 Saŋ ne̱ oo ŋu-o, na ɔ te̱e̱ mò̱ nyare̱-ana na mò̱ akye̱nabɛɛpo̱ pɛɛɛ bo̱ gyaŋŋe̱ na ɔ tɔwe̱ gywii bamo̱ fe̱yɛ, ʻMo̱ a ŋu mo̱ kapini ne̱ kaa fo̱-ɔ, ne̱ mo̱ akatɔ a gyi, amo̱se̱-ɔ mo̱n' sa a ane̱ gyi akatɔ.ʼ 10 Ane̱ŋ se̱-ɔ, mo̱ e̱ tɔwe̱ a n gywii mo̱ne̱ fe̱yɛ ane̱ŋ dɛɛ ne̱ ɔbɔye̱waapo̱ ko̱ŋko̱ kpeŋ gbaa ya nu mò̱ e̱ye̱e̱, ne̱ ɔɔ le̱e̱ mò̱ e̱bɔye̱-rɔ, ne̱ Wuribware̱ a mbɔɔ-ɔ akatɔ i gyi mò̱ se̱-ɔ ne̱e̱.” 11 Mfe̱ŋ ne̱ Yeesuu a kya se̱ tɔwe̱ e̱bɔye̱ awaapo̱ e̱ye̱e̱ kunu ase̱ŋ. Ne̱ ɔɔ tɔwe̱ kitee mɔ gywii bamo̱ fe̱yɛ, “N gye̱ ɔnyare̱ ko̱ ya dɛɛ kye̱na aaa? Ne̱ ɔɔ ko̱we̱ ŋnyaŋsɛɛ ŋnyɔ. Ne̱ baa bo̱ waa ayaafɔre̱. 12 Kake ŋko̱ ne̱ mò̱ gyi kagyingyii-o a tɔwe̱ gywii mò̱ se̱ fe̱yɛ, ʻN se̱, ke fo̱ kapo̱tɛɛ-rɔ na fo̱ taa mo̱ le̱e̱ sa mo̱ mbe̱yɔmɔ.ʼNe̱ mò̱ se̱ a ke-ro sa bamo̱ abɛɛ anyɔ-ɔ. 13 Ke̱tɔ mo̱ŋ kyee, ne̱ kagyingyii-o a fe mò̱ kapo̱tɛɛ ne̱ ɔɔ nya-ɔ pɛɛɛ, ne̱ ɔɔ taa atanne̱-ɔ. Amo̱ fe̱raa, ɔ mo̱ŋ lɛɛ kye̱na pe̱, ne̱ oo tu kpa yɔ to̱ŋ ko̱ ke̱fɔ ke̱fɔ. Ne̱ ɔɔ ya gyi atanne̱-ɔ kanɔ-rɔ lo̱we̱. 14 Saŋ ne̱ oo gyi amo̱ pɛɛɛ lo̱we̱, ne̱ ɔ mo̱ŋ lɛɛ o de sɛye̱-ɔ, ne̱ ako̱ŋ dabe̱ ko̱ a ba swe̱e̱re̱ amo̱ se̱. 15 Sɛye̱ ke̱-mo̱ŋ-lɛɛ kide se̱-ɔ, ne̱ ɔɔ yɔ mfe̱ŋ a maŋ-ɔ kigyi ko̱ ase̱ ya kpa kusuŋ. Ne̱ ɔnyare̱ amo̱ a taa mò̱ fe̱yɛ ɔ de̱e̱re̱ mò̱ aprako si. 16 Mfe̱ŋ ne̱ ɔɔ yo̱rɔwe̱ fe̱yɛ ɔ de̱e̱ nya ateese ne̱ aprako-o i gyi-o gyi. Amaa aprako ateese amo̱ gbaa, ɔ mo̱ŋ nya ako̱ gyi. 17 Amo̱ fe̱raa bo̱ fo̱ saŋ ko̱-ɔ, ne̱ mfɛɛre̱ timaa a ba mò̱ kuŋu-ro, ne̱ ɔ yɛ, ʻN se̱ a ayaafɔre̱ ne̱ ba suŋ mò̱-ɔ pɛɛɛ e̱ nya ateese ba gyi ba kpo̱ne̱ na m bo̱ mfe̱e̱ mo̱ i wu ako̱ŋ. 18 Mo̱ i kiŋŋi a ŋ yɔ n se̱ ase̱, na ŋ ya tɔwe̱ gywii mò̱ fe̱yɛ, N se̱, mo̱ a waa Wuribware̱ na fo̱ bɔye̱. 19 Fo̱ ma lɛɛ te̱e̱ mo̱ ɛ fo̱ gyi, taa mo̱ bo̱ waa fo̱ ayaafɔre̱-ɔ ɔko̱.ʼ 20 Ne̱ ɔɔ ko̱so̱ me̱raa se̱ kiŋŋi ɔ yɔ mò̱ se̱ ase̱. Saŋ ne̱ ɔɔ fo̱ pe̱, ne̱ ɔ tɔ lɔŋ-nɔ-ɔ, ne̱ mò̱ se̱ a ŋu mò̱ le̱e̱ ke̱fɔ. Ne̱ mò̱ gyi-o ase̱ŋ a waa mò̱ e̱wɛɛ, ne̱ ɔɔ ŋwɛɛnaŋ ya powi mò̱, ne̱ ɔɔ kyo̱kywe̱e̱ mò̱ ke̱daabɔŋ se̱ sa mò̱ aŋsɛ na ke̱ba pwɛɛ ne̱ mò̱ gyi-o a dɛɛ ka mò̱ kanɔ. 21 Ne̱ mò̱ gyi-o yɛ, ʻN se̱, mo̱ a waa Wuribware̱ na fo̱ bɔye̱. Fo̱ ma lɛɛ te̱e̱ mo̱ ɛ fo̱ gyi.ʼ 22 Ne̱ mò̱ se̱ a sa ne̱ ɔɔ yɔwe̱ se̱ŋsa, ne̱ ɔɔ te̱e̱ mò̱ ayaafɔre̱. Ne̱ ɔ yɛ, ʻMo̱n' waa me̱naŋ taa awaagya timaa ne̱ n de-o baa bo̱ buŋ mò̱, na mo̱n' ba kapini bo̱ waa mò̱ ke̱sare̱e̱gyi-ro, na mo̱n' waa mò̱-rɔ ase̱be̱ta. 23 Na ŋkee mo̱n' kra kakpe̱ŋnyare̱e̱ ne̱ ka de mfɔ-ɔ bo̱ mɔɔ, na ane̱ gyi ateese bo̱ gyi akatɔ. 24 A le̱e̱ fe̱yɛ a du ne̱e̱ fe̱yɛ mo̱ gyi mɔ a wu, ne̱ ɔɔ be̱e̱ kyiŋŋi le̱e̱ lowi-ro-o. Ɔɔ dɛɛ fo̱, amaa mbe̱yɔmɔ, mo̱ a ŋu mò̱.ʼNe̱ baa le̱e̱ ba gyi akatɔ. 25 Amɔ ne̱ a yɔ se̱-ɔ pɛɛɛ na mò̱ daa ne̱ mò̱ fe̱raa a sii mò̱ se̱ ase̱ pe̱-ɔ bo̱ ndɔɔ-rɔ. Ɔɔ le̱e̱ ndɔɔ-rɔ mfe̱ŋ ɔ ba ɔ tɔ-rɔ-ɔ, ne̱ oo nu iliŋ na isoori si bamo̱ lɔŋ-ɔ-rɔ. 26 Ne̱ ɔɔ te̱e̱ ayaafɔre̱-ɔ ɔko̱, ne̱ oo bise mò̱ fe̱yɛ, ʻNte̱tɔ ase̱ŋ ya ba lɔŋ-nɔ?ʼ 27 Ne̱ ke̱yaafɔre̱-ɔ yɛ, ʻFo̱ tire ya kiŋŋi ba pe̱ ŋkpa na alaŋfiya-ro, ne̱ fo̱ se̱ a mɔɔ kakpe̱ŋnyare̱e̱ ne̱ ka de mfɔ-ɔ sa mò̱.ʼ 28 Ne̱ mò̱ daa-ɔ duŋ a fwii, ne̱ oo sii ke̱laŋbɛɛ. Ɔ yɛ ɔ maa lwee lɔŋ-nɔ. Bamo̱ a tɔwe̱ ke̱tɔ ne̱ ɔɔ tɔwe̱-ɔ gywii mò̱ se̱-ɔ, ne̱ mò̱ se̱ a le̱e̱ kawu ya ko̱re̱ mò̱ na o lwee lɔŋ-nɔ. 29 Amaa ɔɔ be̱ŋŋaa mò̱ se̱ ne̱e̱ fe̱yɛ, ʻKe̱e̱ nsu de̱maŋte̱ mɔ ne̱ mo̱ a suŋ sa fo̱ fe̱yɛ mo̱ a gye̱ ke̱nya-ɔ, ne̱ mo̱ a waa ke̱tɔ ke̱maa ne̱ fo̱ a tɔwe̱-ɔ. Nte̱tɔ gbaa ne̱ fo̱ a sa mo̱? Fo̱ mo̱ŋ mɔɔ kate̱e̱re̱gyii gbaa sa mo̱, na mo̱ aa mo̱ nyare̱-ana a wo̱ bo̱ gyi akatɔ. 30 Amaa fo̱ gyi mɔ ne̱ ɔɔ ya nye̱ra fo̱ kapo̱tɛɛ akye̱e̱ se̱, ne̱ oo kiŋŋi ba pe̱-ɔ fe̱raa, fo̱ a mɔɔ kakpe̱ŋnyare̱e̱ ne̱ ka de mfɔ-ɔ sa mò̱.ʼ 31 Ne̱ mò̱ se̱ a be̱ŋŋaa mò̱ fe̱yɛ, ʻMo̱ gyi, fo̱ fe̱raa, fo̱ bo̱ mfe̱e̱ saŋ ke̱maa, ne̱ mo̱ ke̱tɔ ke̱maa gye̱ fo̱ lee. 32 Amaa a bware fe̱yɛ ane̱ gyi akatɔ, bo̱ le̱e̱ fe̱yɛ a du ne̱e̱ fe̱yɛ fo̱ tire mɔ a wu ne̱e̱, ne̱ mbe̱yɔmɔ ɔɔ be̱e̱ kyiŋŋi le̱e̱ lowi-ro. Ɔɔ fo̱ ne̱e̱, amaa mbe̱yɔmɔ mo̱ a ŋu mò̱.ʼ” Ne̱ Yeesuu yɛ, “Amo̱ e̱ gye̱ saase̱bɛɛ.”
