Titus 3

1Nau-antaveriaing teing dakaning nantoong ovontung-koo boong otoroaina', siompaarima teing, amutemurii' tampeng nko-nko nko-koo maamuariri. 2Naning oraka' minkuaava' otoroai, turanturang baari'ai, banainge otoroai, ee'noko nantoong ookara-koo navurariri otorimaatoai. 3Ai' nii' Karistoo' bakaning teing tero o'noriko'na' sipampiru'ning aa'ning-eta: kanu'marima taarapiikamariko' ako'ke nii'ning ninka poo-antamaariko, amutemurii' karakaraa'koo bi'mariri doturotu besi'ampima. Niikaang batei tamung kera'pampiko' aa'ning-koo: oraka' noru' ee'noko mamairo, nantoonge munte'maariko napo' nii'ka munte'meerima. 4Teka tenang bakaang piaa ee'noko avusiro'ari oto' aarumo sira'puu'nang tee-koo batei-koo Kumponinge domamuru'. 5Teie domamuru'noo' nii' tee koonto'nuka o'nori kapoo' tampara nii'ka nkoampiru'nung-koo deea', teka baka bakaang piaa-eta duu'muri meeka'antamurima domamuru'nung, aa'noma napo' ponto'antamurima tee ninka Tanuaang Meekung neraka'antamuru'. 6- 7Ee', tee Tanuaang Meekung nii'koo dau mmau'antavui piampuu'nung tee-koo niikaang domang-anta Jiisuu' Karistoo'koo kuunge nii' Kumponing ninka naroong-antamurii'naang teie piaamurira, ee'noko barenku domaang oparavauka'nung-koong nempampimaung okomurii'naang. 8Tee-koo kapoo'koo nauansing-koo aroo'daravaing makosi da' Taitas. Da' tee teing-koo aing-koo kapoo'koo derarari otoo'naang piamomaang, dakaning nantoong Kumponing masika'antavaamaing kake'iiariri otoroo'naang tampara nko-nko-koo. Aing teing kapoo' boo'anta, nantoong ookara paku-antaning. 9Teka aing aa'ning-eta donta'dariri otoriai: niania' maku'paa'koo, pokapoka', boorou'ning biikaning mirinanka depeto parapara-koong minkunaa, ee'noko karakarai turang, Ju' biikaang toomonanka tata'eema. Ai' aing teing tamunsi'ning ee'noko naning pakuvuarupeu'. 10Naning tee nantoong-koo pokapoka' nkovuaing deeko' tautaueai ee'noko kemu'kai nkovuko deeko' napo' tautaueai; 11Teketa beemu'pinamu'koo tamung doonko sipeai tee, ee' noru'ei: Aung tee naning koompaa', oreng aarumoi maanto', baka tuutunamparing. 12Tenang ninge tenaanka Atemasi naanka ee'noko Tikikas da'anko botoampeko tampa' aa'na' paarararavaing ning kune'koo teka Nikopolisia, ai' ning tee tenang kamaari bakanang teke oto'koo darumari o'nong. 13Napo' aa'na' pia-antaveriaing dakanavitu teinge tampa' neriaareaing tenaanka aa'noko tee boto nau-anta Siinasi ee'noko Apolos paku-koo beekaang nanunanu'koo. Ee'noko kokoiravererima beekaang nanunanu'koo makosining mooni' averereriaing. 14Ee'noko tee' pakuaarema noru' nkavaavai kake'iiariaina' tampara nko-nko nko-koo, baata teing aa'na' piaaru'nuka pakuaarimaatoaina', ee'noko biikaang otooto' sinampo'nung deempari otoaing. 15Aing ookara nii' ninka nari' o'norimainge biikaang tampa' tang dii'anko botoaamang. Niikaang tampa' tang nauereriaing teing nii'marang baito-koo kuunge. Tee biraanke tee dii' ookara ninka otomatoaing. Ee', tee' nari'.

will be added

X\