Romans 7

1Dii'ke mmaikori'ke boto-koo norukasi'nukai noru'eri otong teie botoi tee naning kuung deempui otomaung tenang tee naning domampari otoko. 2Tee-pina' nani manikuma nampeesinii' botoi naro' tapo'uresi otoremana' ba'ung ninka tenang ba'ung domamparitaa'. Teka tenang ba'ung booko dei teni unaavopeu' teieta boto teni dai'ui otomaung-eta ba'ung-koo. 3Tee'koo teni manikuma nii'nung ninka otoresi dei tenang ba'ung booaruko teni tee nampeesi orari tang-koo makosi. Teka ba'ung booko dei, siraraavi' otoi boto-ita, nii'nung ninka nampeesiarepeu', tenie nampeesi orarivua'. 4Tee' ee'na' nari' dii' tee' otoring mmaikori'. Boo'koo teie nari' dooru' tee' botoi minkuvui otoina'koo ai' dii' teing Karistoo'koo mono-koonamenuka. Enang tee dii' tee bakaning deentariri otoring tee boo'keta domamparu'nung nii'ke sinang Kumponing bakaang bi'antaevompiaina'. 5Tero tee, orara aarumoi dai'muritaa' Kumponing-nung boto toto'koo pia-antamuriko' ee'noko tee'koo kapoo' oraka' nkonanka mmau' nkoampiko', teing kapoo' nii' boo'anta-koo makosinanka. 6Teka enang nii' unaamori o'noring boto-ita moompira tee-koo kapoo'koo nii' dai'muri otoko'nung-koo. Tee'koo enang Kumponing mintoompevompiri o'noring urikung botoi Moosesie daarivuu'nunge deea' teka tee-koo nerakung otooto'koo Tanuaang Meekung-etaing-koo. 7Enang are'pampipeu' nii'ke? Tee boto ee orara? A, tee aa' tee' deea'. Nka tee boto otoaruko dei orara aarumo enang ninge tasi'pamparupeu'. Ee'pina' deeko': Botoi ee' naumurimaung: Naning nii'nung bakaang kapoo' karaa'uauka'. Ee'noko tee' naumuaruko dei tee' oro' karaa' orara-pina' noru'amparupeu'. 8Teka teie botoi tee orokomuio' orara aarumoi doona oovura tee boto-koo ning karaa'antamuko', nka orara aarumo tee baka boto otoaruko dei purimparavarupeu'. 9Ning tero domang kuaa'moi o'noko' mme' boto noru'ampa', teka tee boto noru'amira ee'namu' orara aarumo domamparako ning moontu'. 10Teie ee'narai narunge botoi ning domang-antamuu'naang noru'anko'nunge ning boo'antamuu'. 11Orara aarumoi doona oovura tee boto-koo tosimuko' ee'noko teie botoi tamuu'. 12Tee'koo ookara Moosesi-nung boto tee meekung, ee'noko tenaare tamuu'naare tenaarei meekanaarei koompari tampa' oto'naare. 13Nka arekee', botoi tamparai tamuu'nung tampamang, ee? A, tee aa' orara aarumo okora'ario' botoi tamparai ning tamuu'nung tampamang. Teie botoi tamparai tee naumumaung masika' oraka' nkomaramaung. Enang napo' orara aarumoi tamuu'nung tasi'pamira masika' noru'ampeu' tee orara aarumo tee bakei orara masikung. 14Nii'ke noru'ampiri otong boto tee kapoo' tanuaanavete-koong, teka ning mono boo'koong, orara aarumoi dai'nii'. 15Nkaang nko-nko tampa' noru'ampaunge, tee kapoo' tampara nko-koo piamomaung tee nkoampaung, teka tee kapoo' orara tampamaung nkoankoo'. 16Teka tenang ninge nkoama tee kapoo' piamoaung tee boto tampara tampamaung-pina' otong. 17Tee' nari' tasi'pamaung ninge masikunge tee nkoampa', teka tee orara aarumo ning-koo otoko ninge tee' nkoamaung. 18Ninge noru'ansi otong kapoo' tampara ning-koo otoa' ninka. Kapoo' tampara maroamira nkoamparupeu'. 19Tee kapoo' tampara ninge nko-koo piamomaung tee ninge nkoampa', teka tee kapoo' orara ninge nko-koo piamoaung napo' tee ee'nara nkoankoo'. 20Enang tee ninge kapoo' ning piamoaung nkoama tasi'pamaung okora'noo' tee orara aarumo ning-koo ima'ari otong, ning masikung deea'. 21Tee tee orara aarumo-koong iri' tee' nari' oro'paramaung. Tampa' nko-koo piamoko orara aarumoi diku'mui otokoo'. 22Pankaruntoonge Kumponing-nung boto karaa'amaung. 23Teka nkaang mono-koo oomaramaung nii'nung kapoo' karenung otong tee ninka nkaang onou ninka. Teie dai'mui otomaung orara aarumoi ning-koo mono-koo otomaunge. 24Tee tee tee' pina' nari' o'noi o'noaing noru'anko', aa'noko, ninka tee ninge Kumponing bakaang boto tamung onoue siompama ee'noko mono-namenge orara aarumo siompamaa'noaing. Bakei piaaru' ning. Baie diki'muainge teieta' aung mono boo'koong-eta? Tee'panko'na'; 25Nka enang tampara tampamang Kumponing-koo, Jiisuu' Karistoo' niikaang Ovoringe boo'parama diki'memuio'.

will be added

X\