Romans 6

1Nka ee' noru'ampiauka', “Orara nkoampimatoaing Kumponing bakaang piaa pankainge piaamuriaina'.” 2Bakei makosi deea'! Ai' nii' teing Jiisuu'koo kuunge moompirining deemariritaa' orara nko-koo piamoria', ai' arekee' napo' toromarii'naang? 3Ee' noru'eriaing: Nii' teing Jiisuu' Karistoo'koo o'nori ntong-koo minkie meeka'antamariru' ning bakaang boo'koo kuung minkinisinuka. 4Tenang ntong-koo minkimarira meeka'antamariru' tee miru'noo' tee-pina' nii' nari' moompiru' ee'noko napo' nari' dako'maaru' Karistoo' ninka. Tee tee' nkoaru' tee, Niumai domang-antavuu' bakaang iirakutai. Nii' teka nari' domamuru' nantoong nerakupoong o'norii'naang aampari'marira niikaang aarumo-koo. 5Teka nii' Karistoo' ninka narung deeng-antamarima nari' moompiru'ning deemariritaa' tee' nari' Karistoo' ninka boo'keta nerakung otooto'koo o'noriaing. 6Nii'ke noru'ampiri otong niikaang urikung aarumo tee ninka nari' dupisi'au' aa'barata'koo~ tee niikaang orara aarumonanka teke bakearaa'naang ee'noko enang tee orara aarumo-koo bi'mariri o'noriauka'nung napo'. 7Davorue tee orara aarumo napo' nkovuarupeu'. 8Teka nii' Karistoo' ninka nari' moompiru'ning deeko' nii'ke masika'antavampiri otong nii' teing tee ninka nari' domamariaining. 9Nii'ke tee noru'ampiri otong Karistoo' tee domamparu'nung boo'noo'keta ee'noko napo' booauka'nunge; enang tee boo'ke kuung deempua'. 10Tee boo' tee boo'paru'nung tee niikaang oraka' nko-koong iri' bake-anta-koo, boo'paru' totora'pui. Teka tee enanung otooto' tee Kumponing-koo domampari otong. 11Dii' tee' nari' noru'dariainge: Oraka' nko-koo dooru'ning ee'noko napo' domantaririning Kumponing-koo Jiisuu' Karistoo' ninka. 12Tee'koo taura'dariauka' orara aarumoi kuung deeng-anta-koo diikaang mono. Teie orara aarumoi baranturi'neenga mono bakaang karakaraa'ke. 13Diikaang mono-koo nii'nairu taura'periauka' orara aarumo bakaang pia-siong deemparama orara nko-koo, teka dii'ka arariaing Kumponing-koo teing-pina' nantoong boo'keta domang-antanii'nuka-pina', ee'noko dii'koo ookanairu Kumponing bakanairu deeng-antaveri otoriai aarumo koonto' siong-koo. 14Oraka'nkoi kuung deenturiauka' dii' boto-koo kuung otoriaung-koo Kumponinge piaa-koo kuung otoriko. 15Nka tee boto-koo kuung o'noria' oraka'nko nkoampiauka' aa'pampima, “Nii' aa' boto-koo kuung o'noria', nii' Kumponing bakaang piaa-koo kuung o'nori oraka' nari' nkoampiaing.” Tee' minku-koo bakei makosi deea'. 16Dii'ke ee noru'eria' baa dii'ke meumperimaung tee diikaang ovoring, ee'noko dii' teing bakaning botovotonaa'nuka, aa'noko oraka'nko meumperiaing deeko' boo' kune'eriaing, ee'noko Kumponing meumperiaing deeko' tampara domaang kune'eriainge. 17Tenang tutung tee dai'dariri otoriko' orara aarumoi date'durio', teka enang tampara tampamang Kumponing-koo dii'ke tampa' meumperimaung-koo tee Ovoring bakaang kara nauraario' masika'antaverimaung. 18Teka enang Kumponinge unaa-antarurira orara aarumo ninka dai'dariri otoriko'noo'keta tampara aarumoi dai'dariri oto'nuka deeng-antaruring. 19Aing aarumo kementavario' minkuansing naninka botovotonaa'ka-pina' dii'koo tampa' siraka'paraa'naang. Nka ee' minkuamaang: Tee' taura'dariru'na' aa'na' ku'mi'koo ee'noko orara-koo tee' nari' napo' aa'na' iri'dori taura'dariaing te'aape koonto'aape ee'noko kiiroraa'aape. 20Tenang dii' orara aarumo-koo dai'dariri tee tara'doria' otoriko' koonto'nameng-koo. 21Nka aremurii' kapoo' dii'koo tavo'arako'nung teieta orara aarumo-ita enang maia'dorimaung-eta'? Tee aa' kapoo' boo' tavo'kumaing. 22Nka enang tee Kumponinge unaa-antaruring orara aarumo-ita bakaning botovotonaa'nuka deentarii'naang. Enang deto du'duriaining meeka'dariri domaang oparavaung nkaveriaina'. 23Orara aarumoi tee moo' avu'koong, tee boo'. Ee'noko Kumponinge tee bauta'muriaing teie domaang oparavaunge Jiisuu' Karistoo'koo kuunge, niikaang Ovoring.

will be added

X\