Romans 5

1Tee barenku masika'antavampirio' Kumponinge koonto'nuka tammurimaung. Tee'koo Jiisuu' Karistoo'ke pakumurio' enang mooa-koo o'noring Kumponing ninka. 2Jiisuu'ke tee Kumponinge tampa' oomurimanoo' basi-antamuru' ee'noko dotumarimaung nempampiritaa' Kumponing-nung meenasi kong-koo. 3Baru'noo' tee dotumarimaung sisikeeramorima ee' noru'ampima: Sisikeerai tee iveka'antamurimaung orara puru'koo. 4Ee'noko iveka'mariko makosi-antamurimaung. Makosi-antamuriko masika'antavampimaung kapoo' tampuu'na' nkoaravaing. 5Ee'noko masika'antavampima munte'moriarupeu' nempampima, ai' teie Tanuaang Meekunge, Kumponinge amuru'nunge Kumponing-nung piaa nii'koo koo'uu' niikaang domang-koo. 6Tenang nii' aruaru'mori o'noriko, Karistoo' batei baumai miru'uu'nung-koo boo'paru' Kumponing noru'aavaing-koo. 7Nantoong baru' booroaung nii'ning pari'anta-koo, bane tampeng-koo. A'noo' naninge dee'ma aroo'upeu' naning tampara-koo boo'koo aa'na' piaavoma deeko'. 8Nka Karistoo' bakei nii' nantoong oreng o'noriko boo'paru'nung-koo Kumponinge bakaang piaa aa'na' deto basi naumurimaung. 9Enang aa' tee nii' bakaang erenge naroong-antamurining deemariko enang makosi moo'muriaing koonto' kiimata-ita. 10Tenang napo' nii' kare-nupoong o'noriko napo' bauring boora navu-antamuru' Kumponing ninka. Enang tee nii' navunavuro'nuka deemariko makosi nii' koonto' domamuriaining bakaang domaange. 11Ee'noko tee narung deea'. Napo' nii' dotumarimaung Kumponing-koo niikaang Ovoring Jiisuu' Karistoo'ke pakumurio', teie ee'narai osikoimuru'nunge. 12Enang noru'eriaing tee aung taa'ni'anta. Narung naning oraka' nkoario' bakaang oraka'nkoi nantoong karika' orari-antavuru' ee'noko teie orari-antai tee boo' basi-antavuu' nantoong kansi'koo-nupoong-koo. Ee'noko tee teie boo'ke ootukunung kuung deempuru' ookara oraka' nkoaririo'. 13Nii'ke noru'ampiri otong Aadama bakaang oraka'nkoi tavo'antavuu' tee. Teka tee'koo nantoong oraru'kiaako' Aadama bakaang batei-eta bera Moosesi bakaang batei-koo basi. Kumponinge tee boo'koo tampuriaruko' boto toto'paako, ai' bakaang boto mme' avuria' teing. 14Tenang biikaang mono booroma biikaang oraka' nko-koo booroaruko', teeo Aadama bakaang-koo booroko'. Teinge toto'paava' tee boto Kumponinge Aadama avuu'nung tee sinang orokonii' maa'koong. Aadama tee uu'aa'pina' tee Domang-anta Tavo'aravaing-koong. 15Nka tee, nari' oro'ka deea' Aadama bakaang oraka'nko ee'noko Kumponing bakaang piaae nantoong tampa'nko. Narung bakaang oraka'nkoi boo' tavo'antavuu' nantoong mmau'koo, nka aunge narunge Jiisuu' Karistoo'ke baru' puru'uitaa' tonta'anta bauta'pina' deto basi tavo'antavuu' mmau' nantoong-koo teie Kumponing bakaang piaae. 16Kumponing bakaang bauta' tee, narung bakaang oraka' nko-nko-koong sinang-pina' deea'. Namu'ke boto toto'pui Aadamai boo'koong kiimata pare'uu' nii'koo ookara-koo. Teka Kumponing bakaang bauta' tee, niikaning oraka' nkonanka mmau' pau'ariko amuru'nung, makosi-antamurima nii' Kumponing ninka nari' naroomariri o'noriii'naang domamariritaa'. 17Narung naning oraka' nkoarara ookara nantoong boo'parimaung. Teka enang napo' nii'nung narung-koo tee-koo Jiisuu' Karistoo'koo Kumponinge deto basinoo' tampa' nkomurimaung niikaang oraka' nkonanka tamung tonta'memurima. Ee'noko tee'koo nii' koonto'nuka tammurimaung. Ee'noko teing tee bauta' nkavaavaining Kumponing-nung teing ee'ning ovontumpariri otoroaing ee'nara ninka narung ninka Jiisuu' Karistoo' ninka. 18Tee tee ee' otong: Ookara nantoong kiimatavariaing oraka'nko nkovuu'nung-koo, napo' tee' nari' Kumponinge nantoong koonto'nuka tampuriaing ee'noko domampariai nii'nung narunge tampara aarumo nkovuu'nung-koo. 19Ee'noko tee'koo napo' nantoong karika' orara aarumo nkonuka deempariru' teie naninge Kumponing siompuarura, ee'noko napo' tee' nari' nantoong karika' tampara aarumo nkonuka deempariaing Jiisuu' Karistoo'ke Kumponing tampa' siompuu'nung-koo. 20Kumponinge boto avuru' biikaang orara aarumo pankaing tasi'paava'naang. Ee'noko orara aarumo aa'na' sira'pario' ooampima tee' nari' Kumponing bakaang piaa deto basi napo' sira'pario' ooampipeu'. Ookara oraka'nko tonta'memurimaung teie. 21Tutung tee oraka'nkoi kuung deempuri otoko' ookara nantoong, ee'noko boo'nameng-aape sipuru'nung, teka enang Kumponing bakaang piaae taremurimang aarumo koonto'koo kuung deemuri, bera domaang oparavaung-koo tavo'muriaing tee-koo Jiisuu' Karistoo' niikaang Ovoring-koo kuunge.

will be added

X\