Romans 4

1Io' Kumponinge Eebaraami' bire'uu'na' noru'eriaing, ai' tee mono-nameng-koo tutuntomaa nii' Ju'nupoong niuma. 2Arekee', bakaang nko-nko tampara-koo Kumponinge naning koonto' tampuu'nunge? Tee'koo deeko' tee daangamparapeu'nung. Nka tee' deea'. Kumponing-koo uro'kanoo'ke daangamparavarupeu'. 3Ai' Daari Meekunge tee ee' minkuvui otong, “Eebaraami'ke Kumponing masika'antavuko Kumponinge tamung naning koonto' tampuu'.” 4Naning tee nko-nkoarakotaa' bakaang moo' nkavuaing. Tamung bauta'pina' tang-koo makosi deea', tee bakaang nko-nkoi moo'. 5Nka naning tee Eebaraami'pina' bakaang nko-nko tamung doonko noru'ui Kumponing bakaang piaa masika'antavupeu'nung aa'puma: Teie oreng koonto'nuka deeng-antavurimaung bakaang duta-koo, Kumponinge tee ee'nara naning koonto' tampuaing bakaang masika'anta-koo. 6Tee-pina' napo' Deevita'ke minkuvuu'na'pina' naning bakaang doturoto-koo Kumponinge koonto' tampuainung boto siona' otoko. Aa'puu', 7“Biraankeariaining teing biikaang boto-toto' tonta'evuriaining ee'noko teing biikaang oraka'nko tamung doonko daka'pevuriaining. 8“Biraankearavaing tee naning bakaang orara nko-nko-koo Kumponinge tampuauka'nung.” 9Tee baa Deevita'ke biraankenung tampuu'? Ai' nii' Ju'nupoong dopa' toto'marimaing tee' minkumuru'nunge, teing Ju'deeaing ee naro'ka deea'? Otoa', ookara naro'ka. Tero naurampiru' Eebaraami'koo Kumponinge koonto' tampuu'nung bampuu'na' masika'antavuko. 10Arenang koonto' tampuu', ai' dopa' toto'pario' ai' mme' toto'paravaruko? Dopa' toto'pario' deea'. Mme' toto'paravaruko Kumponinge koonto' tampuu'nung. 11Ee'noko tee dama'ke Kumponinge nauvuio' dopa' toto'paru' taa'ni'anta-koo. Teie taa'ni'antai aa'pumaung: Aung naning Kumponinge koonto' tampuu'nung teie masika'antavuko toto'paravaunge. Tee tee, Eebaraami' nantoonge biuma deemparu'nung dopa' toto'pariainge masika'antavaako Kumponinge koonto'nuka tampurimainge. 12Ee'noko napo' tee' nari' biuma teinge nantoong dopa' toto'paririninge. Nka tamung boturopa toto'paririning deea', nka teing naing Kumponinge koonto'nuka tampuru'ning Eebaraami'pina' Kumponinge bampuru'na' masika'antavaako, tero dopa' toto' nkavua' masika'antavuko'na'. 13Kumponinge barevuru' Eebaraami' bakanavitu ninka depeto ookara kansi' okovoroo'naang. Kumponinge barevua' Eebaraami' botonang siompuu'nung-koo, teka Kumponing masika'antavuko naning koonto' tampura barevuu'. 14Nii'ke ee' minkuampiri dei: Moosesi bakaang boto siompaamaing naing oko-antavuriaing tee barenku daamaripeu'. Tee' ee' minkunii': Masika'antai tee kapoo' basi-antavuarupeu' ee'noko Kumponinge bakaang maraka-anta tee daang-koong. 15Teka teing boto-koo noru' sipaamaing teing tevung boto sionavung kaari'aama Kumponing bakaang iira narung ooaavaing, ai' naning otoa' tee boto keperuu'ui tampa' tarevupeu'nung. 16Kumponinge tee, tee biraanke nii'keta paa'aravaroo'naang piavora tee biraanke bauta' deeng-antavuu' nii'ke nka-koo masika'antavampima. Tee'koo Eebaraami' bakanarempo'kai ookenge kompaavaing tee barenku, teing tee boto siompaamaing naing deea', nka teing nii'ning napo' barenku masika'antavaamaing ninka nari' Eebaraami'pina', tee nii' ookara niuma. 17Kumponinge Eebaraami' nauvuu'na', Daari Meekung-koo ee' daariari otong, “Da' tee ninge enang amutemuu' muu'ke biuma deeng-antaransing.” Aung kara koonto' Kumponing-koo uro'kanoo'ka taaravuu', bakaang-koo Ovoring-koo masika'antavuko'nung-koo tee boo'nuka domang-anta ee'noko kapoo'nanka otoroaing karai tavo'anta. 18Kumponinge nauvuu' Eebaraami', teie narung bauring donkaani avuu'naang tampuu' ba'dompenku mmau' deeng-antavuriaing ee'noko pankavitu deempariaing. Ee'noko Eebaraami'ke masika'antavuu' Kumponing, bane tee aung kara makotuaung-pina' oro' nauvuko. 19Barenku masika'antavui kara dua'ua', bane mono pankara noru'arama boo'koo makosi, bane tee bakaning mare' daaku'koo due'ari otoing ee'noko bane ba'aang Seera' bisiirai. 20Nii'nung noru' konte-pina' oro' tavo'arava' Kumponing-nung barevare-koo, teka aa'na' purimpari masika'antavuko' Kumponing daangampuma. 21Koonto' tasi'pari noru'uko' kapoo' Kumponinge barevumaung tee makosi nkovuaing. 22Tee'koo ee'na'koo Kumponinge koonto' tampuu'. 23Teka tee kara Kumponinge koonto' tampuu'nung Eebaraami' baka nau-anta-koo daariarava', teka nii'koo napo'. 24Kumponinge napo' nii' koonto'nuka tammuriainge masika'antavampiko tee napo' domang-antavuu'nung boo'keta Jiisuu' Karistoo', niikaang Ovoring. 25Tee ee'nara Kumponinge taura'puio' boo'paru' niikaang boto-toto'koong kiimata nka-koo, ee'noko Kumponinge napo' daa'uu', tee' masika'antavampiko Kumponinge nii' konto'nuka deeng-antamurii'naang.

will be added

X\