Romans 3

1Aming nkoaravai naning Ju'koong deemparako? Dopa' toto'ke arekee', pakuvuai? 2Ee', moo' pankaing amutemurii' otong. Tutuntoma ee': Ju'nupoong-koo Kumponinge kinkompuu' bakaang karakara. 3Kinkompuio' nii'ninge masika'antavaava' tee kara. Enang arekee', teinge masika'antavai meumpaavaruko Kumponinge koonto' masika' bampuu'na' nkovuai? Ai' tee' napo' teing-pina' nari' meuntepa'aravai? 4A, tee' deea', bakei! Kumponing tee masika'pari otoaing, bane nantoong ookara tosiariko. Daari Meekunge ee' minkuvui otoina', “Dakaang kara masikung deemparaa'naang tenang da' kareko, ee'noko tuutunantaako boong deempee'naang.” 5Nii'ninge bii'ka matauarima tee, daang ee' minkuaamaung, “Nii'ka meuntepa'marimaung-koo Kumponing-koo oraka' otoa', ai' nii' oreng oomaarima nantoonge Kumponing bire'ario' aa'na' tampara ooaako teie nii' kiimata-koo makosi deea'.” 6A, tee aa' tee' deea', bakei! Ookara nantoong Kumponinge kansi'nupoong simpe'uriaing kiimatavurima. 7Nii'noo' naninge aa'mupeu', “Io' noru'eai: Nkaang tosiro'ke Kumponing pankaing-antavumaung tasi'anta-koo Kumponing bakei masikung. Tee'koo ning boo'koo miru'muauka'. 8Aming-koo potemerimaunge oraka' nko-koo? Tee tee tee' nkomariko kapoo' tampara basiarapeu'.” Nka tee teing nantoong temurii' kara minkuaamaing teing boo'koo miru'nii'nuka te' minkunii'na'. Nii' Karistoo'navitu kara tee' oro' minkuampiaing. Tamung nii'ninge tee' tuumpimaarimaung. 9Enang arekee', nii' ee Ju'nupoong Ju'deeaing-koo deu basinuka? Bakei koonto' makotua'. Ninge tee, tero naurampiring nii' Ju'nupoong ee'noko Ju'deeaing ookara nari' o'noring oraka'nkoi naro'ka kuung deemuri otong. 10Tee' daariari otoina' Daari Meekung-koo, “Naning tampara otoa', narung duukung otoa' bakei. 11Narung noru'po'nung otoa' Kumponing besi'umaung. 12Ookara dama'du-aape bere'ariring, oroo'ke nari' beroing. Narung naninge tampa' nkovua'. Narung duukung otoa' bakei. 13Kara orara biikaang karang-eta tavo'aramaung davoru-koong ka'mi' kuvi dako'doma-eta tavo'aramana'. Biikaang meneng tositosi-nko. Biikaang kara boru'ketaing dopa-pina' beruu'keta tavo'arakoo'. 14“Biikaang karang barakosi'ke maanto' naari-anta ninka. 15Teing dupisi' namu'ke nkonanka. 16‘Taung tooreere navung siompaamaing nantoong oraka' dee'antavaarima. 17‘Ee'noko mooa-koonavung taung noru'aava'. 18“Kumponing noru'aavarukoo', avoreaava'.” 19Tee'koo Kumponinge baru'noo' kiimatavuriaing Ju'nupoong deempariko ai' teing teing makosinuka Kumponing bakaang boto meung-koo, teka meumpaava' teinge, oreng aarumo oraka'nko nkoaama. Nii'nung teing-koo aa'maio'aravauka'nung. Ee'noko teing naing deea', ookara kansi'nupoong tee kareaavauka'nung tuumpivuriko Kumponinge. 20Naning otoa' Kumponing bakaang boto siompuma koonto' tamparavaing, ai' boto tee nantoong ookara oreng tasi'anta-koo miru'nii'. 21Nka tee enang nii'navung sira'paring nantoong koonto'nuka deemparipeu'navung Kumponing-ankoi, botoi deea'. Tevung tevung tero teie botoi ee'noko nakaro-nupoonge nari' minkuau'navung. 22Ee'noko tee tevung enang sira'parinavung ee' oro'navung: Teing Jiisuu' Karistoo' masika'antavaamaing Kumponinge koonto'nuka tampuriaing, ookara tee' nari'. Tankatankaang otoa'. 23Aming-koo, ookara nari' oraka' nkoarima kaari'arikoo' Kumponing bakaang meenasi kong-koo. 24Nka tee enang nii' ookara naro'ka koonto'nuka tammurining tamung bauta'murima, Jiisuu' Karistoo'ke niikaang kiimata nkavura moo'murio' bakaang erenge. 25Kumponinge Jiisuu' botovuu' tee' nko-koo ookara-koo dutakanoo'ke tee masika' antavampiko tee ninka naroong-antamurii'naang, ee'noko napo' nau-antamurii'naang tee Kumponing tee aarumo koonto'koo okora', ai' tero-nupoonge oraka'nko nkoaako tee mii'kui tamung doonko oovuriko' kiimatavuria' Karistoo'ke mero' kompuaing noru'uitaa'. 26Ee'noko nii'ke enanupoonge tasi'pampii'naang piavoing Kumponing tee aarumo koonto'koo okora' ee'noko nantoong koonto'nuka deeng-anta teing nantoong Jiisuu' masika'antavaavaining. 27Enang ee nii' daangamaripeu'? Makotua'. Aming-koo makotua'? Tee aa' tamung masika'antavampiko koonto'nuka tammuru', tampara nko-nko-koo deea'. 28Nii'ke tee aa'pampimaung: Kumponinge naning koonto' tampuma tee bakaang masika'anta oovura tee' tampuaing, bane Moosesi bakaang boto noru'ua'. 29Kumponing ee Ju'nupoong naing biikaang, ee'noko Ju'deeaing ninka nari' deea', ee? A, ookara biikaang, ai' tee tee Kumponing narung masikung. 30Ee'noko tee narung masikung deemparitaa' navunge taunavunge ookamurira koonto'nuka tampuriaing teing domampuripeu'nung-pina' masika'antavaako dopa' toto'nii'nuka ee'noko toto'pariaing nari'. 31Enang ee masika'anta-koo minkuampima boto dua'ampimang? Otoa'. Boto tee aroo'ampiri minkuampiring.

will be added

X\