Romans 2

1Ee' masika', dii'koo narunge tee aa'pupeu': Teing bakei oreng dake ning naumemaing. Teka io' noru'eai mmaiko': Da' tee' nari' oro'ke, teing-pina'. Teing dake aa'perima: Teing oreng, kiimatavariaining, tee' minkuema tee, da' nari' teing ninka minkuraramang da' tee' nari' nkoraramaung-koo. 2Dake aa'pepeu': Nii'ke tee noru'ampiri otong tee Kumponing-nung kiimata makosina' tavo'aravaing teing-koo nantoong-koo temurii' kapoo' nkoaamaing-koo. 3Nka ninge ee'pina' nauramaang mmaiko': Nka dake teing naing tuumpierimaang dakanoo' noru'darava' tee' nari' nkoraramanoo'? Dake ee' noru'emaung ee: “Ninge baari'ampaing Kumponing bakaang kiimata.”? 4Teie aa'na' piaaruma da' pankaroong kiimatarua', boimpui nentumang bere'daraa'naang dakaang oraka' nko-ita, ee'noko noru'ea' otong ee? 5Tee dakaang domang ivekung bere'daravaunge mmau' deeng-antavemaung tee iirananka Kumponing-etananka, ee'noko tee oro'paravaing asirana'mung bakaang kiimata koonto'nanka sira'puaina'mung. 6Teie tee moo' avuriaing ookara nantoong biikaang nko-nkoi siompui otoina'. 7Teing nantoong tampa' nari' nkoaamaing ee'noko besi'aakoo' tee meenasi Kumponing-etaing, pankaing-anta, ee'noko domaang boo'paa', teie teing domaang tampa' nari' oto' avuriaing. 8Teka teing turang nkoaamaing ee'noko kara masikung siompaavarukoo' ee'noko orara aarumo siompaakoo' teing tee Kumponinge aa'na' iiravoitaa' tavuriaing. 9Kune'aavaing teinge tee pore'anta orarunsi ninka ookara nantoong oraka' nkoarimainge, tutuntoma Ju'nupoong ee'noko napo' dama'ke Ju'deeaing tee' nari'. 10- 11Ee'noko tee meenasi, miring pankaing ee'noko mooa kompaavaing teinge tampa' nkoarimainge tutuntoma Ju'nupoong ee'noko napo' Ju'deeaing, Kumponinge nari' basinoo'ka noru'urimaung-koo. 12Teing nantoong oraka' nkoarimaing Moosesi-nung botoi kuung deempuriaruko kera'anta kune'aavaing, bane tee noru'aava' nkoaamaunge. Ee'noko teing teie botoi kuung deempurio' oraka' nkoarimaing tee teie botoi simpe'uriaining. 13Naninge tee, tee boto taaravupeu' nka tee siompuarura Kumponing-ankoi koonto' deemparavarupeu'. Teing mutero'aamaing naing koonto'nuka tampuriaing. 14Nii'ning Ju'deeaing Moosesi-nung boto oto'evoroaing, nka tee bii'ka matauai tampa' nkoaako tee, noru'ampipeu' teinge tasi'pai otong tampara aarumo bane Moosesi-nung boto noru'aavainge. 15Tee matau biikaang tampa' ooampira noru'ampipeu' kapoo'nanka botoi minkuvui otoining teing-koo biikaang domang-koo daariari otong. Ee'noko biikaang domange nari' masika' onouaakoo'. Tasi'pari otong biikaang noru'ke nii'ning namu'na' tuumpivurikoo' ee'noko napo' namu'na' pakuvurikoo'. 16Tee'koo, teie doorenang tamparai minkuvui otoina' ninge sira'pamaunge, tee' nari' nkoaravaing te'mung asi'na'mung Kumponinge Jiisuu' Karistoo'koo kuunge koong-antavuriaing biikaang aarumo makensi'ning noru'uitaa'. 17Enang tee da' Ju'nupoong-koong tantarama Moosesi-nung botoi pakuruio' da' Kumponing bakaang naning tantarama daangantaramaung deeko', 18ee'noko tee boto-koo barerararai'nange Kumponing-nung pia noru'ei otoing deeko', 19ee'noko simpe'epeu' kapoo' orara ee'noko tampara, ee'noko da' naning mutuu siong-anta deeko', ee'noko araka teing-koo mutaanang-kooning-koo, 20napo' nau-antai amakoori-koo, ee'noko kake'ii-anta toire'koo deeko', ee'noko kompei otomaung noru' masikung kinkompario' tee boto-koo kuung deeko', 21da' nantoong nau-antaverimaung daka ee nau-antararava' otong? Da' bakiaa'koo daankirarama poteverimaung, arekee', bakiaa'kiaunge? 22Nampeesi orari-koo poteverikoo'. Arekee', daka nampeesi orarieaunge? Kumponing tositosinanka maremaarenanka tamperikoo'. Arekee', maareroa' teing-koo pakuraramaung ee? 23Bakei daangantaramaung tee boto tampa' noru'ei otoing tantarama. Arekee', Kumponing-nung miring dua'antaveaung ee tee boto toto'pema? 24Daari Meekunge tee' nari' minkuvui otong, aa'pumaung, “Dii' Ju'nupoong oraka' otoriko tee'koo Ju'deeainge Kumponing oraka' minkuaamaung.” 25Dopa' toto' tee Kumponing-nung taa'ni'anta masikung tampa' taaraveri dei tee boto. Teka toto'periaing deeko' tee boto tee, diikaang dopa' toto' tee-pina' tamunsi'nung deempari otoaing. 26Teka nii'nung naning Ju'deeaung dopa' toto' nkavuaruinunge tee boto tampa' siompui dei siraka'pari otong tee makosi, otopeu' tee-pina' naning dopa' toto' nkavuing-pina', bane dopa' toto' nkavuarupeu'nunge. 27Tee ee'nara naning, dopa' toto' nkavuaunge boto tampa' tarevui dei, teie tee da' boo'koo makosi tantupeu', da' ee'nara boto toto'pemaung, bane boto daarinii' ee'noko dopa' toto' kompei otomaunge. 28Nka naning tamung dama'dunung oo'ooe Ju'koong Ju' masikung deea', ee'noko dopa' toto' masikung tee mono-aapenameng-koong aarumo deea'. 29Naning Ju' masikung tee, bakaang domang Ju'pina' otomaung, Tanuaang Meekunge dopa' toto'nii', tamung boto paara-koong deea'. Baa tee naning temurii' aampari' nkavuaing bakaang domang-koo tee, teie daangang nkavuaing Kumponing-eta, nantoong-aapeita deea'.

will be added

X\