Romans 16

1Dii' ninge naurampimang ani nii'mari Piibii' tampa' noru'eriaing. Ani teni pakupakunani dootuu'nupoong-koo teke Siekuria-namono-koo. 2Tampa' onkeonke'eriaing onkeonke'eemana' Kumponing bakaning meekupoong, ee'noko pakueriaing teni kapoo' piavoaining-koo, ai' teni teni ee'nani pakupaku nantoong karika'koo, ee'noko ning-koo tee' nari'. 3Nauereriaing tering Pirisika'daring Akuila nkaang doturotu tering-koo, nari' Jiisuu' Karistoo'koo mintoomarimanaring-koo. 4Kuru toto'koo avororea' pakumuretu' domang-antamurema. Ning narunge tampa' tang-koo makosi deea' tering-koo teka ookara dootuu'nupoong osi kante-koo tampara tampaavaing, Ju'deeaing-kooninge. 5Nauereriaing nkaang doturotu teing dootuu'nupoong tering beekanava'koo kune'eemaing. Napo' naueriai tee Epinitas nkaang doturotu, mmaiko' masikung, tee ee'nara tutuna'nung Eesia-nupoong-koo Karistoo'aape bere'aru'nung. 6Napo' doturotu nkaang teni-koo Meeri'koo dii'koo aa'na' kake'iinani. 7Doturotu napo' tenaanka-koo Antoronaikas naanka Junias, ning-pina' Ju'koonaanka ee'noko nari' dai'nisira. Tenaanka Kumponing-nung kara-okovuresi-nkara miring pankaing-po'naanka. Ning mme' bere'maravaruko tenaanka tutung bere'aretu'naanka Karistoo'koo. 8Doturotu tee-koo Ampilietas, mmaiko' masikung Ovoring-koo. 9Napo' doturotu tee-koo Ebanus nari' mintoomarimaung Karistoo'koo, ee'noko napo' tee mmaiko' masikung Sitekis. 10Doturotu napo' tee-koo Apelis, Karistoo' kake'iiari siompumaung. Napo' doturotu teing-koo Aristabiulas baurukaa'koo. 11Napo' doturotu tee-koo Erodion, ni'ninka nari' Ju'nung. Napo' doturotu Ovoring-koo teing-koo teni Nasisis baurukaa'koo. 12Napo' doturotu tenaanka manikumaara-koo Ovoring-koo mintoomparemanaanka-koo Taraipina ee'noko Taraiposa'. Napo' tee Peesis, mmaiko', aa'na' mintoomparamaung Ovoring-koo. 13Doturotu tee-koo Ruupasi, pankaing Ovoring-koo, ee'noko teni bauko, napo' ninge tee', nko'ke. 14Napo' doturotu teing-koo Asinkiritas, Pilikon, Eemis, Patorobas ee'noko Eemas ee'noko teing mmaikori' nari' otoromaing. 15Doturotu napo' aing-koo: Pilolokasi, teni Julia, Nerias ee'noko teni ba'mari. Napo' Olimpas ee'noko ookara Kumponing bakaning meekupoong teing ninka nari' otoromaing. 16Ookara doturotu-antareeriaing onkeonke'deerima. Karistoo' bakaning dootuu'nupoong napo' ameensi'kooninge ookara osi kante-ita doturotu nauraarimaang. 17Enang tee bakei koonto' naurampimang dii' mmaikori': Oorariri otoriaing teing-koo dii' toto'anta-koo ee'noko pore'anta-koo piavoroi otoroining-koo tee kara tero taaraveru'nung bei'bei'aama. Donta'dariri otoriai teing-eta. 18Nantoong tee' oro'nukai tee niikaang Ovoring Karistoo' siompaava', biikaang pia narung siompaamaung. Tampa' nari' kareaama ee'noko opampaarima tosiaarimaung teing amakoori domang-koo. 19Dii' teing kara meumperimaing deentariko ookarai tampa' noru'daari otong ee'noko ning napo' tee'koo dotumaramaunge. Nka ninge dii' tampa' mataurariri oto'koo pia-antarampimang tampa' nari' nko-koo. Oraka' nko-koo amako-pina' otoriai. 20Tee' nari' nkorariko tenang Kumponinge mooa-po'nunge Sietani' namu'ke dii'koo kau'koo boonavete-koo mme'uai. Tee biraanke niikaang Ovoring Jiisuu' Karistoo' bakaang dii' ninka nari' otomatoaing. Ee', masikung. 21Timoti'ke ni'ninka nari' mintoomaremaunge tampa' tanterurimang, napo' Lusias dovange Jeesoni ee'noko Sosipata, ni'ninka namuu'kooninge. 22Ninge ee'narai Tesiesie aung karavoto~ daariansinunge tampara tanterompimang Ovoring ninka. 23Teie Gaiasie nii' ookara dootuu'nupoong anke tanatamurimaunge tampara tanturimaang. Napo' Erasitasie osi-koong mooni' tarevumaunge ee'noko tee nii'maiko' Kuotasie tenaankai tampara tantaarimaang. 24Niikaang Ovoring Jiisuu' Karistoo'ke dii' ookara piaaruri tampa' pakururiaing. Tee' ee'na'. 25Enang tee daangampampimaatoaing Kumponing dii' tampa' donkong-antaruri otoaing tee' nari' teie doorenang tamparai minkuvumana' nauaramaunge Jiisuu' Karistoo' sira'pama. Teie doorenang tamparai tee kapoo' makensi'nung teroita makempari otou'nung enang sirapo' po'antavuing; 26Kumponinge tee' nari' otoi otomaunge botovuio' sira'paring ookara amutemurii' nantoong-koo, teinge masika'antavaara siompaava'naang. Aung tee nakaro-nupoonge Daari Meekung-koo minkuau'nung. 27Kumponing tee meenasi okovenung, ee'nara baka norukasi' daangampampimaatoaing Jiisuu' Karistoo'ke pakumurio'. Ee', masikung.

will be added

X\