Romans 15

1Nii' ee'ning masika'anta-koo purimariri o'norininge tee teing aruaru'nanka pakuarampiaing, niikaang pia siompampia'. 2Nii'ke naruna' naruna' oovuning dotu-antavarampimaatoaing tampa' purimpariri otoroaina'. 3Ai' Karistoo' teie, baka dotu-antavaravaruko' Kumponing noru'ui, Daari Meekung-koo aa'puu'na'koo, “Oraka' minkuraamainge minkumaako tora'pantu'.” 4Ninge tenaare-koo noru'antarampimang, ai' ookara kara Daari Meekung-koo otoing teing nii' nau-anta-koo, tee Daari Meekung-koo pinka'mariri domang kuaa' ninka mii'kampiri tee barenku nempampiaina'. 5Enang tee, Kumponinge domang kuaa'antamuri mii'kampiri o'norii'naang pakumurimaunge navu-antaruriaing Jiisuu' Karistoo' bakaang aarumo siomperi otoriko. 6Tee' biraankeruriko nari' karerima Kumponing daangamperiaina', tee niikaang Ovoring Jiisuu' Karistoo' Bauma. 7Tee'koo onkeonke'deerimaatoaing Karistoo'ke dii' tero onkeonke'duru'na', Kumponing meena'poaina'. 8Noru'eriai tee Jiisuu' Karistoo' pou' sira'antavuma Kumponing tee masika'pari otomaung bakaang maraka-anta-koo Ju'nupoong paku-koo teing tutuna'nupoong tero nauvuru'na'. 9Ee'noko napo' noru'eriai tee pou' Ju'deeaing napo' moo'uriko teinge Kumponing miring pankaing-antavaava'naang bakaang piaa-koo teing-koo. Tee' Deevita'ke daarivuma minkuvuu'na', “Ninge daangantampaing Da' Ju'deeaing-koo meu'ke, ee'noko dakaang miring kenavampainge.” 10Nii'noo'ke napo' ee' daariari otong, “Doturariaing dii' Ju'deeaing teing ninka bakaning Ju'nupoong ninka nari'.” 11Napo' nii'noo'ke Daari Meekung-koo aa'pui otong, “Daangamperiaing Ovoring dii'ke Ju'deeainge. Ookarai daangamperiaing tee.” 12Napo' Aisaia' bakanoo'ke aa'pui otong, “Jeese' bakanaving-koo narung naning daa'araa'naang tarevuriaing teing Ju'deeaing, ee'noko tee narung-koo teinge biikaang noru' sipaavai.” 13Ai' teie Kumponing maraka-antamurio' nempampimaunge maanto'antaruriaing doturotue ee'noko mooai masika'antaveriko. Ee'noko teie purinto'ke Tanuaang Meekung bakaange aa'na' tasi'antaruriaing tee barenku mme' oro'paravaung. 14Ninge tee ninka tampa' noru'dampimaung dii' mmaikori' tampara aarumoi maanto'antararirio' ee'noko norunoru'ke, ee'noko makosirariri dii' dii'ka nau-anta-koo. 15Nka tee amanampa' nii'ning kapoo' napo' noru'antarampimang, mmaikori', noru'ansi dii' tampa' otoritaa' tamung napo' minkuanko meena'poaing, ai' ning tee Kumponinge mintoong maneenung amuu'nung. 16Ning tee poka'mari kara-okovui-nka-koong tee doorenang Jiisuu' Karistoo'keta Ju'deeaing-aape. Ning tee pareka-nko makosi, piristi'pina' dii' parekarampiko dii' boontunang tampara deentariru'ning Kumponing-koo Tanuaang Meekunge makosi-antarurio' Kumponing dotu-anta-koo. 17Nka tee makosi ning danga'daangamaravaing tee-koo ookara kapoo'nanka-koo Jiisuu' Karistoo'ke nkovuing-koo ning-koo kuunge. 18Kapoo'koo ninka nkoansing-koo daangamaravarupeu', nka tee-koo Karistoo'ke narunge nkovuing-koo ning-koo kuunge daangamaravaing Ju'deeaing pia-antavarantu'nung-koo aa'ninge: kara, tampa'nko, iirakuta-koong taa'ni'anta oro'pariko ee'noko Tanuaang Meekunge purimpari daa'uriko; 19Tee' nari' daankiarantu' Karistoo'koong doorenang ookara teketa Jerusalema' kato Ilirikung-navuntu'. 20Tee' nkomarama ee' to'bii-antamaramaung: Tee doorenang nauarama'naang tenairu Karistoo'koong miring nii'ninge mme' sira'paava'nairu nanama, aa'pama: Nii'nunge natuku keempuu'noo' kaniami'neenga. 21Daari Meekunge minkuvumana' nari' nkoaraa'naang ee'pina', “Teinge tero ooaavaruu'ninge nauaariaruko tee ooaavaing, ee'noko teinge tero taaravaavaruko'ninge tee tasi'paavaing.” 22Tee' nkomarama dii' tero taaraveru'ning-anko meaung tamung maromarama po'koo. 23Nka enang opansing ookara nkaang nko-nko ameensi'koo. Teka makotuko deeko' enang Sipeini-nameensi'aape nanama'naang, ee'noko te' nanama beero'dampiaing pa, mmau' mare'koo dii' oo-koo piamonanoo'koo. 24Ee'noko oki'noo' navumariritaa' o'noo'norira pakumerio' napo' tampa' nanampaing nkanavunge. 25Nka enanoo' Jerusalema'aape nanama'naang avuavu' ninka Kumponing bakaning meekupoong-koo. 26Teing Masedonia' ee'noko Akaia'nameensi'kooninge dotuariri avuavu' nkoau' teing meekupoong-koo ata'oi'nuka-koo Jerusalema'ka. 27Tamung dotuariri avaaru', nka tee tampara doorenang-koong komaaru maku' makosi. Ai' Ju'nupoong-eta tee tanuaang-aapenung biraanke nkavaara teinge napo' pakuaariai Ju'nupoong mono-aapenung pakupaku-koo. 28Teka tenang tee aung avuavu' opansi avoromira oosievorompiru'nung tenang tankinampaing Sipeini-aape ee'noko tankinama beero'dampiai. 29Ee'noko noru'ansi otong ning tenang dii'anko basimaravainang tee Karistoo'ke biraanke pankaing amuaing dii' paku-koo. 30- 31Enang naurampimang dii' mmaikori' kuunge Jiisuu' Karistoo' niikaang Ovoring-koo ee'noko tee ninka piaa Tanuaang Meekung bakaang, ni'ninka nari' mintoomariaing kunsi-koo pakumeriko Kumponinge tonta'antamuaina' teing-eta nantoong masika'anta otoroaing-eta Judia'navetei otoroining-eta, ee'noko nkaang nko-nko Jerusalema'ke tampa' aroo'aavai Kumponing bakaninge meekupoonge. 32Tee' nari' Kumponinge piavomana' ning dii'anko meaing dotumarama dii' ninka tampa' dee'moi o'noo'naang. 33Tee ee'nara Kumponing mooa-po'nung tee' dii' ookara ninka nari' otomatoaing. Tee' ee'na'.

will be added

X\