Romans 14

1Tee naning bakaang masika'anta-koo aruaru' dii'anko poko onkeonke'eriai, nka tee ninka tata'deeria'. 2Teie naninge masika'anta purinto'po'nunge tee kapoo' naro'keta naivumaung ee'noko teie naninge masika'anta-koo baru' purimparavaunge tee taamang bire'nii'ning naivumaung. 3Teie naninge naro'keta naivumaunge tee kerempumaung orara tampuauka'nung. Ee'noko teie kerempumaunge tee naro'keta naivumaung orara tampuauka'. Aming-koo, nna' ookaanka Kumponinge onkeonke'uresi otoreng bakanaanka botovotonaa'ka deemparesi otoree'naang. 4Baie da' simpe'nko~ tantuu'nunge bautaranuka nii'nung bakaning? Tee bakaang Ovoringe deeko' simpe' nko-koo makosi arera tampara ee'noko arera orara. Ee'noko tampara tampura tee Ovoringe makosi donkong-antavuaing. 5Naning narunge nii'ning doong meekeng tampurimaung ee'noko nii'ning meekeng deea'. Teka nii'nunge ookara doong nari' oro'nanka tampurimaung. Makosi, ookara nantoong tee naruna' naruna' bii'ka noru'ariri otoromana' date'pariri otoroaing biikaang onou-koo. 6Baie naninge nii'na'mung doong tare-koo piavora tee tarevuaing te'mung ee'na'mung Ovoring pankaing-antavui. Ee'noko tee naning naro'keta naikumaung tee Ovoring daangampuma tee' naro'keta naikung Kumponing-koo tampa' tampuma. Kerempumaunge tee', Ovoring daangampuma kerempumaunge, ee'noko Kumponing-koo tampa' tampuma. 7Nii'koo naning baka otomaung otoa', nii' Kumponing bakaning naing, domamariri o'nori deeko' ee'noko moompima deeko'. 8Nii' domamariri otoko tee Ovoringe kuung deemuri otong ee'noko moompiko napo' teie, Ovoringe kuung deemuri otong. Arekee', domamariritaa' deeko' ai' moompima deeko' nii' teing Ovoring bakaning. 9Karistoo' boo'paru' ee'noko napo' domamparu' tee ookara-koo nari' Ovoring otoo'naang boo'nuka-koo ee'noko domantoo'nuka-koo. 10Arekee'koo dake da'maiko' orara tampemang? Napo' arekee'koo da'maiko' oovemaang? Nii' teing ookara donkonampiaining teke Kumponinge simpe'muriainoo'ke. 11Tee' Daari Meekung-koo daariari otoina', “Kumponinge aa'pumaang: Masika'keta masika', ookara nantoong ning-koo kinkinaavaining ee'noko ookara menenge ning Kumponing daangamaavaining.” 12Tee'koo noru'ampiri otong nii'ka niikaang nko-nkonanka ninka basimariaing Kumponing-anko teie nari-koo. 13Tee'koo nii'ka simpesimpe'meeria' otoaing. Teka ee' noru'erimatoai: Kapoo' naning nii'maiko' tupamparara dua'arapeu'nung-pina' oro' nkoampiauka'. 14Nkaang otooto' Karistoo' ninka nari' o'noresi ninge tasi'pansing kapoo' baka tanuaang ku'mi'anta otoa'. Teka naninge masika'antavui ku'mi'anta tampuko dei, ku'mi'anta deemparapeu' tee-koo. 15Nka kapoo' nii'nunge ku'mi'anta tampui otoing dake naiera tee da'maiko' domang orari-antavepeu', ee'noko domang orari-antaverai'nange ee' noru'darapeu': Ninge enang piaanavung siompamparuing. Ai' tee Karistoo' tee da'maiko' moo'uu'naang boo'paru', tee'koo dake napo' orari-antaveauka'nung naro'keta kapoo' naiema. 16Tareraravai tee-koo kapoo'koo dake tampara tampei nkovemaung-koo nii'ninge oraka' minkuminku-aa'neeng. 17Kumponing bakaang tare taamang-aape deea' tuaang tovang, teka koonto'nung aarumo-aape, mooa-aape ee'noko doturotu Tanuaang Meekung-etaing-aape. 18Naning tee te'aapei Karistoo'koo dai'ari mintoompevumaung Kumponing dotu-antavukoo' ee'noko nantoonge tampara tampaakoo'. 19Tee'koo to'bii-antamariri o'noriaing mooa-aape ee'noko pakupaku-aape nari'. 20Taamang narung noru'eri Kumponing bakaang nko-nko orari-antaveriauka'. Ookara tee bakei kiiroraa'nanka masikung, teka masika'parapeu' oraka' nii'ning dua'anta-koo tamung naro'keta naiampiko. 21Tampa'na' ee': Kerempeaing tee bio' maa'koo, purinto'naru' nai-koo ee'noko nii'ning kapoo' tee da'maiko' orari-anta-koo makosining. 22Tee masika'anta temurii' da' oto'deruing tareveai, da' Kumponing ninka nari' kontui otoaing. Biraankenung tee naning tampara aarumo masika'antavumana' nari' nkoarama tuutunang~ baari'umaung. 23Nka naning tee tamung naro'keta naivumaung pankaruntoonge noru' keekoo'arama, tee tuutunang-po'nung. Aming-koo? Tee aa' tee masika'anta-ita nkovuaruing. Ai' ookara kapoo' tee'ke, masika'antavua' nkovuma tee' oraka'ke.

will be added

X\