Romans 10

1Mmaikori' ee, pankaruntoonge ning aa'na' piamoi Kumponing-koo kunsimaramaung nkaning nantoong Isireeli-nupoong domamparii'naang. 2Ooansi sira'pampeu' teing biikaang aarumo avarimana' Kumponing-koo, nka tee avariaina' makosinoo' siraka'paria'. 3Noru'aava' tee taung Kumponinge nantoong koong-antavurimanavung. Bii'ka matauarima kaari'aamaung Kumponing bakanavung siong-koo kupi'oroma, Karistoo'koo kuunge. 4Karistoo' tee Moosesi-nung boto o'anta-koong. Tee'koo teing ookara nantoong Karistoo' masika'antavaavaining teing koonto'nuka tampuriaing. 5Moosesie boto siong-koo ee' daarivuu', “Tee naning aung boto siompuaing tee domamparavaing.” 6Nka tee nii'noo'ka ee' minkuvuu' masika'antanavung-koo, “Dii'ka ee' minkueriauka': Baa paning-aape koinuainge tee Kumponinge Teroita Pako'pari'nii' nii' domamuri taremuriainoo'koong depeto boku-koo teie pakumurii'naang? 7Napo' ee' minkueriauka': Baa doonko kansi'koo kuung tumparavai napo' tee Pako'pari'nii' boo'keta daa'antavuu'naang? 8Ai' tee Kumponing bakaang kara tee teroita dii'anko due' otong, diikaang be'duu'koo ee'noko domang-koo otong.” Emu' tee tee kara teie minkuvuu'nung tee tampara doorenang daankiampimaung dii'ke masika'anta-koong. 9Tee dii'ke karang-eta sira'periaing deeko' aa'perima, “Jiisuu' tee Ovoring,” ee'noko masika'antaveriaing diikaang domang-eta tee Kumponinge domang-antavuu' nung bou'noo'keta, tee'koo enang dii' domantariaing. 10Tee naning masika'antavuko bakaang domang-eta tee koonto' naning tampuaing; ee'noko sira'puaing bakaang karange tee tee moo'aravaing. 11Nii'noo'ke Daari Meekunge ee' minkuvui otong, “Naning tee masika'antavuaing tee Kumponinge sirakura' oko-antavuaing tee biraanke.” 12Enang tee norunoru' tankatankaang-koong otoa' meu'ke teing-koo Ju'nupoong ee'noko Ju'deeaing, ai' Ovoring tee Ovoring ookara biikaang, ee'noko avurimaung bakaang biraanke teing nantoong tee-koo kunsiarimaing. 13Napo' Daari Meekunge minkuvumana' ee'ke, “Ookara nantoong Bakaang miring tampaama kunsiariaining teing domampariaing.” 14Nka arekee' kunsiaripeu' nantoong tee-koo biikaang masika'anta otoaruko dei? Napo' arekee' masika'antavaapeu' bakaang miring taaravaava' dei? Ee'noko arekee' taaravaapeu' napo' naning tee sira'pumaung otoaruko? 15Ee'noko nantoonge arekee' sira'paapeu' nii'ninge botoaariaruko dei? Tee' daariari otoina', “Tee tampara doorenang nkavai poroma kapari'kaako taaravampira doturotumarimaung.” 16A'noo' baru' ookarai masika'antavaavaruu' tee doorenang tampara, tee-pina' Aisaia'ke minkuvuma aa'puu'na', “Ovoring, baie masika'antavuu' tee kara nii'koo taaravuu'nung?” 17Nka tee nii'nunge masika'antavupeu'nung deeko' tee taaravura masika'antavupeu' Karistoo' daankiaako. 18Isireeli-nupoonge aming-koo masika'antavaavaung, ai' mme' taaravaava'? Otoa'. Bakei taaravau' biikaang minkunaa deemparako daariari otoina' ee', “Biikaang kara beremparu' ootukunairu-koo. Napo' biikaang minkunaa berempario' taaravau' ootukunung kansi'kooninge.” 19Nka ee Isireeli-nupoonge taaravaara tasi'paava' tee minkunaa okora'noo'? A, tee aa' tang kupi'oroko. Kumponinge ee' nauvuru' Moosesie daarivuu'nane'koo, “Nantoong miring-po'ning deeaing tampa' onkeonke'aranko dii' mamairorarimatoainge. Nii'navitu onou otoroa'navitu pakuaranko iiraroriaing.” 20Napo' tee Aisaia'koo iveka'antavui ee' nauvuru', “Teinge kune'mau' nantoonge bane besi'maavaruko'ninge. Ee'noko ning sira'maru' teing-koo ning-koo nia'kaavaru'ning-koo.” 21Ee'noko Isireeli-nupoong-koo karoma ee' minkuvuu', “Bireng takaa'mokoo' bokurampima dii' taarapiikanuka, kupi' baukonuka.”

will be added

X\