Revelation 8

1Teketa napo' teie Kampiai ~kenaanka-taa-nung pinkapinka' kaape'uko ookara kapoo' paning-koo oki'noo' ka'duuariru' namarang aua-pina'. 2Teketa ~kenaanka-taa koosinung ooarantu' Kumponing-koo uro'kanoo'ke donkonai otoromaing, ee'noko teinge tuuviri ~kerenta-taa nkavau'. 3Ee'noko napo' nii'nung koosinung kooro-koong tapeng kompui pora boonturoma donkonuu'. Ee'noko tee kanteng tampa' nuuraa' mmau' avau' pitu-koo teing ninka kunsinanka ookara nantoong meekupoong biikaang ninka nari' boontunamparaa'naang teke kooro-koo nkonii'noo'ke boonturomai, ovorimpari ba'nava'nani'doma-koo uro'kanoo'ke. 4Ee'noko tee kanteng paro'uio' te' ninka ii-noo' kunsinanka ninka kompeereta teing meekupoong biikaang ninka deto daa'aru' Kumponing-anko koosinung-koong bireng-eta. 5Teketa teie koosinunge tee tapeng nkavura nta'ke maanto'antavuu' boonturoma-ita nkavuu'nunge, ee'noko terempo' kansi'aape bai'uu', teketa aa'nou' pipirakai kurung-kurung ninininimpuma u'mi' nkoaru'. 6Teketa tenang teing ~kenaanka-taa koosinung teing tuuviri puumpaava'naang maamuariru'. 7Ee'noko tutuna'nunge bakanareng tuuviri puumpuko apo' kamaarie moomparama kapang kaa'omana' kaa'ora kansi'koo doonko tumputumpurunang dua'aru' ee'noko napo' nta' erenge mavo' tee' nari' kansi'koo dua'aru'. Ee'noko kansi'koo beevorai navora' taivuu', koi'nanka-koo beevorai-koo navora'kooning taivuu', napo' ookara baa' oki'nareka' taivuru'. 8Teketa napo' kenaanka-nung koosinunge bakanareng tuuviri puumpuu', ee'noko kapoo' iu' pankaing-pina' oro' nta'ke taivuko pirung-koo dua'aru'. Ee'noko pirung-koo beeru'pi naru' ereng narung deemparu'. 9Ee'noko kapoo' pirung-koo domampariri otoromaing-koo beemantori-koo namanto boorou', ee'noko aarerinanka-koo beemantori namanto nta'ke taivurira opuru'. 10Teketa napo' beenaumo-nunge koosinunge bakanareng tuuviri puumpuu', ee'noko narung beento' pankaing paning-eta dua'aru', puu-pina' arakavari nta'ke taivuko, ee'noko aa'ning-koo dau dua'aru': ntong-koo beeriiru-nari-koo ee'noko pu'antanairu-koo tee' nari'. 11Tee-koong beento'koong miring Dopa Tokaa'. Teketa teing ntonanka beento' dua'aru'ning tokaa' doparopa-po'nung deempario' nantoong mmau'ke naiaama boo'pariru'. 12Teketa napo' karenaumo-nunge koosinunge bakanareng tuuviri puumpuu' ee'noko aa'nou': duaa'koo oki'nameng paparovuu', napo' kaara-koo oki'nameng paparovuu', ee'noko beento'nanka-koo nii'namanto paparovuru'. Ee'noko aa'nou': te'mung doong apuka'paru'. Napo' te'mung muunga tee', beento'nanka-ita kaara oki'nameng-koo araka otoaruu'. 13Teketa napo' ooama narung mareoi' aa'na' karoma auvi'aue puraanuma aa'puko taaravantu', “Oi, oi, baka', baka' piaaru'nuka kansi'koo otoromaatomaing. Teinge asi'ninge beenaumoi koosinunankai biikaning tuuviri puumpaako teing-koo bakei sisikeera pankaing tavo'araa'naang.”

will be added

X\