Revelation 7

1Teketa napo' tee tankinuko koosinung karenaumo ooarantu' aung-koo kansi'koo karenaumo kunku'doi'koo donkonai otoroko doving avo'ai aing aa'ning uupuvuriaroo'naang: kansi', pirung, ee'noko koi'nanka. 2Teketa napo' narung koosinung duaa' pomanoo'keta deto beko ooantu' tee Kumponing Domantoo' bakaang taa'ni'anta kompui, ee'noko teie aa'na' bokuma teing karenaumo koosinung kansi' ee'noko pirung orari-koo purinto' avuru'ning aa'puru', 3“Kansi' dovang pirung ee'noko koi'nanka mme'ka orari-antaveriaruko io' niikaang Kumponing bakaning botovotonaa'nuka oing-koo taa'ni'antavarampiko deeko'.” 4Teketa taaravantu' deerunoo' teing taa'ni'antavuru'ning naro'ka: narung daaku'keta karenaumo kivora-eta karenaumo kokorei' [144,000], ainoo' teing ookara Isireeli baurukaa'keta muu' kante-ita: 5Juda bakanaving-eta taa'ni'antavuru' kivora-ita kenaanka kokorei'. Ruben bakanaving-eta taa'ni'antavuru' kivora-ita kenaanka kokorei'. Kaata' bakanaving-eta taa'ni'antavuru' kivora-ita kenaanka kokorei'. 6Asa bakanaving-eta taa'ni'antavuru' kivora-ita kenaanka kokorei'. Napitalai bakanaving-eta taa'ni'antavuru' kivora-ita kenaanka kokorei'. Manase bakanaving-eta taa'ni'antavuru' kivora-ita kenaanka kokorei'. 7Simioni' bakanaving-eta taa'ni'antavuru' kivora-ita kenaanka kokorei'. Liivai' bakanaving-eta taa'ni'antavuru' kivora-ita kenaanka kokorei'. Iisakaa bakanaving-eta taa'ni'antavuru' kivora-ita kenaanka kokorei'. 8Sebulon bakanaving-eta taa'ni'antavuru' kivora-ita kenaanka kokorei'. Josepa' bakanaving-eta taa'ni'antavuru' kivora-ita kenaanka kokorei'. Bensimani bakanaving-eta taa'ni'antavuru' kivora-ita kenaanka kokorei'. 9Teketa napo' tee-koo dama'due ooama bakei nantoong miatara ooarantu' naninge deeru-koo makotua', aa'ning-eta porou'ning: ookara kansi'nanka-ita, muu'keta, nantoong amutemurii'keta, kara amutemurii'keta, teke Ovoring ba'nani'domai ee'noko napo' tee-koo Kampia-koo uro'kanoo'ke donkonai otoroko mononopa' kakaara kurunii'nuka ee'noko birenge moupaao-koong para' kompai. 10Ee'noko aa'na' kareaama aa'paako', “Domang-anta tee niikaang Kumponing-eta ba'nava'nani'domai ba'nanui otomaung-eta poaing ee'noko napo' teieta Sipisipi' Kampia-ita.” 11Teketa teinge koosinunankai koroai otoroko teing ovontung ee'noko teing kapoo' karenaumo domantoia te' ovorimpari ba'nava'nani'doma uro'kanoo' dapuu'kai dua'arima daangampaako' tee Kumponing, aa'paama, 12“Ee', tee-koo niikaang Kumponing-koo otoaing teing aing aa'ning: biraanke, meenasi, matau, tampa' tang, biiving, iri', ee'noko puring-anta ookara batei-koo. Masikung.” 13Teketa narunge teing-koo ovontung-koonge ning nia'muma aa'muu', “Aing baata mononopa' kakaarai nopa'nii'nuka? Napo' areketa poroininge?” 14Ee'noko ninge aa'pantu', “Aung ee, ning aa' noru'ampa'. Dake pa noru'ei otong.” Teketa teie aa'muu' ning, “Aing teing nantoong tee batei aa'na' arikung puru'aara porou'ning. Ee'noko tee biikaang mononopa' tee tee-koo ereng-koo tee Sipisipi' Kampia bakaang-koo duu'paio' aa'na' kakaaravou'. 15Tee'koo teing Kumponing bakanoo' ba'nava'nani'doma uro'kanoo' donkonai tee dootuu'aamaung doong ee'noko muung bakanava meekava-koo, ee'noko teie teke ovorimpari ba'nani'domai ba'nanui otomaunge kuung koo'uri nari' otoromaung. 16Teke tee teing peeravoroa' otoroaing, napo' ntong-koo nukaa'oroa' otoroai, duaa'ke ui'urima baikevuriauka' ee'noko napo' naa'eeravoroauka'. 17Ai' tee Sipisipi' Kampia teke ovorimpari ba'nava'nani'domai meu'ke otomaung tee biikaang tanata-nko, ee'noko teie teing te' ntong pu'anta domantoo'aape be'antavurimatoaing, ee'noko Kumponinge tee biikaang ta'du duta-ita piu'evuriaing.”

will be added

X\