Revelation 6

1Teketa tenang ooansio' teue sipisipi' kampianue tutuna'nung pinkapinka' kaape'uu' teing-koo ~kenaanka-taa pinkapinka'nanka-koo, ee'noko taaravansi o'noko teing-koo karenaumo kapoo' domantoia-koo narunge kurunkurung-pina' karoma aa'puu', “Poai.” 2Ee'noko ooama navoro' oosinavoro' kakaaranavoro' ooantu', naning tevoro'koo ba'nanui otou'nunge mpaang kompui otoko. Ee'noko piikonara deemparako baakopo tee-koo kurumpaio' bera napo' dau basinoo' pinivurima boong deempuru'. 3Teketa napo' kenaanka-nung pinkapinka' kaape'uu', ee'noko napo' taaravansio' kenaanka-nung kapoo' domantoia-koonge aa'puu', “Poai.” 4Teketa napo' kevoro'ka-navoro' oosi-koo urumpuma navoro' bakoaru', tevoro'koo daue naning ba'nanui otoko. Bainatu isikung kong-antavau' ee'noko taura' nantoong kansi'nupoong-eta mooa pari'uriko turampeema dupisi'eeaing-koong avau'. 5Teketa napo' beenaumo-nung pinkapinka' kaake'uko beenaumo-nunge kapoo' domantoia-koonge aa'puko taaravantu', “Poai.” Tee'puko oosinavoro' mutaanu'navoro' poko ooantu', tevoro'koo naning ba'nanui otoko birenge sikeere kompui. 6Ee'noko narung aurong taaravantu' teing-koo kapoo' karenaumo domantoia-ankoita karoma aa'puko, “Taamang apuka'parako nau' bau'nu' na'mung doong-koong moo' siompei sikeereveai, ee'noko beekuri aane tee' nari' siompei sikeereveaing, teka mou dovang koi' sinampo'ning orarieauka'.” 7Teketa napo' tee karenaumo-nung pinkapinka' kaape'uko napo' tee karenaumo-nung kapoo' domantoo' karoma aa'puko taaravantu', “Poai.” 8Teketa ooama oosinavoro' booruraa'navoro' ooantu'. Naning tevoro'koo dau ba'nanui otou'nung bakaang miring Boo'. Ee'noko dama'keta tutueue siompui nanuko'. Ee'noko iri' tenaanka avaaretu' nantoong kansi'nupoong karevituri-koo tankaampaareta teing-koo navitu dupisi'koo aa'ninge: bainatue dupisi'koo, peerai boo'koo, doovaninkainge siipai dupisi'koo ee'noko kau'karenaumo-nankai dupisi'aariai. 9Teketa napo' tenang teie Sipisipi' Kampiai pa'noko'nung pinkapinka' kaape'uko teka boonturoma-koo boonga nantoong Kumponing bakaang kara pinka'ai sira'paako dupisi'aaru'ning biikaang tanuaang ooantu'. 10Teinge aa'na' bokiaama aa'paako', “Ovoring purinto', meekung ee'noko paariraravaung, batei arenang dake ookara nantoong kansi'nupoong simpe'erira teing nii' dupisi'maaru'ning maku'eriaing?” 11Teketa teing mononopa' kakaarai kantevurira nii'naroong napo' uaavoroi otoroo'naang tampuru' bera napo' nii'ning bii'maikorori' teing-pina' tavaarima dupisi'aariaininge deerunoo' makotuainoo'ke basi. 12Teketa napo' ~narung-taa-nung pinkapinka' kaape'uko ooama u'mi' pankaing nkoarako ooantu', ee'noko duaa' mutaanampura baarong mutaanu'pina' oro'paru', ee'noko kaara pankaveraa'ou'noo'ka koonto' ereng-pina' oro'paru'. 13Ee'noko beento'nanka paning-kooning kavarima kansi'koo dua'ariru', karikau'koong sinananka pionge darampuriko kavarima dua'arimana'. 14Ee'noko paning tamung tani'pina' kai'aru', ee'noko ookara iu'nanka napo' mui'nanka diiri'ariru' otomanairu-eta. 15Teketa aing aa'ning dauraronanka ookara kansi'koo-nupoong, nantoong pankenanka, tavu'koo urantanuka, nantoong kavo-po'nupoong, ee'noko iri'po'nupoong, ee'noko napo' nii'ning nantoong, botovotonaa'nuka ee'noko osikaiaang, iu'nanka-koo meu'nairu-aape koo'arima kuvinanka-koo kuung ee'noko boia'nanka-koo boong baku'arima aa'paako', 16“Nii'koo dau dua'darara nee'meriai teie Ovoringe ba'nava'nani'koo ba'nanui otoinge oomuri'neeng. Napo' teieta Sipisipi' Kampia bakaang iira-ita baku'meriai. 17Te'mung beekaang iira orara aarumo-koo oro'antavureaina'mung e'mung basiaring. Bakei naning tekang doompuresi donkonui otoaing otoa'!”

will be added

X\