Revelation 22

1Teketa teie koosinunge tee ntong pankarei nau-antamuu' tee ntong domang-anta, aa'na' kiiroraa' kalaasi-pina' oro', teketa Kumponing ee'noko tee Kampia beekanoo' ovorimparesi ba'nava'nani'doma-ita tuuvumaung meu'ke teie taung pankaraunge doonko tee-koo osi pankamono-koo. 2Tee-koo ntong pankarei-koo ookamenta-koo koi' domang-anta-koong kemo'ka donkonuresi otoreng, teing-koo sinang amutemurii' kivora-ita kemu'kai bi'ukoo' ookara mare'koo kuunge kaara kante-koo. Ee'noko teing para'nanka teing-koong koi'koonanka ookara nantoong amutemuu' taare-anta-koong. 3Teketa deto tee napo' barakosi' otoauka'nunge, tee Kumponing ee'noko tee Kampia beekanoo' ba'nava'nani'doma te' teke temono-koo otoi otoaing ee'noko Kumponing bakaninge botovotonaa'nukai tee teka dootuu'aaremaatoaing. 4Ee'noko teinge tee bakaang oing ooaavaing ee'noko bakaang miring biikaang oing-koo otoainge teing bakaning taa'ni'antavuri. 5Ee'noko muung tee teke otoauka'nung, ee'noko daamu-koong araka ee'noko duaa'koong araka napo' piavoroauka'nunge, ai' teing teing teie Ovoringe Kumponinge araka-antavurimaatoaining. Ee'noko teing teing daurarong deempariri ootukunung batei-koo tee' nari' otoromaatoaing. 6Ee'noko teie koosinunge aa'muu' ning, “Aing teing kara aa'na' masikeng, bakei masika'anta-koo makosining. Teie ee'narai Kumponing Ovoringe teing bakaning nakaro-nupoong karantavuriko'nunge~ botovuing bakaang koosinung nau-anta-koo bakaning botovotonaa'nuka kapoo' tee batei due'ka tavo'kuu'naang otoing.” 7Jiisuu'ke aa'pumaang, “Ooveai! Ning tee aung da'deng moo'naang. Biraankearavaing tee naning aung kara pinka'ui meumpuaing ane'koo buukunane'koo otoing.” 8Ninge ee'narai Joonie taaravantu' ee'noko ooantu' teing aing kapoo'nanka. Ee'noko tenang ninge taaravamira ee'noko ooamira teing aing kapoo' ning tee te' doonko miinge keemaru' tee-koo koosinung-koo kau'kanoo' teing kapoo'nanka nau-antamuu'nung-koo. 9Ee'noko tee daangampama'naang nkomarako teie aa'muu', “A, tee' nkoraravauka'. Ning tee narung da'pina' nari' botovotonaa' ee'noko napo' teing ninka da'maikori' nakaro-nupoong ninka nari' oro'ke, ee'noko teing aung ane'koo otoing kara pinka'ai meumpaamaing. Kumponing narung-koo tee' nkorarama daangampeaing.” 10Teketa teie aa'muu' ning, “Tee aung kara tarampee-koong~ ane'koo otoing baku'eauka' nantoong-koo, ai' batei tee due'umaang. 11Baa tee naning kapoo' orara nkovumaatomaung tee tee' nari' kato nkovuko batei makotuaing, napo' naning noru' ku'mi' tee' nari' kato noru' ku'mi'oi otoainge. Napo' baa tee kapoo' koonto'na' nkovumaa-tomaunge tee' koonto'na' nari' kato nkovuko batei makotuaing, ee'noko meeka'pari otoing naning tee' nari' kato meeka'pari otoainge.” 12Ee'noko Jiisuu'ke aa'pumaang, “Ooveai, ning tee aung da'deng moo'naang, moo' nkaang nkavansi ookara nantoong avorompaing kapoo' naruna' naruna' nkoau'ning-koo. 13Ning tee tutuna'naare ee'noko napo' asiranaare, napo' uro'nung ee'noko dama'nunge, ee'noko ookara kapoo'koo tutuntomai napo' o'domai. 14Biraankeariaining teing nantoong domang kiiroraa'ariri bakaang boto meumpaamaing, ai' teing teing makosiaavaining tung-koo te' osi pankamono-koo teke karanaange, ee'noko napo' makosiaavainge tee-koong koi' domang-anta-koong sinang maa'koo. 15Teing nantoong ee' oro'nuka teing tee-koo osi pankamono-koo dama'du otoroaining, aa'ning: mosi'pina' nkoarimaing, dopa nkonuka, auning nkonuka, nantoong dupisi'nuka, kumponing daang-koong-koo dootuu'nuka, ee'noko ookara daang minku baukonuka karai ee'noko nko-nkoi. 16Ninge Jiisuu'ke, botoansing nkaang koosinung dii' dootuu'nupoong nau-anta-koo osi kante-koo. Ning tee Okovosi' Deevita' bakanaving-koong ee'noko napo' Bauringe. Ee'noko ning tee napo' maatara pina' aa'na' arakavari pomaung-pina'.” 17Teie Tanuaang Meekunge ee'noko teni Manikuma Kampiai Nampui-nani aa'puremang, “Poai.” Aia' baie teie taaravuainge aa'puai napo', “Poai.” Ee'noko baa tee nukaa'oi otoing ntong-koo poai. Ee', baa tee ntong domang-anta nai-koo piavoi otoing pora naikuai, ai' tee tee moo'dopa. 18Ninge Joonie tee enang kara purinto' minkuamaang dii'koo tee tarampee-koong kara Kumponing bakaang ane'koo otoing taaraveriaining-koo. Baie nii'nunge kara nii'naare dau be'nu'uaing deeko' tee-koo kara ane'koo daariari otoing-koo, Kumponinge tee teing arikananka ane'koo minkuariri otoroining tee-koo dau pante'uaing. 19Ee'noko napo' nii'nunge narunge tee-koo kara Kumponing bakaang ane'koo daariari otoing-koo namaranoo' dua'uaing deeko', tee tee Kumponinge pari'uaing bakaang sinang koi' domang-anta-koong. Ee'noko temono-koo osi meekamono-koo tee otoauka'nunge, ane'koo minkuari otoinamono-koo. 20Teie aung karananka sira'puinge aa'pumaang, “Ee', ning da'deng dii'anko mee'naang.” Ee'noko maku'ama aa'pamaang, “Ee', tampara; tee' ee'na' poaing, Ovoring Jiisuu'.” 21Tee biraanke niikaang Ovoring Jiisuu' Karistoo' bakaang tee dii' ninka ookara Kumponing bakaning meekupoong ninka nari' otomatoaing. Masikung.

will be added

X\