Revelation 20

1Ee'noko napo' narung koosinung ooansio' paning-eta depeto siaru', aing aa'ning kompui: kii' tee-koong dinkung tumangropa-koong, ee'noko sieena pankaing. 2Teketa teie tee pakia pankaing moo'uu', tee boru' uripo'keta otomaung, tee ee'nara tee ma'naang, nii'noo' Sietani'. 3Ee'noko dai'ura tee-koo dinkung tumangropa-koo kuung dua'ura dau pinka'uu' narung kokorei' mare'koo teke otoo'naang, napo' nantoong muu' kante-kooning napo' tosivuriaroo'naang bera teing mare' narung kokorei' oparavainoo'ke basi. Teketa napo' tee batei oki'namu'koo sing-antavuaing. 4Teketa napo' ovontung teing-koo biikaning ba'nava'nani'nairu-koo ba'namparirio' ooarantu' Kumponinge taura' avuru'ning nantoong simpe'koo. Ee'noko napo' nantoong-koong uraanoo' ooarantu' teing-koong Kumponing bakaang kara ninka Jiisuu' sira'paako kuru napu'aaru'ning-koong. Teing aa'ning biiko-koo ee'noko tee-koong baka-oo-koo dootuu'aria' ee'noko bakaang moo'do'anta oro'parava' biikaang oing-koo nii'noo' bireng-koo. Teing tee domamparira Karistoo' ninka nari' tanatavariaining teing-koo mare' narung kokorei'koo. 5Aung tee tutuna'nung boo'keta daa'daa' dootuu'nupoong daa'ariainung. Napo' nii'ning boo'nuka teing domamparia' otoroaining bera teing mare' narung kokorei' oparavainoo'ke basi. 6Teing tutuna'nung daa'daa'koo boo'keta daa'ariaining teing meekupoong biraankeariaining. Aming-koo? Nna' kemu'kanung boo'pari oto'ke puru'uriauka'ning deempariri otorong, ee'noko napo' teing teing Kumponing-taang beekaning piristi'nuka deempariri otoroaininge, ee'noko tee Karistoo' ninka nari' tanatavariri otoroaining teing-koo mare' narung kokorei'koo. 7Tenang teing mare' narung kokorei' oparako, Sietani' kiimata-ita sing-antavaavaing. 8Ee'noko teketa ookarai kansi'ke muu' kantei nanuaing tosivurima, aa'ninge: Kouku ee'noko Makouku, kare-koo maamu-antavurima. Bakei nantoong karinga oosivuriaing, deeru-koo paapaa'ke, pirung-koong-pina' piisi'pina'. 9Ee'noko tee, teinge ootukunung kansi' opai nanaavaing Kumponing bakaning meekupoong otoroainairu koroai, ee'noko osi pankamono Kumponinge piaavumanamono koroaavai. Teka tee' koroai otoroko nta'ke paning-eta depeto dua'arara taivuriaing teing. 10Ee'noko tee Sietani' teing tosivurimaung tee dinkung-koo nta' piiko ninka urumparamaung-koong-koo dua'aavaing, te' ee'noo' tee biiko ee'noko tee nakaronara daang minku dua'aaresio' otoremanoo'. Ee'noko tora'kaamatoai ookara batei-koo muung ee'noko doong. 11Teketa pankaing ba'nava'nani' kakaara ooantu', ee'noko teke tee-koo tee naning ba'nanui otoko'. Kansi' ee'noko paning tonta'aretu' teieta taapo', napo' oo-koo makotua'. 12Ee'noko teka ookara boo'nuka tee-koo uro'kanoo'ke donkonaio' ooarantu', ookara aa'noko ovontung ee'noko tamunsi'nuka, ee'noko teka napo' buukunanka bere'uko ooantu'. Ee'noko napo' nii'nane' buuku domantoo'nane' teka ooansi o'noko bere'uu' teing domampariaining biikaang miring daariari otoinane'. Ee'noko boo'nuka teing ookara kapoo'nanka nkoau'ning-koo makosina' simpe'uru' teing-koo buukunanka-koo daariariri otoina' siompario'. 13Pirunge teing nantoong pirung-koo boorou'ning tavo'uru', ee'noko napo' Boo' naankai Tutueu teing teka boo'nuka kompaaresi otoremaing tavo'aaretu', ee'noko ookara naruna' naruna' simpe'uru' kapoo' nkoau'nankai tampui otoina'. 14Teketa tenaanka Boo' ee'noko Tutueu nari' dinkung-koo nta' kauoori-po'nung-koo dua'aaretu' o'antavaarema, tee tee kemu'kanung boo'pari oto', sisikeera oparavaung kontoma. 15Baata nantoong biikaang miring oovuriaruu'ning tee buuku domantoo'koo teing tene'koo domampariaining biikaang miring daariari otoinane'koo teing teing tee-koo dinkung nta' kauoori-po'nung-koo doonko dua'aaru'ning.

will be added

X\