Revelation 2

1Ee'noko aa'muu' ning Jooni, “Narung karavoto daarieai tee-anko koosinung Epesesie dootuu'nupoong tanatavurimaung-anko. Aa'peaing, ‘Aung kara tee ~keura-taa beento' tampanaange kompuri otomaung bakaang ee'noko teing-koo ~kenaanka-taa araka ba'nang kooro-kooning-koo meu'ke nanukoo'. Teie aa'puing, 2“Ninge tee dakaang nko-nkonanka noru'ansi o'nong pore' kompemana' aa'na' mintoontarama iirau'darava'. Ee'noko orenanka ninka otori domang aa'na' manki'doma dake baakeeneveri sira'perikoo' teing bii'ka daang kara okovuri nkanuka tamparimaing. 3Ninge noru'ansi o'nong pankaroong banainge manki' kompeu'na' mintoontarama iirau'darava' pore' kompema nkaang miring-koo, ee'noko tee' nkorarama tee konteroaung. 4Teka da' narung kapoo' ning-koo oraka' apuka'dari otong, dake ning tee piaameko'na' enang piaamea' otong. 5Norunoru'eai tee' tero otoko'na' enang dua'darara otoinoo'keta ee'noko enang napo' bere'darara teing nko-nko tero nkoveko'ning nkoveai. Tee tee bere'daravaruko ning mera tee dakaang daamu ba'nang tonta'ampaing otomanoo'keta. 6Aung tampara aarumo da'koo otong, dake tee munte'emaung teing nko-nko oreng Nikolas-nupoonge nkoaamaing, tee aarumo tee ninge munte'amaunge. 7Baa tee naning punkang-po'nunge tee tampa' taaravuaing tee kapoo' Tanuaang Meekunge minkuvumaung dootuu'nupoong-koo osi kante-koo. Baata teing parapaara puru'aavaining tee taura' avorompaing tee koi' domang-anta-koong sinang maa'aava'naang teke Kumponing bakanamono-koo meeroo'ke otomaung-koong.” ’” 8“Napo' narung karavoto daarieai tee-anko koosinung Simeenai dootuu'nupoong tanatavurimaung-anko. Aa'peaing, ‘Teie ookara kapoo'koo tutuntoma ee'noko o'doma otomaunge, ee'noko boora napo' domamparu' aa'nunge aa'puing, 9“Ninge tee dakaang nko-nkonanka, arikananka ee'noko ata'oi'dari otomana' noru'ansi o'nong, teka da' tee tanuaang-aape maneenara. Napo' teinge Ju'nupoong tamparimainge oraka' minkuraamana' noru'ansi o'nong, teka teinoo' Ju'nupoong masikeng deea'. Teing teing Sietani' bakanavitu-kooning. 10Aroreauka' teing-koo kapoo' arikananka dake kune'eaining-koo. Ee aung, Sietani'ke tee paara-anta-koo dii'koo nii'ning kiimatanava-koo sipurii'naang, kivora doong-koo arikung-koo otorii'naang, teka tee aroo'dariri motekaro'nuka otoriaing bane boo' dovang-koo, ee'noko maku'koo ninge tee dii' piiko-nupoong avuavu' tampara arompima tee baakopo domampari oto'koong kuruntampiaing. 11Baa tee naning punkang-po'nunge tee tampa' taaravuaing tee kapoo' Tanuaang Meekunge minkuvumaung dootuu'nupoong-koo osi kante-koo. Baata teing parapaara puru'aavaining teinge tee kemu'kanung boo'pari oto' tora'paavauka'nung.” ’” 12“Napo' narung karavoto daarieai tee-anko koosinung Peekamami'ke dootuu'nupoong tanatavurimaung-anko. Aa'peaing, ‘Teie bainatu ookamenta irinto' kompui otomaunge aa'puing, 13“Ninge dakaang nko-nkonanka ee'noko te' da' otoinoo' noru'ansi o'nong, te' ee'noo' Sietani' daurarong~ deempari otomanoo'. Teka dake tee nkaang miring pinka'ei otomaung ee'noko dakaang masika'anta ning-koo tee' nari' pinka'ari otomaunge, bane tee Antipas ning-koo aroo'ari motekaro'ari kara tampa' sira'puko'nung dii'koo meu'ka tavaio' teka ee'noo'ka Sietani' otomanoo'ka. 14Teka da'koo kapoo' ninge nii'ning oki'ning aarumo oreng otoko ooamaang, aa'noko dii'koo nii'ninge tee Beelamu bakaang nau-anta kompai otorong, teie ee'narai Baalaka' Isireeli-nupoong dua'antana' nau-antavuu'nung. Aa'noko tee taamang kumponing daang-koong-koo darinii' naiaava'naang aavavuru', ee'noko napo' kaukauro-koong aarumo nkoaava'naang siong-antavuru'. 15Napo' nii'ninge dii'koo Nikolas-nupoong biikaang nau-anta kompai otorong, tee ninge munte'amaung. 16Temurii'keta bere'dariai. Bere'dariaruko deeko' tee ning namu'ke dii'anko mora turamparama'naang teing teie bainatue nkaang karang-etainge. 17Baa tee naning punkang-po'nunge tee tampa' taaravuaing tee kapoo' Tanuaang Meekunge minkuvumaung dootuu'nupoong-koo osi kante-koo. Baata teing parapaara puru'aavaining ninge tee taamang kore'nang paninung avorompaing kansi'nupoong-eta baku'nii', napo' tee kapang kakaara avorompainge naruna' naruna', nkanoo' kuung tung-koo taura'nii' taa'ni'anta, tee miring nerakung biikaang daarinii' tere'koo. Naninge noru'ua' tee miring, teka teie tere' nkavuainge baka noru'ui otong.” ’” 18“Napo' narung karavoto daarieai tee-anko koosinung Taiatairai dootuu'nupoong tanatavurimaung-anko. Aa'peaing, ‘Teie Kumponing Bauringe duta nta'pina' urung naning tupu'ui ooe, ee'noko bakaang kau' baraasi~pina' nta'ke iivai'nii' pina' oro'na' aa'pumaang, 19“Ninge tee dakaang nko-nkonanka noru'ansi o'nong, napo' tee dakaang piaa ee'noko tee masika'anta ee'noko napo' teing nantoong pakuerimana'. Ee'noko parapaara-koo iirau'daravarukoo', ee'noko enang noru'ansi o'nong aa'na' masika' mintoontaramaang tutuna'noo' divu'antavei. 20Teka aung kapoo' ninge da'koo ooamaang, dake teni manikuma Jesabel baka nakaronani~ tamparamai taura'peio' nau-antavarama nkaning botovotonaa'nuka ako'ke be'antavurimaung. Ee'noko aa'ning-koo barevurikoo': kaukauro nko ee'noko kumponing daang-koong-koo darimpaamaung taamang nai-koo. 21Ninge tee teni batei avonsing bere'araa'naang, teka teni piavoaruing bere'koo, teieta bakaang aarumo kaukauro nko-ita. 22Ee aung, teni teni ninge enang sisikeera pankaing-koo sipama'naang ee'noko teing teni ninka nari' nampeesi orariaamaing kiimata pankaing-koo siparama'naang, teing biikaang orara nko-nko-ita bere'ariaruko deeko'. 23Ee'noko tenie baurukaa' dupisi'arampainge, ookara dootuu'nupoonge osi kante-koo noru'maavaina' ning tee ee'nara nantoong biikaang onou domang-koo noru'ansi o'noing. Ee'noko ninge ee'narai nantoong naruna' naruna' kante nkoverimana'koo bari'dampiaing. 24Teka dii' nii'ning Taiataira-nupoong tee temurii' nau-anta siomperiaung, napo' barerariarukoo' tee-koo nii'ninge Sietani' bakaang makensi'nung tampaamaung-koo. Ninge aa'dampimang dii'koo tee nii'ning kapoo' manki' pante'ampauka'nung. 25Teka tee kapoo' enang komperi otoing tee tampa' pinka'eri otoaing bera ning moainoo'ke basi. 26Baata teing parapaara puru'aama nkaang nko-nko kompai otoroaining bera botu basinoo'ke, ninge tee teing iri'po'nupoong deeng-antavarampaing ookara nantoong-koo amutemuu'koo daua teing tanata-koo. 27Ning tee Mma'ke temurii' iri' amuu'nung Daari Meekunge aa'pumana', ‘Teie tanatavuriaing aini-koong ninka donsi' ninka. Ee'noko teie kansi'koong utau-pina' putura'uriaing.’ 28Napo' tee ninge avorompainge teing tee maatara. 29Baa tee naning punkang-po'nunge tee tampa' taaravuaing tee kapoo' Tanuaang Meekunge minkuvumaung dootuu'nupoong-koo osi kante-koo.” ’”

will be added

X\