Revelation 17

1Narunge koosinunge teing-koo ~kenaanka-taa-koonge utau kompui otou'nunge ning-anko pora aa'muu', “Poko io' ninge naurampai temono osi pankamono ntonanka ariteri-koo dau otoinamono, teni auning-nko doore karomai makosinamono, ee'noko kiimatavaavaina' naurampai. 2Teni teni dauraronanka ninka kansi'koo-nupoong ninka aunimpeema otomai ee'noko ookara nantoong kansi'nupoong kanu'antavurikoo' tee bakaang uaini auning-koong aarumo nai-antavurima.” 3Teketa tee Tanuaang Meekunge korimuio' teie koosinunge nkamura mee'bora' sirakamaa'koo be'antamuu', ee'noko teka teni manikuma kapoo'koo biiko-koo urumpumaung-koo dau ba'nanuio' ooantu'. Ee'noko tee tee biiko mirinankai maanto' ookara mono Kumponing akapeu'koonankai ee'noko bore' tee biiko-koo ~kenaanka-taa ee'noko kaintananka kivora otoing. 4Teni manikuma ovorinaang masikani taa'ni'antavari otou' baarong urumpumainge ee'noko iiraampumaing kurumpari. Ee'noko napo' aa'ninge baunii': biiri kooro-koong ee'noko duku' moo' aa'na' pankeng-kooning. Ee'noko birenge kaapu kooro-koo nkonii' kompui otoko', kuung kapoo'ke maarekusi'nankai maanto' teni auning-koonankai. 5Ee'noko miring ee' oro' mirumiru' teni-koo oing-koo daariari otong: TEE OSI PANKAMONO BABILONI'NAMONO, TEING AUNING NKONUKA BIOKO MAKOSINAMONO, EE'NOKO OOKARA AARUMO MAAREKUSI' KANSI'KOONING-KOO OKORA'NAMONO. 6Ee'noko teni ee'nanie manikumai ereng naivura kanu'ario' ooantu' teing-koong mmau'koong Kumponing bakaning meekupoong dupisi'uru'ning-koong, teing ee'ning Jiisuu'koo miring sira'paamaing. Ee'noko tenang ninge ooamira teni, ning bakei aa'na' ta'ninantu'. 7Teketa teie koosinunge aa'muu' ning, “Da' aming-koo ta'ninimaang? Io' siraka'antavama'naang da'koo tee mirumiru' makensi'nung teni-koong ee'noko napo' tee biiko teni dau ba'nanui otoing-koong, bore' ~kenaanka-taa ee'noko kainta kivora aa'nung. 8Tee biiko oovemaatomaung tee tero otoko', teka enang otoa'. Ee'noko napo' teieta dinkung tumangropa-ita bakoarara dama'ke koonto' kera'parara otoauka'nunge. Ee'noko teinge nantoonge ookarai kansi'nupoonge aung kansi' mme' pupu'aravaruko-ita biikaang miring daariariaruu'ninge tee-koo buuku domantoo' domampariaining biikaang miring daariariri otoroing-koo, tee biiko ooaara tee ta'ninaavaing. Tee aa'nung tero domampari otoko', teka enang otoa', teka napo' dama'ke oro'paravaing. 9Aung naninge noru'po'nunge tampa' keperuu'ui noru'koo makosi. Teing ~kenaanka-taa bore' teing ~kenaanka-taa iu'nanka teni ee'nani manikuma dau ba'nanui otoining. 10Napo' nii'na'koo teing teing ~kenaanka-taa bore'nanka teing dauraronanka. Teing-koo pa'noko' tero dua'ariru', narung enang otong, napo' narung mme' tavo'kua', teka tavo'kura tee tee oki'naa batei-koo otoaing. 11Teka tee biiko tero otoko'nung, ee'noko enang otoa' aa'nung tee ~beenaumo-taa-nung daurarong~ deemparavaing. Teka teenoo' tee teing-koong narung. Nka tee teie, napo' tee' kera'paravainge. 12“Teing kaintananka oovemaatomaing teing kivora dauraronanka, teka mme' dauraronanka deemparia' batei makotuaruko, teka narung doong-koo oki'ning batei naing-koo, dauraronanka deempariaing tee ninka biiko ninka nari' otoroi. 13Teing aing dauraronanka noru' narung ookara oto'evorong. Teinge tee biikaang iri' ee'noko taura' tee biiko avaavaing. 14Teinge aing ee'ninge dauraronankai tee kare naka'aavaing Kampia-aape, teka teie Kampiai teing ninka bakaning miru'urira bokuvurio' kake'iiariri tee siompaamaing ninka teing tee boong deempuriaing, ai' tee tee Kampia ovontung biikaang Ovoring ee'noko napo' dauraronanka biikaang Dauraronge.” 15Teketa teie koosinunge aa'muu'nung, “Teing ntong-nanka ariteri teni auning nkovumai dau ba'nanuio' oovemaatomaing tee teing ookara kansi' kante-koo-nupoong miru'ari otong, ee'noko nantoong karinga, napo' teing dopa' amutemurii' ee'noko ookara kara amutemurii'nanka. 16Ee'noko tee biiko-kooninge kaintai kivorai oovemaatomainge tee teni auning-koo baka avaramai munte'aavaing. Ee'noko napo' teinge tee teni oraka' nkoaavaing bera simpenoi' deeng-antavaara sipaavai. Ee'noko bio' teni-koong tee maa'aama kato nta'koo tai-antavaavaing. 17Aung tee noru' Kumponinge biikaang domang-koo sipuko tee' nkoaavaing bakaang pia nkoaraa'naang, ee'noko narung noru' ninka taura'paako teie biikoi tanatavuria'naang bera tee Kumponing bakaang kara masika'puainoo'ke basi. 18Ee'noko teni manikuma oovemaatomai teni tee osi pankamono miru'ari otong, dauraronanka ookara kansi'nupoong tarevurima-namono.”

will be added

X\