Revelation 16

1Teketa narung aurong dootuu'nava-ita aa'na' karoko taaravantu' aa'puriko teing ~kenaanka-taa koosinunanka, “Berira teing utaunanka ~kerenta-taa Kumponing bakaang iirai maanto'ning kansi'koo piamperiai.” 2Teketa tutuna'nunge koosinunge bera bakanareng utaunareng piampuu' kansi'koo, ee'noko pentananka oraka' oro'nanka sisikeera-po'nanka nantoong-eta ta'da'puu', teing tee biiko-koong moo'do'anta otoroining-koo ee'noko bakaang baka-oo-koo dootuu'arikoo' aa'ning-koo. 3Teketa napo' kenaanka-nung koosinunge bakanareng utaunareng pirung-koo dau piampuu', ee'noko tee pirung ereng koonku'umaung narung deemparu' naning boo'koong-pina', ee'noko ookara kapoo' pirung-koo domampariri otoromaing boorou'. 4Ee'noko napo' beenaumo-nunge koosinunge bakanareng utaunareng ntonanka-koo dau piampuu' ee'noko pu'antananka aa'ning-koo, ee'noko teing ntonanka ereng narunanka deempariru'. 5Teketa teie koosinunge ntonanka tanatavumaunge aa'puko taaravantu', “Ee Ovoring, dake tee koonto'na' teing maku'eri nkovering. Ai' da' tee Meekung, teroita otou'nung, e'mung tee' otong, ee'noko dama'ke tee' nari' otoi poainge. Dake tee koonto' makosina' teing tee' nkoverima maku'ering. 6Ai' teing teinge ee'ninge dakaning meekupoong ee'noko teing nakaro-nupoong~ dupisi'aario' biikaang ereng dakoaru'nung. Tee'koo teing nantoong oreng tee ereng nai-antaveriko biikaang moo' koonto' makosina' nkavaavaing.” 7Ee'noko teketa boonturoma-ita narunge maku'uko taaravantu', aa'puko, “Ee', Ovoring, Kumponing Purinto', masikung ee'noko koonto' tee dakaang simpesimpe'.” 8Teketa karenaumo-nunge koosinunge bakanareng utaunareng duaa'koo piampuu', ee'noko teie duaa' aa'na' deekoronoo' bia'antavuu' nantoong nta'pina' taivurii'naang. 9Ee'noko nantoonanka uipaarii'ke iirakutai taivuriko Kumponing bakaang miring barakosi'aako' tee teing ee'ning arikananka okora', napo' bere'arira Kumponing pankaing-anta-koo piavoroaruu'. 10Teketa napo' pa'noko'nunge koosinunge bakanareng utau piampuu' te' masipo' tee biiko bakanoo' ovorimpari ba'nava'nani'doma, ee'noko bakaning otoromanairu mutaanampuu' ee'noko nantoonanka meneng si'daie taiariko' aa'na' sisikeeravoroma. 11Ee'noko Kumponing paning-koong barakosi'aako' sisikeera dovang-eta ee'noko pentanankai oraka' mantomparima. Ee'noko tee' nkoarima napo' bere'aria' biikaang orara aarumo-ita. 12Teketa napo' ~narung-taa-nunge koosinunge bakanareng utaunareng piampuu' tee-koo ntong pankarei Iuperetisi ee'noko tee ntong teri ootukunari siri'aru' maamu-anta-koo tee taung teing dauraronanka duaa' poma-noo'keta teke poroo'naang. 13Ee'noko teketa ooansio' ma'nari beenaumo oreng dokoroko'pina' oro'nuka bakoariru' aing aa'ning beenaumo biikaang karang-eta: tee pakia, tee biiko, ee'noko tee nakaronung daang minku. 14Aing teing ma'nari Sietani'ke botovurio' kapoo' ta'nimpaarii'nanka ninka taa'ni'antavarima porou'ning teing dauraronanka ookara kansi'nupoong-kooning aavavaarima oosiaarima maamu-antavaarii'naang kare tutung-koo Kumponing bakaning ninka, teka te'mung kare tutumpaavaina'mung te'mung Ovoring Kumponing Dau Basi Purinto' bakana'mung pinidaaku'uriaina'mung. 15“Ee aing, te'mung ee'na'mung bakiaa'nko-pina' ta'nina' moaing. Baa naning tanteari maamuari otoing tee biraankearavaing ee'noko bakaang baarong duaampari nari' otoaing simpenoi' otoi nanuko ooaako maia'o'neeng.” 16Ee'noko teinge ma'nari orenge teing dauraronanka Iiburu-nupoonge Amakedon tampaamanoo' naro'aaru', miru'noo' Mekido-namii. 17Teketa tee teie ~kenaanka-taa-nunge koosinunge bakanareng utaunareng bikiavuu' aanaroo'ke danto, ee'noko dootuu'nava-ita ba'nava'nani'doma-ita auronge aa'na' bokuma aa'puu', “Enang bakearing.” 18Teketa aing aa'ning nkoaru': pipimpuma kurunkurung tompoo'kuko', ee'noko ninininimpuma u'mi' pankaing nkoaru', tee u'mi' tee bakei teroita kansi'koo nantoong tavo'ariru'noo'keta nkoarava'na' nkoaru', aa'na' dau basi masikung tee aung. 19Tee osi pankaing Babiloni' beenaumo-koo ke'me'aru'. Napo' nii'ning osi pankeng nantoong amutemuu' biikaning doonko turampariru'. Baru'noo' tee osi pankaing, Babiloni' bakaang orara aarumo Kumponinge noru'ui tee' turampuu' bakaang iirai maanto'uio' tora'antavurima uainie tora'antavurimana'. 20Ookara mui'nanka paa'ariru' ee'noko iu'nanka otoroaruu'. 21Ee'noko apo' kamaarie moomparama kapang kaa'omana' kaa'ora paning-eta nantoong-koo dau kapang-pina' tumputumpurunang dua'ariru', nare'na'koo manki'noo' naninge kakau nkavupeu'noo' basi. Ee'noko teinge Kumponing bakaang miring barakosi'aako' apo'ke kapang-pina' nare'na' nare'na' aa'na' baikevuriko, tee tee arikananka-koo dau basi arikunge.

will be added

X\