Revelation 13

1Teketa napo' pirung due'ke piisi'koo donkonansi o'noi narung kapoo' kau' karenaumo biiko pirung-eta bakoarako ooantu', bore' ~kenaanka-taa ee'noko kainta kivora otoing, ee'noko baakopo kivora kainta kante otoing ee'noko bore'nanka-koo mirinanka otorong Kumponing poore'kooning. 2Tee ee'nara kapoo' biiko ooantu'nung leepati'pina'oro', teka kau'noo' beea'pina'oro', ee'noko karannoo' laioni-pina'oro'. Teie pakiai iri' avura napo' bakanoo' ovorimpari ba'nava'nani'doma ba'nang-antavuu'. Ee'noko nantoong boto-koo makosi-antavuu'. 3Naveu teing-koo biiko-kooning-koo bore'nanka-koo tee tokoona'pina' oro'pari otoko ooantu', temu' tavaara boo'antavaako napo' domamparu'naveu-pina' oro'. Ee'noko ookara nantoonge kansi'nupoonge teveu-koo teu pentanu tempa'ou'nu ooaara ta'nimparima siompau' tee biiko. 4Nantoonge tee tee pakia dootuu'au' teie pakiai tee biiko makosi-antavuio' nantoong boto-koo, ee'noko teinge tee biiko napo' dootuu'aakoo' aa'paama, “Baa nii'nung naning aung biiko-pina' oro' otong, ee'noko baie pa tavuma aung boong deempupeu'? Naning otoa', bakei!” 5Teketa teie pakiai makosi-antavuio' teie biikoi baka biivimparama Kumponing aa'na' poore'uko'. Ee'noko Kumponinge kaara karenaumo kivora-ita keura-koo basinoo' naro' taura'puu' tee' nkoaraa'naang. 6Ee'noko karoma Kumponing poore'uko'. Napo' Kumponing bakaang miring poore'uko', te' otomanoo' nari', ee'noko napo' teing paning-koo otoromaing. 7Ee'noko teie pakiai makosi-antavuio' teie biikoi Kumponing bakaning meekupoong ninka kare naka'ura puru'uru' teing. Ee'noko napo' teie pakiai makosi-antavuio' nantoong ookara muu' tarevuriko' aa'ning naro'ka: muu'nanka, nantoong ookara kansi'koo-nupoong, kara amutemurii', ee'noko ookara dopa' amutemurii'. 8Ookarai nantoonge kansi'nupoonge tee biiko dootuu'aavaing, aa'ninge teing Kumponinge biikaang miring daarievuriaruu'ning tee-koo Buuku Domantoo'nuka-koong-koo, tee Kampia bakanane'koo, tee kansi' pupu'aravaruko-ita Kumponinge miru'uio' dupisi'au'nung. 9Baa naning punkang-po'nunge tee bakei taaravuaing. 10Baa naning dai'koo miru'nii' tee dai'aavaing, ee'noko baa naning bainatue dupisi'koo miru'nii' teie, bainatue dupisi'aavainge. Teka tee aung manki' ee' oro' tavo'kuko dii' teing Kumponing bakaning meekupoong mii'kiritaa' aroo'dariri otoriaing. 11Teketa napo' nii'nung biiko kansi'keta doompeto bakoarako ooantu' kainta kenaanka otoing sipisipi'koo kampianu-pina' basi, ee'noko kara-koo tee-pina' pakia-pina' karoko'. 12Tee tutuna'nung biiko-pina' iri' oro'antavuko' tutuna'nung biiko bakaang miring-koo, ee'noko teie kenaanka-nung biikoi ookara nantoong kansi'koo ootukunairu-koo otoromaing etuvuru' tutuna'nung biiko dootuu'aava'naang, tero penta orara tempa'ou'nung aa'nung. 13Ee'noko teie kenaanka-nung biikoi taa'ni'antananka ta'nimpaarii' nkovuko' nta' dovang paning-eta depeto kansi'koo bokuvuma nantoong-koo dutakanoo'ke. 14Ee'noko teing ninka taa'ni'antananka ta'nimpaarii' ninka tee tutuna'nung biiko bakaang miring-koo nkovuu'ning ninka teie kansi'nupoong tosivurima siong-antavuru'. Ee'noko botovuriko baka-oo ta'nampau' tee biiko tutuna'nung paara-antavai, aa'nung tee too'pau'nung teka mme' domampari otong. 15Ee'noko napo' tee' nari' taura' nkavura tee biiko tutuna'nung-koong baka-oo domang-antavuu' tee baka-oo karoo'naang. Ee'noko nantoonge dootuu'aavaruko deeko' tee baka-oo tee biiko-koong teie kenaanka-nung biikoi teing dupisi'antavuriko'. 16Ee'noko teie ookara nantoong etuvuriko' moo'do'anta nkavaava'naang aa'nairu-koo: bireng-koo tampanaang-koo deeko' nii'na' oing-koo. Aing aa'ninge nkavaava'naang etuvuru': nantoong pankenankai ee'noko oki'nareka'ke, kavo-po'nupoonge, ee'noko ata'oinkue, napo' botovotonaa'nukai ee'noko osikaiaange. 17Teketa deto tee naninge kapoo' tamung moo'uauka'nunge nii'noo' baavevuauka' tee moo'do'anta oto'evua'. Teenoo' tee moo'do'anta tee tee biiko tutuna'nung-koong miring daarinii' nii'noo' bakaang taa'ni'anta mirumiru'po'nung. 18Ee mmaikori', tampa' matau ninka norunoru'eriaing tee aung: baa tee naning noru'po'nunge tee tasi'puaing tee taa'ni'anta, ai' tee tee deerunoo' tee biiko bakaang miring-koo kuunge baku'ari otomaung tee aung: ~Narung-taa daaku' bera ~narung-taa kivora-ita ~narung-taa [666]. Tee deerunoo' tee naning-naung-koo taa'ni'anta makosi.

will be added

X\