Revelation 12

1Teketa tee paning-koo kapoo' pankaing ta'nimpaarii' taa'ni'anta oro'paru', nani manikuma duaa'ke mononopa'pina' nopa'nii', kaara-koo dau donkonuio', ee'noko kivora-ita keura beento'ke bore' koroaio' baakopo-pina'. 2Teni teni tooto'po'nani ee'noko paroo'nang due'uma sisikeeravoma baiarako'. 3Ee'noko teketa napo' nii'nung taa'ni'anta oro'paru' teke paning-koo, narung kapoo' pakia-pina'oro' aa'na' pankaing urumpumaung, bore' ~kenaanka-taa ee'noko kaintang kivora otoing, ee'noko napo' baakopo ~kenaanka-taa kurunii' bore'koo. 4Ee'noko bakaang baringe beento'nanka paning-kooning-koo beenaumo-nariong-koo nariong kii'ni'puru' depeto kansi'aape. Teketa tee pakia teni-anko manikuma-anko uro'kanoo' donkonuu' tee bauring tooto' teka paravuko maa'uu'naang. 5Teketa tenie tee bauring tooto' donkaani paravuu' ookara nantoong kansi'koo-nupoong tanatavuriaing tee ninka donsi' aini-koo nkonii' kompui, ee'noko tee tooto' tee Kumponing-anko koo'antavau' te' bakanoo' ba'nava'nani'doma. 6Teni manikuma mee'bora' sirakamaa'aape koo'aru' te' Kumponinge teni maamu-antaevuu'noo' teka tareaava'naang doong narung kokorei'keta kenaanka daaku' bera ~narung-taa kivora-koo [1260]. 7Teketa paning-koo kare pankaing tavo'kuu'. Tee Maikol bakaning koosinunanka ninka ee'noko napo' tee pakia bakaning koosinunanka ninka nari' taveu'. 8Teka tee pakia boong deempaara teing-ninka bakaning koosinunanka-ninka napo' paning-koo oto'koo taura'paava'. 9Teketa tee pakia pankaing kansi'aape doonko dua'au', tee tee boru' tee uripo'keta otomaung miring ma'naang Sietani' tampaakoo', tee ookara nantoong kansi'nupoong poo-antavurimaung. Tee kansi'koo doonko dua'aaru' bakaning koosinunanka tee ninka nari'. 10Teketa narung aurong aa'na' karoko teke paning-koo taaravantu' aa'puko, “Enang tee niikaang domang-anta poing tee ninka iri' ee'noko tee muu' tee niikaang Kumponing bakaang, ee'noko teie tero Pako'pari'uu'nunge~ bakaang purinto' sira'paring. Ai' tee nii'maikorori' too'dempurimaung teke niikaang Kumponing-koo uro'kanoo'ke aa'ning-koo doong ee'noko muung tee doonko dua'aing. 11Teinge tee Sietani' puru'au'noo' tee tee ninka ereng Kampia bakaang ee'noko napo' karai sira'paama tee kapoo' koonto' teie teing-koo nkovuu'nung koonto' boo'koo aa'na' taura'pariri. 12Tee'koo doturaravaing da' paning, ee'noko dii' teke otorining. Teka piaaru' da' kansi' ee'noko teke otorining ee'noko da' pirung teing ookara kapoo'nanka da'koo otoroining ninka, ai' Sietani' tee doonko dii'anko siaring koonto' iiravoi otong, bakaang batei apukung noru'ui.” 13Teketa tenang teie pakiai kansi'koo doonko dua'aio' ooarara teie tee teni manikuma tee tooto' donkaani paravuu'nani manki'anta tutumpuu'. 14Teketa tee teni manikuma mareoi' pankaing-kooning kupa' kenaanka avau' purerenuu'naang. Ee'noko purerenura te' teni oto'koo miru'nii'noo' mee'bora' sirakamaa'koo beu' teka tareaava'naang mare' beemareu-koo ee'noko namaranoo' teie pakiai kompu'neeng-koo. 15Teketa teie pakiai karang-eta ntong pankarei kurimpuu' teni manikuma siompuma nkavuu'naang teie douai. 16Teka kansi'ke teni manikuma pakuvuma kamaankura tee ntong teie pakiai karang-eta kurimpuko teka dunkumpuu'. 17Teketa tee pakia aa'na' iiravora kare tutumpuu' teing nii'ning teni ee'nani baurukaa' tavu'koo, teing ee'ning Kumponing bakaang boto siompaamaing, teing aa'ning Jiisuu' bakaang kara sira'puu'nung pinka'ai otoromaing.

will be added

X\