Revelation 11

1Teketa teie koosinunge purinto'ke ning Jooni narung donsi'pina' oro' paaranang-nko amuu', ee'noko amuma aa'muu', “Deto donkonira Kumponing bakanava pankava dootuu'nava oovei otoinava paaranampeai ee'noko boonturoma nari'. Ee'noko napo' teing teke dootuu'arimaing deerueriai. 2Teka dama'du-navaro pava dootuu'nava pankava-koo paaranampeauka'. Tamung sipeai tevaro, ai' tevaro tevaro Ju'deeaing biikanavaro. Teinge mmemme'aava'naang te' osi meekamono, Jerusalema'namono karenaumo kivora-ita keura kaara-koo. 3Ee'noko ninge napo' kenaanka nakaronaanka~ nkanaanka kara-sira'ka iri' avompeta botoampeko tarampeearema daankiareaing narung kokorei'keta kenaanka daaku' ee'noko ~narung-taa kivora [1260] doong-koo, baarong mutaange duaanavaresi. 4Tenaanka ee'naanka temu' Daari Meekung-koo kevarira olive'ke miru'uretu'naanka, ee'noko napo' kenaanka daamu-ba'nange miru'uretu' teke Ovoring ookara kansi' tarevumaung-koo uro'kanoo'ke donkonuresi otoremanaanka. 5Ee'noko nii'ninge tenaanka tavaaree'naang nkoaareko deeko' tenaanka-koo karang-eta nta' bakoarara taivuriaing teing. Tee' ee'na' nari' booroaing teing tenaanka oraka' nko-koo piavoroaining. 6Napo' tee tenaanka iri'po'naanka aa'ning nko-koong: paning avo'koong apo'uaroo'naang tenang tee doorenang Ovoring bakaang sira'purema nanureko, ntonanka ereng deeng-anta-koong, ee'noko ookara kansi'nupoong-koo amutemurii' doovaang tavo'anta-koong bee'ka piavoreaina'. 7Ee'noko tenang tenaankai nakaronaanka bakevureko tee beekaang kara sira', tee biiko teieta dinkung tumangropa-ita bakoaravainge tee tavu' tutumpuaing tenaanka-koo, ee'noko tavurema puru'ureta bakei dupisi'uree'naang tenaanka. 8Ee'noko beekaang mono ta'monko' teke taung-koo pankamono-koo miring Jerusalema' tampaamanamono-koo bemparesi otoreaing, temono ee'namono-koo beekaang Ovoring aa'barata'koo taakavaara boo'antavau'namono-koo, nii'na' miru'aama Sodom ee'noko Iisipi' tampaakoo'. 9Doong beenang ee'noko namaranoo' aa'ning-koo nantoonge tenaanka teka ooaareaing aa'ning-eta: nantoong amutemuu'keta, nantoong avitevitu-eta, kara amutemurii'keta ee'noko napo' nantoong ookara kansi'nanka-ita. Ee'noko taura'paariauka' dako'koo. 10Ee'noko teing nantoong kansi'koo otoromaing dotuarima baravaraeariai~ tenaanka boo'pareaing-koo, asiara aveema, tenaankai ee'naankai nakaronaankai pore'antavaarimanoo'koo.” 11Ee'noko teie koosinunge tee kapoo' nkoaravaing kato naumuko ooansio' tee domaang Kumponing-eta pora tumparu' tenaanka-koo, teing beenang doong-eta namarang tankinuko. Ee'noko tenaanka deto donkonuretu', ee'noko ookara nantoong ooaareko'ning bakei aa'na' avoreau'. 12Ee'noko teketa teinge nantoonge auronge paning-eta aa'na' bokuma karavureko taaravau' aa'puko, “Doompeto poreai.” Ee'noko teinge beekaning kare-nupoonge tee ooaaresio' teketa deto paning-aape koinuretu' kamo'koo meu'ke. 13Teketa tee-koo batei-koo pankaing u'mi' nkoarara osi pankamono-koo narung kivora-koo pavananka pesi'arako ooantu', ee'noko nantoong ~kenaanka-taa kokorei' tavurira dupisi'uru', ee'noko sipariru'ninge avoreaara Kumponing paning-koong daangampau'. 14Tee kenaanka-nung arikung tee' bakearavaing, ee'noko teketa due'ka beenaumo-nung arikung tavo'kuaing. 15Teketa ~kenaanka-taa-nunge koosinunge bakaang tuuviri puumpuko ooantu', ee'noko paning-eta nii'ning auronankai bokiaama aa'pau', “Teing ookara muu'nanka kansi'kooning teing enang tenaanka tee niikaang Ovoring Kumponing ee'noko tee bakaang Pako'pari'nii' beekaning deempariring, ee'noko ookara batei-koo o'meeva-koo tarevurematoaining.” 16Ee'noko teinge kenai'ka-ita karenaumo ovontunge biikaning ba'nava'nani'nairu-koo ba'nani'ai otoromainge Kumponing-koo uro'kanoo'ke dapuu'kai dua'arima tee Kumponing daangampau', aa'paama, 17“Ovoring, da' tee Kumponing ookara purinto'po'nung, tee tee' nari' otomaung-teroita otou'nunge, e'mung tee' otong, ee'noko dama'ke tee' nari' otoi poainge. Dakaang iri' pankaing kompei daurarong~ deentari otomaung. Tee'koo nii'ke tampara tampampimaang da'koo. 18Teing nantoong ookara mutaanang-nupoonge tee da' aa'na' iirareraamaung, teka enang dakaang iira mantompaava'naang teinge, ee'noko batei tee emu' makotuing teing boo'nuka teing enang da'koo uro'kanoo' donkonaako simpe'erii'naang. Ee'noko enang tee teinge dakaninge botovotonaa'nukai moo' nkavaava'naang, aa'ninge: nakaro-nupoong, ee'noko teing koonto'nuka, ee'noko napo' teing da'koo amaiaa'oroma da' siontaamainge nkavaava'naang, ookenge aa'noko teing miring-po'nupoong ee'noko miringropanuka nari'. Ee'noko teing kansi' orari-antavaamaing teing enang orari-antaverii'naang.” 19Teketa Kumponing bakaang pava meekung paning-koo daate'arako ooantu', ee'noko tee Kumponing bakaang kara naroong-anta koong bokita sirapo'ke otou' teke pava meekava-koo kuunge, ee'noko te' otoko pipirakaie arakavuko kurunkurung ninka ninininimpuma u'mi' nkoaru' ee'noko apo' kamaarie moomparama kapang kaa'omana' kaa'ora kansi'koo doonko tumputumpurunang dua'aru'.

will be added

X\