Revelation 10

1Teketa narung koosinung bakei purinto' paning-eta siarako ooantu' kamo'ke mononopa'pina' nopa'ari, ee'noko bore'koo daue eeravo otoing, ee'noko bakaang oing duaa'pina' oro', ee'noko bakaning kau' ookanau'ka nta'pina' urumpario'. 2Ee'noko birenge oki'naa buuku bere'ario' kompui pou'. Ee'noko pora aa'nou' bakaang kau' tampanau' pirung-koo donkonuu' ee'noko mare'anau' kansi'koo donkonuu'. 3- 4Teketa aa'na' bokuvu' laioni-koong aurong-pina' karoma, teketa tee karoko kurunkurung ~kenaanka-taa tompoo'kaama kareaako ninge daariama'naang nkomarako narunge auronge paning-eta karoma aa'puko taaravantu', “Sira'peauka' tee kapoo'nanka teinge ~kenaanka-taa kurunkurunge minkuainanka, ee'noko daarieauka'!” 5Ee'noko tee ee'nara koosinung pirung naanka-koo kansi' donkonuio' ooantu'nung deto paning-aape toonuu' bireng tampanaang. 6Ee'noko teie maraka-anta nkovuu' tee-koo Kumponing tee' nari' otoi otomaung bakaang miring-koo, aa'nung paning, kansi', pirung ee'noko teing ookara kapoo'nanka tenairu-koo otoromananka nkovuu'nung-koo; aa'puu', “Batei neng-koo makotua'. 7Aing-koo doonanka-koo tee ~kenaanka-taa-nara koosinung maamuarama otoko bakanareng tuuviri puung-koo, Kumponinge tee bakaang makensi'nung maromaro oro'antavuu'naang, tee' ee'na' teing bakaning nakaro-nupoong~ tero nauvuru'na'.” 8Teketa napo' teie auronge paning-eta karoko taaravantu'nunge karoma aa'puu', “Bera tee buuku nkaveai bere'ari otoing koosinung-koo bireng-koo, tee-koo pirung naanka-koo kansi' donkonui otoing-koo.” 9Teketa ninge mera tee koosinung eentavantu' amuu'naang tee oki'naa buuku. Ee'noko teie aa'muu' ning, “Nkavera maa'eai. Karang-koo davainta-pina' tarii'doo'naang, teka dama'ke maa'era tee dakaang pakosii'koo tee tokaa'doo'naang.” 10Teketa ninge tee oki'naa buuku koosinung-koo bireng-koo nkavamira maa'antu'. Maa'amira karang davainta-pina' tarii'mou', teka dunkumpamira pakosii' tokaa'mou'. 11Teketa aa'muu', “Bera napo' tarampeerarama~ sira'peaing kapoo' dama'ke tavo'kuaining teing-koo nantoong mmau'koo osi kante-nupoong-koo, napo' kara amutemurii'koo ee'noko napo' ookara dauraronanka-koo.”

will be added

X\