Philemon 1

1Aung ane' karavoto~ ninge Paula'ke daariamang anke Karistoo' bakaang doorenang sira'pamaunge kiimatamau'noo'ke o'noi. 2Napo' Timoti'ke tee nee'maiko'ke daari-koo pakumui dii'anko daariampemaang, aa'noko Pilemoni, nee'maiko' piaavampemaung ee'noko Karistoo'koo kuunge nari' mintoomarimaung; Apia, teni nii'mari Karistoo'koo kuunge; napo' tee Akipas nii' ninka manta' Ovorinung piikonara; napo' teing Karistoo'navitu da' Pilemoni dakanava-koo dootuu'arii'naang oosiarimaing-anko. 3Biraanke ee'noko mooa dii'koo otoaing Kumponing Niuma-itaing ee'noko teieta Ovoring Jiisuu' Karistoo'. 4- 5Tampa' tampamaung tee-koo nkaang Kumponing-koo ookara batei-koo kunsimarama da' pakuransi, taararama dake Ovoring Jiisuu' masika'antavemaung-koo ee'noko teing bakanavitu piaaverikoo' ookara. 6Ee'noko tee kunsimaramaung tee dakaang masika'anta minkuei tankaampeko ookara kapoo' tampeng nii'ke Jiisuu' Karistoo' koo kompampimaing sira'paraa'naang. 7Ai' ninge tee doturotu pankaing ee'noko dunsirunsi~anta nkavamaung dake mmaiko'ke teing Karistoo'navitu piaaveri biikaang domang kuaa'antaveriko. 8Temeng-koo noru'ama, bane Karistoo' bakaang kara-okomui-nkanara deemari ning makosi da' etu-koo aarumo koonto'namuriau nko-koo; 9Teka piaae dai'muresio' tamung eentaramang dake Onesimas tonta'antavee'naang oraka' nkoruu'nung-koo; 10Ninge Paula'ke pankarai ee'noko enang Jiisuu' Karistoo'koo kiimatamari o'nong, bauma deemari o'noi anke kiimatanoo'ke da' baitoramang tee Onesimas da'anko poko oovera tavea' onkeonke'eaing, nnuring makosi deempario' Karistoo'koo kuunge. 11Tero tee dakaang botovotonaa' deempari teie da' tampa' pakuruarukotaa' mmaruu' da'ankoita, teka Karistoo' nau-antavansio' bere'arara tampara pakupakunara deemparieeng neekaang. 12Ninge tee enang da'anko botoamaang nkaang domange aa'na' dai'ansi. 13Anke ning-ankoi oto'koo aa'na' piamoi otong ning tampara doorenang-koo kiimatamau' noo'ke o'noko pakumuu'naang dake pakumepeu'noo' makosinoo'. 14Teka makosi ninge pinka'ampauka'nung dake taura'pearuko deeko'. Ninge da' eturamparoo'naang ning aunge pakumuu'naang, daka dakaang aroo'keta tee' nko-koo makosi. 15Ee'koo da'ankoita oki'naa batei-koo tenkenuu'noo'koo Kumponinge dama'ke da' ninka ookara batei-koo otoree'naang miru' uu'nung, tamung botovotonaa'pina' kato noru'ea', teka botovotonaa' puru'uio' nee'maiko' noru'eai, neera'ma'nung makosi deempario'. 16Ee', ninge tee aa'na' tampa' noru'amaung deemparako dake napo' deto basinoo' noru'eaing, ai' tee tee dakaang naning, dakaang botovotonaa' deempari otoko. 17Tee'koo dake ning da'maiko'pina' noru'memaung deeko', aung kiimatavea' tee ning onkeonke'mepeu'na' onkeonke'eaing. 18Ee'noko da' oraka' nkoruu'nung deeko' nii'noo' bakiaa'deruu'nung deeko' ning nkaang komaaru~ deeng-antaveko moo'ampaing. 19Aung avaro kara ninge Paula'ke nkaang birenge daariama aa'pamaang, “Dama'ke moo'ampaing,” teka ninge napo' minkuampauka'nung da' Pilemoni pakuransio' domaang isikung nkaveu'nung-koong komaaru ning-aape otoing. 20Ee', ee mmaiko', tampa' onkeonke'eaing tee dakaang botovotonaa' dake ning dotu-antameaina' Ovoring-koo nkaang domang kuaa'antamema Karistoo'koo. 21Aung kara ee' noru'ansi daarireromaang dake koonto' meumee'naang minkuansina' divu'ui otoko dau basinoo'. 22Napo' aa'damaang, “Pava-koo-navaro maamu-antamemuai mora aatumpainoo', ai' tee ninge ee' noru'amaang kiimatanoo'keta bake-antamaava'naang kunsi-koo pakumerimaung-koo. 23- 24Teie napo' Epaparasie ni'ninka nari' Karistoo'koo kiimatamaresi o'noremaunge tampa' tang botorerurimaang, napo' ainge ni'ninka nari' mintoomarimaing aa'ninge nee' kiimatanoo'ka pakumaarekoo': Maaka', Aristakas, Dimas, ee'noko Luuke'. 25Tee biraanke tee niikaang Ovoring Jiisuu' Karistoo' bakaang dii' diikaang tanuaang ninka nari' otomatoaing. Ee', Masikung.

will be added

X\