Philippians 4

1Tee'koo bakei tee' nari' Ovoring-koo masika'antarariri otoriaing, ee mmaikori', ai' dii' teing ninge aa'na' piaarampimaing, ee'noko aa'na' oo-koo piamokoo' dii' nkaning doturotunuka ee'noko nkaang nko-nko-koo moo' makosinanka deentaririo'. 2Dee' Iuodia naanka ee'noko da' Sintiki aa'dampemang, dee' tee-koo Ovoring-koo kuunge napo' navurareaing. 3Napo' dake Sisikusie pakueresio' tenaanka manikumaara nari-antaveereai beekaang mankimanki'keta, ai' tenaanka tenaanka ni'ninka nari' manta'marimanaanka doorenang tampara bereng-anta-koo ee'noko tee Kelemeni nari' teing ninka nii'ning nari' mintoomarimaing, aa'ning niikaang miring tee tene'koo buukunane' domamariaining o'norinane'koo daariariri otong. 4Doong kante Ovoring-koo doturoturariri otorimaatoai, napo' unampama aa'pamaang, Doturariri otorimaatoai! 5Ookara kapoo' nkoveriaining-koo nantoong-koo dutakanoo'ke onou tampara oro'antaverimatoai, ee' noru'eri, Ovoring poainoo' tee due'ui otong. 6Kapoo'nanka-koo baru' noru' otoriauka', teka ookara kapoo'nanka-koo tee Kumponing eentaveriai kunsirarima tampa' tamperima diikaang domang-eta. 7Ee'noko teie Kumponing-nung mooai pankainge nantoong biikaang matau-koo dau basie mankimanki'keta unaa-anta aruriaing tee diikaang domang ee'noko diikaang onou Jiisuu' Karistoo'koo kuunge. 8Ee mmaikori', asi'namoora'koo aa'dampimang, “Aing ee' oro'ning minkuama'naang dii'ke norunoru'eriaining aa'ning: tee kapoo' masikung, tee kapoo' pankaing-anta-koo makosi, tee koonto', tee kiiroraa', kapoo' piaa-koo makosi, tee miring tampara-po'nung. Nii'ning kapoo' tampeng daangang-koo makosining otoko deeko' makosie dii'ke teing norunoru'koo. 9Ee'noko teing teing kapoo'nanka ninge naurampiko taaraverira noru'ke pinka'eru'ning ee'noko teing ning-koo ooverira barerariru'ning teing tee' nari' napo' dii'ke nko-koo paaraveriaining. Tee' nkoveriko tee Kumponing mooa-po'nung tee dii' ninka nari' otoaing.” 10Bakei aa'na' dotumaring tee-koo Ovoring-koo diikaang piaa ning-koo napo' daa'antaverieeng-koo mmau' batei tamung tankinuio'. A'noo'koo tee dii'ke piaameri paararariko' diikaang avuavu' boto-koo, teka taung otoaruko ning-koo da'deng tavo'aravaruu'. 11Teka aa'peri'neenga, “Tee pa bakei aa'na' papovura tee' minkuvuing.” A, ning aa' tee bakei datamoi o'nomaung bane aremurii' batei-koo. 12Ai' ning tee kapoo'koo apuka'mari oto'na'koo datamou'nung ee'noko napo' mmau' oto'memui oto'na'koo. Ning baremaru'nung tee kapoo' makensi'nung amutemurii' batei-koo tampa' nari' datavoi oto'na'koong, aa'noko poomui deeko' nii'noo' peeramoi deeko', nii'na' mmau' oto'memui deeko' nii'noo' apuapuka'koo o'noi deeko'. 13Ninge tee ookara kapoo'nanka Karistoo' bakaang purinto'koo kuunge nko-koo makosi. 14Teka tee makosi tampara dii'ke nkaang arikananka-koo ning pakumerimaung-koo. 15Napo' dii'ke Pilipai-nupoonge tee tampa' noru'eri otong, tenang urikamu' tutuna' ninge tee doorenang tampara daankianko'nang, Masedonia'keta tenkenansio' dii' nainge avuavu'nanka tankaamperima ning makosi-antameru'. 16Napo' teie, bane osi pankamono Tesalonaika'namono-koo basimarako, mmau'namu'pie diikaang pakupaku be'antaveru' papoansi o'noko. 17Teka ninge avuavu'nanka nkavampaina' besi'ampaung. Tee kapoo' pankaing ninge oo-koo piamoi o'noing tee sinang tampara, Kumponinge diikaang tampara nko-nkonanka-koo deeru-koo dau be'nu'umaung. 18Tee diikaang avuavu' tee Epaparodaitas averio' nkavui pou'nung tee enang nkavansing. Tee bakei mmau' masikeng bono' divu'ui otong. Aa'na' maanto'muing. Tee avuavu' tee boontunang makosi tampa' nuuraa' Kumponing-koo, ai' Kumponing tee boontunang temurii'koo dotuaramaung. 19Ee'noko teie nkaang Kumponinge teing ookara kapoo'nanka dii' apuka'dariaining aruriaing, mmau' aa'na' makotui otoko teieta bakaang paning-koong o'meeva-ita Jiisuu' Karistoo'koo kuunge. 20Bakei daangang Niuma Kumponing-koo otoi otoaing ookara batei-koo. Ee'. 21Nkaang tampa' tang nauereriai teing ookara meekupoong Jiisuu' Karistoo'koo kuunge. Ainge mmaikori'ke ni'ninka nari' o'norimainge dii'anko biikaang tampa' tang botoaamang. 22Ookarai Kumponing bakaning meekupoonge anke Rooma'ke otoromainge tampara tampaamaang dii'koo, baru'noo' teinge botovotonaa'nukai tee daurarong~ Siisa' bakanava'kooninge. 23Tee biraanke tee Ovoring Jiisuu' Karistoo' bakaang diikaang tanuaang ninka nari' otomatoaing. Masikung.

will be added

X\