Philippians 2

1Ee aing, ning dotumari o'nong dii' aing aa'ning oto'derurimaung-koo: tee domang kuaa'anta Karistoo' ninka narung deentarira nkaveru'nung, ee'noko napo' tee bakaang piaae dunsirunsi~anta-koong, ee'noko tee bakaang Tanuaang-koo kuunge navunavu, ee'noko napo' dii'ka pankaruntoong-eta piaareeri otorimaung-koo; 2makosi, dii'ke nkaang doturotu dupe-antaveriaing narung noru'koo otori, nari' piaareeri, napo' nari' onourariri kapoo'nanka nari' nkoverima. 3Deikoo'na' ee'noko baka daangana' nkorariauka', teka dii'ka boonko noru'dariri deto pankaing-antareerimatoai. 4Dii' naruna' naruna' mintoontarima nii'ning nari' paku-koo mintoontariaing dii'ka dii' naing noru'daria'. 5Diikaang aarumo tee' nari' Jiisuu' Karistoo' bakaang-pina' noru'dariri otorimaatoai. 6Bane Kumponing-pina' nari' oro'ke, teka baka etuarava' Kumponing-pina' nari' basi otoo'naang. 7Baka naning tamunsi'nung deeng-antavaru', tee naning botovotonaa'pina' oto'antavarara. 8Ee'noko bakei naning-pina' masika' oro'paru'noo'keta baka boonko noru'ari Kumponing meumpuitaa' boo'koo taura'paru', bane aa'barata'koo oroo'ke boo'koo. 9Tee'koo Kumponinge kansi'keta deto a'dei' ookara-koo dau i'ampura teka tee miring pankaing deto basi ookara-koo mirinanka-koo avuu'. 10Ee'noko ookara nantoong aa'noko paning-koo-nupoong ee'noko kansi'koo-nupoong, napo' kansi'koo boong-nameng-nupoong, teing tee-koo Jiisuu' bakaang miring-koo kinkinaavaing. 11Ee'noko napo' teinge ookarai Jiisuu' Karistoo' tee Ovoring sirakura' tampaavaing, Bauma Kumponing meenasi oko-antavai. 12Tee'koo, ee mmaikori', tee' nari' ookara batei-koo Karistoo' bakaang kara meumperiko'na' enang napo' tee' nari' meumperimaatoainge, tenang ning dii'ankoi o'noko naro' deea', teka baru'noo' tenang ning dii'ankoi o'noaruko tee' nkorariaing, monkeena'dariri tee diikaang domanturiaing tampa' dupe-antasiiriaina' aroo'eri mintoontarima. 13Ai' tee dii'koo mintoompari otomaung tee Kumponing, dii' paku-antaruri tee aroo'erira bakaang pia siomperii'naang. 14Ookara kapoo'nanka nkoverima minkuminkunanka nii'noo' tata'deerima nkoveriauka' tuumpiropanuka otoriaina' ee'noko kiiroraa'nuka, Kumponing baurukaa' kararopanuka anke kansi'koo oroo'ke koomparia'navitu ninka otorimaing. 15Teing-koo ee'ning-koo meu'ke arakarariri otoriaing beento'nanka paning-kooning-pina' tee kara domantoo' deto komperi ookarai ooaavaina'. 16Tee' nkoveriko dii'koo aa'na' dotumaravaing Karistoo' poaina'mung ee' noru'ama: dii'koo amari mintoomarakotaa' tamung pore'moaruu'nung. 17Diikaang baito tee boontunang tampara makosi Kumponing-koo, ee'noko ning dupisi'maavaing deeko' nkaang ereng tee-koo boontunang-koo dau dakoaravainang ning tee dotumaravaing dii' ninka nari' dotumariaina' noru'ansitaa'. 18Ee'noko napo' dii' teinge ni'ninka nari' doturariaining. 19Ovoringe Jiisuu'ke taura'puko tee Timoti dii' Pilipai-nupoong-anko namu'ke botoama'naang, ning-koo dooreruriko doturarii'naang ee'noko toroarako diikaang doorenang taaravamira dotumaravaina' nari'. 20Nii'nung naning noru'ampa' Timoti-pina' mantong, napo' dii'koo onou aa'na' otoing. 21Nii'ning nantoong teing kapoo'nanka biikaning naing tanata-koo otoromaing, Karistoo' bakaning sipai. 22Teka dii'ke Timoti bakaang aarumo tampa' noru'eri otoring tee teing pina' deea', ai' naninge bauma pakuvumaatopeu'na' nari' teie ning aa'na' pakumumaung tee doorenang tampaara bereng-anta-koo. 23Enang tee dii'anko namu'ke botoama'naang piamomaang, tokoona' ning o'noaina' baakeenemarara. 24Ee'noko ning tee'ke Ovoring-koo aroo'mari aa'pamaang, “Ning da'deng simpiri'antamaako dii'anko dama'ke moo'naang.” 25Teka io' tutung tee Epaparodaitas dii'anko napo' botoama'naang tee ninge mmaiko', nari' mintoomaremaung ee'noko nari' ni'ninka nee' piatoorora~ baito-koo kuunge. Teenoo' tee diikaang naning, kapoo'koo ning apuka'maramaing-koo pakumuu'naang botoveru'nung. 26Ee'noko tee dii' aa'na' oo-koo piavoi otong. Ai' tee tee enang manki'antavari otong siipavou'na' taaraverira mi'miinki'doriko noru'durima. 27Ee', masika', tee tee dapi' boo'paru'nung, teka tee Kumponinge piaavura domang-antavuu'nung. Teka tee narung deea', tee aa'noko ning piaamura Epaparodaitas domampuu', orarunsi ning-koo pau'eere'neeng-koo. 28Tee'koo dau basina' dii'anko boto-koo piamoi o'nong dii'ke napo' ooverira doturoturariaina', ee'noko nkaang orarunsi birimpuai. 29Emu' tee te' dii'anko basiarako bakei aa'na' onkeonke'eriaing Ovoring bakaang miring-koo aa'na' doturariri. Ee'noko nantoong tee-pina' oro'nuka pankaing-antaverererimaatoai. 30Ai' tee tee dapi' boo'paru'nung tee-koo Karistoo' bakaang-koo nko-nko-koo kuunge; boo'koo taura'paru' ning pakumuma dii' isipo' otori makosiriaruko.

will be added

X\