Philippians 1

1Aung ane' karavoto~ ninge Paula'ke minkuanko Timoti'ke daarivuma nee' Karistoo' bakanaanka botovotonaa'kai dii'anko botoampemang nantoong Kumponing bakaning meekupoong Pilipai-navuntu'ke Jiisuu' Karistoo'koo kuunge otorimaing-anko, tanatanuka ee'noko pakupakunuka-anko nari'. 2Biraanke ee'noko mooa dii'koo otoaing Kumponing Niuma-itaing ee'noko teieta Ovoring Jiisuu' Karistoo'. 3Ninge tee dii' noru'dampima tee-koo nkaang Kumponing-koo tampa' tampamaung ookara batei-koo. 4- 5Ee'noko nkaang kunsi-koo dii' ookara pakurampima tee ning ookara batei-koo doturotu ninka kunsimaramaung, dii'ke tampa' pakumerimaung-koo tee doorenang tampara bereng-anta-koo, teketa tutung komperu'noo'keta bera e'munung doong-koo basinoo'koo. 6Ninge masika' tasi'pansi o'nong teie Kumponinge tee nko-nko tampara dii'koo tutung-antavuu'nunge be'nu'antavui otoaing tee, bera te'mung tee Jiisuu' Karistoo' toroaravaina'mung-koo basi. 7Bakei makosi ninge dii' ookara tee' noru'koo, ai' dii' teing ning-koo domang-koo otoring, dii' ni'ninka narung-pina' o'norimaing. Bane tenang ning kiimatanava-koo o'noi ee'noko napo' tenang ninge doorenang tampara pakuansi puring-antavamanang, dii' teing ni'ninka nari' tampa'nko Kumponing-etaing kompampimaing. 8Kumponinge masika'antamupeu' naurampiko tee' ninge dii' piaarampimana' teie piaae Jiisuu' Karistoo'koo pankaruntoong-koong-eta pomaunge. 9Ee' pina' kunsimaramaung dii'koo: tee diikaang piaa tee' nari' deto aa'na' dupui otoaing, tee ninka norunoru' masikung ee'noko tee matau tampara. 10Aa'noaina', dii'ke ookara aarumonanka tampa' simpe'eri kiiroraa'dariri tuumpiropanuka otoriaing bera Karistoo' poainoo'ke basi. 11Ee'noko teinge aarumo koonto' bakaninge sinanankai maanto'duri otoriaing Jiisuu' Karistoo'keta pomainge Kumponing pankaing-antavui daangang-kooninge. 12Ee mmaikori', enang kiimatamainoo'koo dii'ke aung noru'erii'naang piamoing, teie kapoo'ke ning-koo nkoarinunge tee doorenang tampara tampa' aa'na' masika' beremparu'nung. 13Bera tee ookarai amono-koo otoroininge aa'noko teing kiimatanuka ee'noko tanatanuka nari' tee ee' noru'aing: Ning tee tamung boturopa kiimatamaava', teka ning Karistoo'koo botovotonaa' deemarako kiimatamaing. 14Ee'noko ning tee ee' dai'mari o'noko daping ookara nantoong mmaikori' Ovoring-koo purimpariri bia'oromaung bakaang kara aroo'keta sira'paama avoreaava'. 15Masika' nii'ninge tee doorenang tampara mamairo ninka daankiaamaung ning Karistoo'ke siong-antamumana'koo mamairoarima. 16Teka nii'ning tampara onou ee'noko piaa ninka daankiarimaung tee' tasi'mai a' kiimatanoo' si'mau'nung tee doorenang tampara puring-antavanko. 17Teinge mamairo ninka daankiaamainge tee Karistoo' onou kiiroraa'keta daankiaava', teka aing aa'ning onou-koo otoko daankiaakoo': baka-noru', baka daangang, maroita ning aa'na' manki'antamaava'naang kiimata-koo o'noko. 18Teka tee makosi, kapoo' otoa'. Tee kapoo' pankaing tee Karistoo' daankiaamaung bane teie teinge ookenge taunge, aa'noko daang noru'ariri ee'noko aarumo masikung ninka. Teka ning tee dotumari o'nomaung teinge Karistoo' daankiaamaung-koo. 19Ee'noko tee' nari' dotumari o'noaing, ai' ninge tee noru'ansi o'nong dii'ke kunsi-koo ning pakumerimaung-koo ee'noko napo' Jiisuu' Karistoo' bakaang tanuaange pakumumaung-koo botue tee unaa-anta kompampaing. 20Ee'noko ning aa'na' dotumari nemari o'nong tee kapoo' tavo'kuaing-koo, maia'moauka'na' noru'mari, teka amanampa' monoi ookutununge Karistoo' pankaing-antavampaing tee' nari' uripo'keta nkomaramana', bane aa'noainge: domang o'noi o'noaing deeko', ee'noko dupisi'maavaing deeko'. 21Ai' domamari o'noi Karistoo' tee ning nkaang domaang, ee'noko moomira deeko' tee dupeari otoko kompampaing. 22Teka ning nkaang mono tee' nari' domamari o'noaing deeko' tee ee' oro'pari otong, nko-nko doma ninge tampara sinang-po'nung nkoampaing, teka tee ning meu' ke'me'mari o'nong kenaanka noru'koo. 23Boo'koo pia o'nong Karistoo' ninka nari' o'noreaina'koo, tee' tee' bakei aa'na' tampa' masika'. 24Teka kapoo' pankaing dau basi tee domamari anke kansi'koo oto'koong dii' iri'antarampima. 25Ee'noko ninge enang to'biimari tee ee' tasi'pansing: ning doma dii' ninka nari' o'noi pakurampiri puring-antarampimatoaing diikaang masika'anta-koo ee'noko napo' tee-koo diikaang doturotu. 26Tee'koo ning napo' dii'anko basimarako dii' ning-koo doturarima dii'ke tee Karistoo' daangamperiaing. 27Otori tee' teie doorenang tamparai Karistoo' bakaange tampui otoina' nari' otorimaatoai, bane ninge moma beero'dampiko ee'noko beero'dampia' dii'keta taapo'ke o'noko deeko', ai' ninge dii' teing narung onou-koo purintariri otoriko taara-koo piamoi o'nong, ee'noko narung noru' ninka pakureeri iveka'doriai tee doorenang tampara masika'antaveri. 28Diikaning kare-nupoonge bane arekee' tokoona' nkoraariko aroreria' otorimaatoai. Tee' taa'ni'antarariri otoriko teinge tasi'paavaing doong asi'na'mung kera'pariaing-koo dii' domantariko, Kumponinge ee'nunge pakururio'. 29Ai' Kumponinge tampara otooto'koo bokururima Karistoo' masika'anta narung-koo miru'duria', teka ookeng-koo masika'anta ninka arikananka nari' kune'koo Jiisuu' bakaang miring-koo. 30Ai' dii' ninge tasi'dampiri otong dii' teing arikananka kune'erima pore'dorimaing tee' ninge arikananka-koo pore' kompanko oomeriko'na' ee'noko enang napo' tee' nari' pore'moko taaramerimaang.

will be added

X\