Matthew 9

1Teketa Jiisuu' bakaning ninka bakaasi-koo aa'earira pako'arira bakanoo' osi masipo' tavo'ariru'. 2Teka nii'ninge nantoonge naning doota tee-anko tavo'au' batanang-koo bempario'. Ee'noko tenang Jiisuu'ke teing tee tavo'au'ning biikaang baito oovura aa'puu' tee naning doota, “Domang manki'doauka', ee aung, dakaning orarananka tonta'deronsing.” 3Tee' nkovuko ooaara nii'ninge boto naunukai bii'ka kareaama aa'paako', “Aunge bakei naninge Kumponing bauvaupaa'umaang.” 4Teketa Jiisuu'ke biikaang noru' noru'ura aa'puru' teing, “Dii' aming-koo diikaang domang-koo kuunge tee' munkururarimaang? 5Arera kara masika'poaruko ooverira ning makosi deeaung tammeripeu' aa'ning-koo ee' minku-koo, ‘Dakaning orarananka tonta'deronsing,’ nii'na' ee' minku-koo, ‘Daa'darara naniai.’? 6Teka dii'ke iro' noru'koo makosi ning Tee Naning-naumpo' Paning-etaing tee taura' o'nong anke kansi'koo o'noi orarananka tonta'koo makosi...” Tee'pura tee naning doota aa'puu', “Daa'darara dakaang tani' nkavei naniai dakanava-koo.” 7Ee'noko tee naning deto donkonura bakanava-koo beu'. 8Ee'noko ookara nantoong karingai ooaara tee aung karang kamaankiai datavorou'. Ee'noko teinge Kumponing daangampau' tee temurii' taura' nantoong avuru'nung-koo. 9Ee'noko teketa Jiisuu'ke nanuma narung naning oovuu' miring Maatiu', taakisi nkavaako'nava-koo ba'nanuio' bakanavaro-koo. Teketa Jiisuu'ke aa'puu', “Ning siomeai.” Ee'noko Maatiu'ke deto donkonura tenang-eta deto tee siompui nanuu'nung. 10Teketa taamang nkovuu'nung-koo Jiisuu' ba'nanuu' bakaning barevare-nupoong ninka ee'noko nantoong mmau' nii'ning orenanka aa'ning taakisi nkanuka porora ba'naniaara tee ninka nari' taamanau' teke Maatiu' bakanava-koo. 11Ee'noko teinge Boto Keperuu'navitue tee' ooaarira teing bakaning tee siompaako'ning nia'aarima aa'pau', “Diikaang pankaing aming-koo taakisi nkanuka ninka ee'noko nantoong orenanka nari' taamanaamaang?” 12Ee'noko Jiisuu'ke tee' taaravura aa'puu', “Teing nantoong tampa' otoroining naninge nankai'urii'naang piavoroa', teka teing siipavoromaing naing piavoromaung. 13Berira io' tee kara daari meekung-koong-koo tampa' barerariaing aa'pumanaare, ‘Ninge tee aarumo piaa unaa-anta-po'nung piamoi o'nong, tee boontunang deea'.’ Ai' ning nantoong tampenanka-anko moa'. Ning orenanka-koo mou'nung nauaranko bere'aria'naang.” 14Napo' Jooni bakaninge barevare-nupoonge porora Jiisuu' nia'aama aa'pau', “Da' dakaning da' ninka nanirimaing arekee'koo dootuu'koong aarumo siompai unkumuariaung? Ee'noko nii' Boto Keperuu'navitu ninka unkumumarikoo'.” 15Ee'noko Jiisuu'ke maku'urima aa'puru', “Teing nantoong baranee'navitu nampeesi-koo poromaing naning nampeesinara ninka nari' otoroi arekee' napo' orarunsiaripeu' tee nampeesinara teke otoko? Batei tee otong tee naning nampeesinara teing-eta tonta'aravaina'mung, ee'noko tenang teing doong-koo unkumoariaing. 16Naninge tee baarong nerakara' urikara' ninka naro'ka pate'uarupeu', ai' nerakara'ke tera' urikara' beeto'uko dere'arara oraru'kupeu'. 17Napo' nantoonge nerakaru' uaininaru' urikaro'koo pare'aavarupeu'. Tee' nkoaako deeko' tee, tero' naka'arako teru' uaininaru' dakoarapeu' ee'noko tero' tenang oraru'kupeu'. Teru' nerakaru' uaininaru' nerakaro'koo deeko' pare'koo makosi, tee'koo ookeng tampa' otorepeu'.” 18Tenang tee' minkuvuma teke otoko narung pava dootuu'nava tanatanuka-koong narung tavo'arara tee-koo uro'kanoo' kinkinui eentavarama aa'puu', “Nnorang bakei enang oki'naruu'kuing. Porai'nange teni-koo bireng pante'eko teni domamparavai.” 19Teketa Jiisuu' donkonura tee ninka nari' beretu' ee'noko teing bakaning barevare-nupoong nari'. 20- 21Teketa tenang nii'nani naning manikuma kivora-ita kemare'ka-koo tarumatearako'nani tee-koo dama'du pora bakaang mononopa'koo kainu' kompuu', ee' noru'arara, “Bane oki'noo' kompamira bakaang mononopa'koo, ning teni taaremoainani.” 22Teketa Jiisuu'ke bere'arara teni oovura aa'puu', “Ani ee, da' doturaravaing. Dakaang baitoi taareroinani.” Ee'noko teni manikuma tenang ee'nang taarevou'. 23Ee'noko tenang tee Jiisuu' tee naning pava dootuu'nava tanatanuka-koong bakanava-koo koinura nantoonge patuaiarima, biromparima naampavaako oovuru' bakei karingai. 24Ee'noko teie aa'puru' teing, “Oko sirariai, ani nerai'na' booa', teka tamung aatumaang.” Ee'noko teinge benkempau' tee. 25Teketa teing nantoong karinga dama'du etuvurira teni nerai'na' otou'navaro-koo tumparara teie bakaang bireng kompui deto i'ampuko teni daa'aru'. 26Ee'noko tee-koong aung-koong doorenang tee ootukunairu-koo beremparu'nung. 27Ee'noko teketa nanuko Jiisuu' kenaankai naninkai kaputu'kai bokurema siompuretu' aa'purema, “Pankaing, Deevita' bakanaving-koong, Piaamereaing nee'!” 28Ee'noko teketa nii'nava-koo tumparako tenaanka kaputu'ka tee-anko poretu', ee'noko Jiisuu'ke nia'urema aa'puretu' tenaanka, “Dee'ke ee ning makosi masika'antameresi otong ninge piaroresina' nkorampee'naang?” Maku'urema aa'puretu', “Ee', Ovoring.” 29Ee'noko tenang teie beekaang duta kompurema aa'puretu', “Deekaang baito-koo makosina' nkoaravaing dee'koo.” 30Ee'noko beekaang duta tenang bantou'. Ee'noko aa'na' orokovuretu' aa'purema, “Teka aung naninge noru'uauka', makempereaing.” 31Teka tenaankai tee bereta Jiisuu'koong doorenang bereng-antavuretu' ootukunairu-koo temeensi'kooning-koo. 32Teketa napo' tenkenaako nii'nung naning ma'naange korivuko karoaruko'nung Jiisuu'anko tavo'au'. 33Ee'noko tenang tee ma'naang bata'uio' tee karoaruko'nung karou', ee'noko nantoong karingai ooaara ta'ninaara aa'pau', “Kapoo' ee' oro' ooampiaruu'nung teroita nii'koo Isireeli-nupoong-koo meu'ka.” 34Teka teinge boto keperuu'navitue aa'pau', “Tee aa' ma'nari biikaang pankaing bakaang iri'ke tee' bata'urimang ma'nari.” 35Jiisuu' tee tee' nari' osinankai pankenge ee'noko oki'nareka'ke nanuu' nau-antavurima biikaning pava dootuu'nanka-koo daankiarama, aa'noma, tampara doorenang daankivuma tee muu' paninung-koong ee'noko siipananka amutemurii' taare-antavurima. 36Ee'noko tenang teie teing nantoong karinga oovurira bakaang domang aa'na' piaavou' teing ereananuka ee'noko aruaru'nuka deempariri otoroko'nung-koo, teing-pina' sipisipi' tanatanungropanuka-pina' oro'pariko. 37Teketa teing bakaning barevare-nupoong aa'puriko', “Sinang tee bakei aa'na' meura'puing, teka kavu'nupoong oki'ning. 38Tee'koo kunsirariaing sinang kavu'koo Ovoringe kavu'nupoong botovuriaina' tee-koo bakaang mintoong-koo.”

will be added

X\