Matthew 4

1Teketa teie Tanuaang Meekunge tee Jiisuu' mee'bora' sirakamaa'koo be'antavuu' Sietani'ke daua'uu'naang teka. 2Teke taamanua' otou' karenaumo kivora doong ee'noko karenaumo kivora muung-koo. Ee'noko teing doong oparu'noo'ke tee peeravou'. 3Ee'noko teie daua'baukoi pora aa'puu' tee Jiisuu', “Da' Kumponing Bauring deeko' aing kapananka naueriko taamananka deempariaing.” 4Ee'noko Jiisuu'ke maku'uma aa'puu', “A, tee Daari Meekung-koo ee' daariari otong, ‘Naning taamang narunge domampari otoaung, teka ookara kara Kumponing-etaning siompui domampari otomaung.’” 5Teketa napo' Sietani'ke Jerusalema'aape, te' Meekamono-koo be'antavuu' tee Jiisuu', ee'noko a'dei' pava dootuu'nava pankava-koo miiraka-koo pante'antavura aa'puu', 6“Da' Kumponing bauring deeko' doonko to'di'daravaing, tampa' dua'darako masika'antaraavaina', ai' Daari Meekung-koo ee' daariari otong, ‘Teie bakaning koosinunanka botovuriaing da' paku-koo. Teinge biikaning birenge deto doontaavaing kapang-koo kau' naapurara'neeng-koo.’” 7Teka Jiisuu'ke maku'uma aa'puu' tee, “A, Daari Meekung-koo napo' ee' daariari otong, ‘Dii'ke tee Ovoring diikaang Kumponing parapaara-koo siperiauka'.’” 8Teketa napo' Sietani'ke Jiisuu' a'dei' iu'koo isikung-koo koing-antavura ookara muu'nanka kansi'koo tampa' oro'nanka oo-antavuu'. 9Ee'noko Sietani'ke aa'puu', “Aing ookara ninge oko-antarampeu' da' ning-koo miinge keentarara dootuu'mei dei.” 10Teketa Jiisuu'ke aa'puu' tee, “Tokoi tenkeniai da' Sietani' ning-ankoita, ai' Daari Meekung-koo ee' daariari otong, ‘Dii'ke Ovoring diikaang Kumponing narung dootuu'eriaing, ee'noko nii'nung siomperia' otoriai.’” 11Teketa tenang Sietani'ke sipura beko tee, koosinunankai porora puring-antavau'. 12Tenang batei-koo Eeroti'ke Jooni Minkinarai kiimatanava-koo dai'ura sipuu'. Ee'noko Jiisuu'ke tee taaravura tee Kaaleli'nameng-aape toroaru'. 13Teka Nasareti' sipura Kapaneume'navuntu'koo otou' te' ee'noo' te' nuaru' due' Sebulon-namuu' ee'noko Napitalai-namuu' biikanameng-koonoo'. 14Tee' biikanameng-koo beio' tee kara teie nakaronara temu'nunge Aisaia'ke minkuvuu'nung dupearu' Daari Meekung-koo aa'puu'noo'ka, 15“Teinge nantoonge mutaananoo' otoromainge pankaing araka ooaavaing teinge Sebulon ee'noko Napitalai beekanavaro-kooninge, te' ookamenta-koo otoromanoo' aa'noko pirung-aape danto ee'noko Joo'dani-nari-eta ee'daanto, te' ee'noo' Kaaleli', Ju'deeaing Biikanoo'. 16Teing ee'ning te' boo'ke anivumanameng-koo otoromaing arakai tane'puriaing.” 17Ee'noko tenang-eta deto Jiisuu'ke daankinang tutumpuu' aa'puma, “Bere'dariai paninung muu'koo tuntariaina', ai' tee muu' tee enang due' poing.” 18Ee'noko teketa Jiisuu' Kaaleli'naru'koo miiringe nanuma teie kemaintara teka oovuretu' aa'noko Saimoni' tee nii'noo'ke Piita, ee'noko tee Aanduru', baara'ma'nung, sionung dua'ureko teru'koo, ai' temainta tee tavi' baranka. 19Ee'noko Jiisuu'ke aa'puretu', “Poreta ning siomereai, nantoong baranka deeng-antarampeaina'.” 20Ee'noko namu'ke tee beekaang sionung sipureta Jiisuu' siompuretu'. 21Teketa napo' nanuma nii'namainta oovuretu' miring Jeemisi namainta Jooni, Siebedi baurinketa, bakaasi-koo beuma ninka otoroko, Siebedi ninka, biikaang sionung pate'aama. Teketa Jiisuu'ke temainta bokuvuretu'. 22Ee'noko namu'ke temaintai biikaang bakaasi ee'noko tee beuma sipureta Jiisuu' siompuretu'. 23Jiisuu'ke tee ootukunairue Kaaleli'ke nanuma nau-antavuru' nantoong pava dootuu'nanka biikaning-koo. Nau-antavurima daankivuko' tee doorenang tampara Kumponing bakaang muu'koong, ee'noko taare-antavuriko' nantoong siipa amutemurii'po'nupoong. 24Ee'noko doorenang tee-koong Siiria-namenge nanu'antavau', ee'noko teketa ookara siipa amutemurii'po'nupoong tavo'aaru' tee-anko, sisikeerai tora'antavuriko'ning, ma'narie koriaariko'ning, kookoko~po'nupoong, ee'noko dootanuka, ee'noko te' po'antavaariko taare-antavuriko'. 25Ee'noko nantoong karingai aa'ning-eta Jiisuu' siompai nanaako', Kaaleli'nupoong, Dekapolis-navete-nupoong, Jerusalema'nupoong, Judia'navete-nupoong, ee'noko ookara Joo'dani-nari-koo aveteraang-nupoong.

will be added

X\