Matthew 26

1Teketa Jiisuu'ke teing aing karananka minku bakevura bakaning barevare-nupoong aa'puru', 2“Dii'ke noru'eri otong tee Paroro Baari'koong~ makotuu'naang doong deto ke'munta otong, ee'noko ning Tee Naning-naumpo' Paning-etaing tee naninge tooka kompui taura'muaing, ee'noko aa'barata'koo bi'maara dupisi'maavaing.” 3Tenang ee'nang tee teing piristi'nuka-koo ovontung ee'noko nantoong-koo pankenanka tee piristi' pankaing bakanava-koo naro'ariru', bakaang miring tee Kaiapasi. 4Ee'noko teinge Jiisuu' aavavaara moo'aara tavaava'naang mumunsiau'. 5Ee'noko teinge aa'pau', “Na'moo paroro ninka nkoampiauka' nantoonge karingai turamaari'neenga.” 6Teketa tee Jiisuu' teke Beetani-namono-koo otoko tee Saimoni' tero oramuu'po'nung bakanava-koo kuunge. 7Ee'noko tenang teke otoko nani manikuma tee-anko pou' duuninaro' moo' pankaing-koonaro' nkavui. Ee'noko tenie pora Jiisuu'koo bore'koo dau dakovuu' teke taamang banto'domai ba'nampario'. 8Tee' nkovuio' teinge barevare-nupoonge ooaara iiravorora aa'paako', “Aung aming-koo anie tamung kera'pumaang? 9Aung duuni tee moo' pankaing-koo baavevuma mooni' nkavuma ata'oi'nuka paku-koo makosi.” 10Ee'noko Jiisuu'ke noru'ura tee kapoo' teinge minkuaako'nung aa'puru' teing, “Dii'ke aming-koo ani manikuma pore'antaverimang? Anie tee kapoo' tampara masikung ning-koo nkovuing. 11Ai' teing ata'oi'nuka teing dii' ninka doong kante nari' otorimaatoaining, teka ning tee dii' ninka baru' pankaroong o'noriauka'nung. 12Tenang anie aung duuni ning-koo mono-koo dakovuma tenie tee ning dako'maavaing-koong maamu-antamuma tee' nkovuing. 13Masika' naurampimang, are'ke tokoi tee doorenang tampara daankiaavainoo'ke ookara kansi'koo tee kapoo' ning-koo anie nkovuing tee minkuaama ani norunoru'aavaing.” 14Teketa narung teing-koo nanai'keta kenaanka-koo Judasi Kerio'nung tampaako'nung, piristi'nuka-koo pankainuka-anko beu'. 15Bera nia'urima aa'puru', “Dii'ke ning aming ameripeu' ninge tee Jiisuu' dii'anko sianko?” Tee'puio' teinge mooni'ning siliva'kooning beenaumo kivoranuri deeru-antavaara avau' tee. 16Teketa deto tee enang Judasie tooka kompui doona besi'uu' Jiisuu' teing-koo sivuainoo'. 17Doong tutuna'na'mung basiario' tee paroro Ju' biikaang berete' iisiropa-koong, bakaning barevare-nupoong Jiisuu'anko porora tee nia'aama aa'pau', “Dake are'ke nii'ke tee Taamang Baari'koong~ maamu-antavampira naiampii'naang piaromaang?” 18Jiisuu'ke aa'puru', “Jerusalema'namono-koo berira naning narung ooveriaing ninge noru'ansi o'noing. Nauerima aa'periaing, ‘Teie nau-antai aa'puing, “Nkaang batei tokompansi o'nomaung miru'nisi enang due'uing. Ee'noko ning nkaning barevare-nupoong ninka teke dakanava-koo Baari'koong Taamang naiampima norunoru'ampiaing te'mung doong.” ’” 19Teketa teing barevare-nupoong tee' Jiisuu'ke nauvuru'na' berora maamu-antavau' tee Baari'koong Taamang. 20Bera muumpuio' Jiisuu' teing ninka nanai'keta kenaanka barevare-nupoong ninka teke ba'naniau'. 21Ee'noko tenang taamanaama Jiisuu'ke aa'puru', “Ninge masika' naurampimang dii', narunge dii'koonge tee tooka kompui ning kare-nupoong-koo simuaing.” 22Teketa teinge tee' taaravaara bakei orarunsiariru', ee'noko Jiisuu' naruna' doompeitaa' nia' tutumpau' aa'paama, “Tee ee ning ee, Ovoring?” 23Jiisuu'ke maku'uma aa'puru', “Teie ee'nunge ni'ninka nari' diisi-koo toonampematomaunge ning tooka kompui taura'muaing. 24Ning Tee Naning-naumpo' Paning-etaing tee tee' Daari Meekunge minkuvuu'na' nari' nkomaravaing, teka tee naning ning tooka kompui kare-nupoong-koo simuaing tee bakei piaaru' masikung, tora'kuainung. Bakei ponto'aravaruu'nung dei tampa'ke.” 25Teketa tenang teie Judasie ee'nunge tooka kompui tee Jiisuu' kare-nupoong-koo taura'puainge aa'puu', “Tee ee ning ee, Nau-anta Pankaing?” Jiisuu'ke maku'uma aa'puu', “Ee', da' ee'nung tee.” 26Teketa tee' taamanaama Jiisuu'ke berete'nu nkavura, biraankevura, pisi'uu'. Pisi'ura bakaning barevare-nupoong avurima aa'puu', “Nkaverira naieriai, aung tee nkaang mono makosi.” 27Teketa napo' uaininareng avaako nkavura kompui tampa' tampura Kumponing-koo teing avurima aa'puru', “Aru'koo naikiriai dii' ookara. 28Aung tee nkaang ereng nerakung kara naroong-anta pinka'anta-koong makosi, mmau' nantoong biikaang orarananka tonta'anta-koo dakoaravaing. 29Enang tee ninge ee' naurampimang, enang-eta deto naikamparoo'naang uaininaru'koo bera te'mung uaini-koong urusi' nerakung dii' ninka nari' naiampiaina'munge basi Mma' bakaang muu'koo kuunge.” 30Teketa kenanavu kenavaara danto tenkenaara Olive'po'namii-aape berou' teing. 31Teketa Jiisuu'ke nauvurima aa'puru' teing, “E'mung ee'na'mung muunga dii'ke ookarai ning si'merira koo'darii'naang, ai' Daari Meekunge tee tero tee' minkuvuu'nung aa'puu'noo'ka, ‘Ninge tee sipisipi' tanatanung tavanko teing sipisipi'nanka teing avitoitoi purarenka'ariaining.’ 32Teka ning boo'keta daa'marara tee dii'koo uro'ke Kaaleli'nameng-koo meaing.” 33Piitai maku'uma aa'puu', “Ninge tee bakei da' si'dampauka'nung bane ainge nii'ninge si'daako dakaning kare-nupoong-koo avoreaama.” 34Jiisuu'ke maku'uma aa'puu', “Ninge masika' nauramaang, e'mung ee'na'mung muunga kokoree' mme' koo'kuaruko beemu'pie da' penkentaravaing ni'ninka nari' o'noremaung-koo.” 35Teka Piitai napo' aa'puu', “Ning tee da'koo penkemaravauka'nung bane da' ninka nari' moompeainge.” Napo' teing nii'ning barevare-nupoong ookara tee' nari' kareau'. 36Teketa tenang Jiisuu' teing ninka bakaning barevare-nupoong nii'noo' Ketsemani tampaako'noo' berou', ee'noko te' berora aa'puru' teing, “A' ba'nanirio' ning anka' mera kunsimaravai.” 37Teketa Piita bokuvui ee'noko Siebedi-baurinketa nari' tapotaapo' berou', ee'noko orarunsiarama domang oraka' dee'ou'. 38Ee'noko teing aa'puru', “Nkaang domang tee orarunsie bakei boo'pina' dee'antamuing. Anke otoriai ni'ninka nari' tanatarariri.” 39Teketa kato oki'noo' bera te' doonko kinkinura kansi'koo teke kunsiaru' aa'puma, “Mma' ee, makosi deeko' aung kiimata-koong kaapu baari'antameaing, teka tee nkaang pia deea', da' dakaang pia siong-koo makosi.” 40Teketa napo' te' bakaning barevare-nupoong otorou'noo' toroarara teing aasiaio' oovuru' teka. Ee'noko teketa aa'puu' tee Piita, “Dii' ee donkaang ni'ninka nari' tanatarariri tamung oki'noo' batei otoriarupeu'? 41Kunsirarima tanatarariri otoriaing parapaara-koo dua'dari'neenga, ai' domange tee piarori otoritaa' diikaang mono aruaru'dorimang.” 42Teketa napo' kemu'kana' kato bera kunsiarama aa'puu', “Mma' ee, aung kiimata ninge baari'koo makosi deeaung deeko', makosi dakaang pia siompansi tora'pampaing.” 43Ee'noko napo' pora tee' teing aasiai otoroko oovuru', duta aasi'ke tavurio'. 44Teketa napo' teka sipurira napo' beemu'pina' beu' kunsiaraa'naang tee' nari' minkuvuu'na' minkuvuma. 45Teketa napo' barevare-nupoong-anko toroarara aa'puru' teing, “Dii' ee mme' aasiri otong uaarorima? Ee aing, batei due'umaang ning Tee Naning-naumpo' Paning-etaing tooka kompui naninge simuu'naang nantoong oreng biikaang bireng-koo. 46Aia', daa'darira meriai. Ooveriko tee aung tooka kompui ning simua'naang enang pomaang.” 47Tenang ee'nang tee Jiisuu' tee' karoi otoko tee Judasi nanai'keta kenaanka-koong narung te' basiaru'. Tee ninka nari' nantoong karinga bainatu dovang-po'nupoong ee'noko ta'baka aa'ning kompai porou', piristi'nuka-koo ovontung ee'noko nantoong biikaning pankeu' urantanuka aa'ninge botoaaru'ning. 48Teie tooka kompui Jiisuu' kare-nupoong-koo sivuu'naang tee taa'ni'anta maamu-antavuu' aa'puma, “Tee naning ninge nuunuampaing tee ee'nung naning dii'ke bokotaanieriaing.” 49Jiisuu'anko namu'ke bema Judasie aa'puu', “Teie ee Nau-anta Pankaing!” Tee' minkuvuma teka nuunuvuu'. 50Ee'noko Jiisuu'ke maku'uma aa'puu', “Mmaiko', kapoo' dake nko-koo poing nkoveaing.” Teketa tenang teing nantoong uro'kanoo' koo'arira Jiisuu' bokotaaniaara dai'au' tee. 51Tee' nkoaako narunge Jiisuu' bakaning-koonge bakaang bainatu barampura piristi'koong pankaing bakaang botovotonaa' teka'puma dome' ete'uu'. 52Teketa Jiisuu'ke aa'puu' tee, “Tee dakaang bainatu te' bakanoo' napo' sipeai, ai' teing nantoong bainatue tavu' nkoaavaining teing napo' bainatue booroaining. 53Ai' dake ee noru'ea' ninge Mma'koo karonko bakei mmau' kokorei' koosinunanka aa' namu'ke bee'oaripeu' ning paku-koo? 54Teka tee' nkoansi dei tee Daari Meekung-koong kara arekee' dupearapeu', aa'pui otoing, tee' ee' nkomaamatomana' nari' nkomaavaing?” 55Ee'noko tenang Jiisuu'ke aa'puru' teing nantoong karinga, “Dii'ke ee ning tavu' nkoaama bakiaa'kamaung deemerima bainatu dovang ninka ankonu' poring ning dai'merii'naang? Doong kante tee ning oomerio' dootuu'nava pankava-koo doonanairu-koo ba'namari nau-antamaramaung, teka teke o'noko dii'ke ning dai'meriaung. 56Teka aung ee' nkoaring tee Daari Meekung-koong kara nakaro-nupoonge daariau'nung dupearaa'naang.” Teketa tenang teinge ookara bakaning barevare-nupoonge teka sipaara koo'ariru'. 57Teketa teinge tee Jiisuu' moo'au'ninge Kaiapasi-anko be'antavau' tee ee'nung piristi'nuka biikaang pankaing, te' ee'noo' teing boto naunuka ee'noko teing pankeu' urantanuka naro'ariru'noo'. 58Teka Piitai dama'ke isipo'keta kaarie sipuma bera te' piristi'nuka biikaang pankaing bakanava-koo uro'mang basiaru'. Bera te' kuung tumparara teing ninka Ju' biikaang piatooronuka~ ninka nari' ba'nanui otoko' tokoona' nkoaavaina' oovuu'naang. 59Ee'noko Piita te' ba'nanui otoko teinge piristi'nuka-koo ovontunge teing ninka ookara koompaara'navitu karananka mare'nii' besi'aako' Jiisuu' tuumpi-kooning kara daa'aara deeko' Jiisuu' dupisi'aava'naang. 60Teka teing kapoo' daa'aava' bane mmau' daang minku nkonankai teke donkonai kara mmau' minkuaako'. Asi'na'moong kenaanka naninka uro'kanoo' poreta aa'puretu', 61“Aunge tee aa'pumaung, ‘Ninge teva dootuu'nava pankava turampamira beenang doong-koo napo' kaniampeu'.’” 62Teketa tenang piristi'nuka biikaang pankainge deto donkonura Jiisuu' aa'puu', “Da' ee bari'na' oto'derua'? Sira'daravai aung-koo tuumpiramaung-koo!” 63Teka Jiisuu' tee' nari' ka'duuari otoko'. Teketa teie piristi'nuka biikaang pankainge aa'puu' tee, “Ninge tee Kumponing domantoo' bakaang miring-koo aa'damaang, naumeriai da' tee Kumponinge tero Pako'pari'nii' nii' domameri taremeriainoo'koo deeko', tee Karistoo', Kumponing Bauring.” 64Jiisuu'ke maku'uma aa'puu', “Ee', tee' ee'na' masika' minkuemaang. Ee'noko aa'dampii'naang ninge dii' ookara: Dama'ke tee ning tasi'meriaing ning tee ee'nung Tee Naning-naumpo' Paning-etaing Daari Meekunge naururimaung kamo'ke depeto pora ookara kansi' tarevumaatoainung. Ee', Kumponing bakaang iri' deto basi ninka moko oomerira tee dii'ke tenang tasi'meriaing.” 65Teketa tenang teie piristi'nuka biikaang pankainge bakaang mononopa' dere'ura aa'puu', “Aunge bakei Kumponing akapeu'umaang! Nii' nantoong aung-koo kapoo' minku-koo piamoria'. Tee tee aung enang dii'ka taaravering Kumponing akapeu'uko. 66Enang bakaang kara simpe'erima arekee' noru'erimang?” Ee'noko teinge maku'aama aa'pau', “Aung tee boo'koo makosi.” 67Teketa tenang oing-koo tutupaa'aama ki'bituau'. Ee'noko nii'ninge tanko'paako' aa'paama, 68“Da' tee Kumponinge teroita Pako'pari'nii' nantoong domamperi tareveriainoo'koo deeko' tarampeerarama~ mansi'dari naumeriai baie tarui?” 69Tuutunang~ kuunge nkoarako tee Piita tee parang-koo kuunge pava-ita dama'due ba'nanuio' nani nerai'na' botovotonaa' tee-anko pou' te'. Pora aa'puu', “Da' tee Jiisuu' ninka tee ninka Kaaleli'nung ninka nanirimaung.” 70Teka Piita penkemparu' teing-koo ookara-koo uro'kanoo'ke, aa'puma, “Ning tee kapoo' dii'ke minkuerimatomaung noru'ampa'.” 71Napo' teketa danto tuntoma-navaro-koo bera teke otoko nii'nanie napo' nerai'na'ke teka oovuu'. Oovura teing nantoong teke otoroko'ning nauvurima aa'puru', “Aung tee naning tee ninka Jiisuu' Nasareti'nung ninka nari' nanuremaung.” 72Teketa napo' penkemparu' tee Piita marakavarama; aa'puu', “Ninge tee naning noru'ampa',” 73Napo' teketa otompuaruko teinge nantoonge teke donkonai otoroko'ninge Piita-anko masipo' berora aa'pau', “Bakei masika' da' teie narung teing-koong, ai' da' tee tee' teing-pina' karema sira'daramang.” 74Teketa Piita baka barakosi'arama maraka-antavarama aa'puu', “Ninge tee naning noru'ampa'!” Teketa namu'ke kokoree' koo'kuu'. 75Teketa tenang Piitai norunoru'uu' tee kara Jiisuu'ke minkuvuu'nung, aa'puu'nung, “Da' tee kokoree' mme' koo'kuaruko beemu'pie penkentaravaing ni'ninka nari' o'noremaung-koo.” Ee'noko teketa oko siarara aa'na' orarunsiarara biromparu'.

will be added

X\