Matthew 25

1“Tenang ee'nang tee tee muu' paninung tee teing pina' nerai' nanai' oro'paravaing biikaning daamunanka kompai nampeesinung kune'koo berou'ning onkeonke'aava'naang. 2Pa'noko' teing-koo mutaanang-kooning ee'noko pa'noko' matau-po'ning. 3Teinge mutaanang-kooninge biikaang daamu nkavaama karasini nari' nkavaavaruu'. 4Ee'noko teinge matau-po'ning karasininanka nari' daamu-koo nkavai berou'. 5Teka tee nampeesinung po'koo ana'aru'. Ana'ario' teing duunkaamparira aasiau'. 6Teketa meu'namang boku karou' aa'puma, ‘Nampeesinung aung enang pomaang. Porira kune'eriai.’ 7Teketa teing nerai' tantearira biikaning daamunanka panka'pau'. 8Teketa teing mutaanang-kooninge teing matau-po'ning karasini-koo eentavaarima aa'pau', ‘Nii'ning pare'mereriai karasini-koo. Niikaning daamunanka siri'arining.’ 9Maku'aama aa'pau', ‘A, nii'koo aa' ookara-koo makotuaroo'naang. Makosi berira karasini baaveaamaing-ankoa moo'siiriaing.’ 10Teka tenang mme' nanai otoroko karasini moo'koo tee nampeesinung te' basiaru'. Ee'noko teing nerai' matau-po'ning maamuariri otoroko'ning tee ninka nari' kuung tumpariru' nampeesi-koong paroro-koo. Ee'noko beroko karanaang da'paru'. 11Napo' dama'ke teing nii'ning napo' porora aa'paako', ‘Ovoring, ovoring, daate'meriai.’ 12Teka teie maku'urima aa'puru', ‘Masika' naurampimang, ninge dii' noru'dampia'.’ 13Tee'koo tanatarariri otorimaatoai dii', ai' dii'ke tee doong ee'noko batei noru'eria' ning toromaravainoo'.” 14“Napo' tee muu' paninung aunge minkunaae paara-anta-koo makosi. Narunge naninge ovoringe isipo' nii'nameensi'koo tenkenuma bakaning botovotonaa'nuka bokuvurira mooni' tankaampuru' teinge bakaang mooni' tare-evaava'naang. 15Tutuna'nung pa'noko' kokorei'namiku avuu'. Teketa kenaanka-nung kenaanka kokorei'namiku avuu'. Teketa beenaumo-nung narung kokorei'namiku avuu'. Biikaang matau siompui tee' tankaampuru'. Teketa tenkenuu'. 16Teketa tee pa'noko' kokorei'namiku nkavuu'nung namu'ke bera teie tee mooni' mintoong-antavuu' ee'noko daua napo' pa'noko' kokorei' basi-antavuu'. 17Napo' tee kenaanka kokorei'namiku nkavuu'nung bera tee' nari' nkoaru'. Teie napo' asi'ning kenaanka kokorei'namiku basi-antavuu'. 18Teka teie naninge narung kokorei'namiku nkavuu'nunge bera kansi' nenke'ura dinkung-koo dako'uu' tee mooni' ovoring bakaang. 19Teketa pankaroompuio' tee teing biikaang ovoring toroarara baakeenevuru' teing. 20Ee'noko teie naninge pa'noko' kokorei'namiku nkavuu'nunge napo' nii'ning pa'noko' kokorei'namiku po'antavuu' nari' pora aa'puu', ‘Ovoring, dake tee ning pa'noko' kokorei'namiku ameu'. Ooveko ninge napo' nii'ning pa'noko' kokorei' basi-antavantu'nung.’ 21Bakaang ovoringe maku'uma aa'puu', ‘Bakei tampa' nkoveu'nung, da' tee botovotonaa' tampara, kake'iinung. Aing-koo oki'ning-koo tampa' kake'iiraru'nung-koo ninge tee kapoo'nanka mmau'nanka tare-koo si'dampaing. Enang pora ni'ninka nari' dotumareaing.’ 22Napo' tee kenaanka kokorei'namiku nkavuu'nung pou'. Pora aa'puu' tee ovoring, ‘Dake tee ning kenaanka kokorei'namiku ameu'. Ooveko enang tee ninge napo' asi'ning kenaanka kokorei'namiku basi-antavantu'nung.’ 23Bakaang ovoringe maku'uma aa'puu', ‘Bakei tampa' nkoveu'nung, da' tee botovotonaa' tampara, kake'iinung. Aing-koo oki'ning-koo tampa' kake'iiraru'nung-koo ninge tee kapoo'nanka mmau'nanka tare-koo si'dampaing. Enang pora ni'ninka nari' dotumareaing.’ 24Teketa napo' tee naning narung kokorei'namiku nkavuu'nung te' pou'. Pora aa'puu', ‘Ovoring ee, da' tee bakei naning ivekung noru'dansi o'nong. Dakaning botovotonaa'nuka pore'oromatoko dama' pora derararaa'naang. 25Tee'koo da' dataramparura mera tee aung dakaang mooni' baku'antu' kansi'koo kuung. Ooveko, aung tee dakaang kapoo'.’ 26Bakaang ovoringe maku'uma aa'puu', ‘Da' bakei orara botovotonaa', kakarua'. Tee' minkumeinaare ninge enang toro-antavama'naang da'koo. Masika' ee noru'mei otong ning naning ivekung? Nkaning botovotonaa'nuka pore'oromatoko dama' mera deramaramaung ee? 27Tee' noru'mei deeko' arekee'koo nkaang mooni' beeng-koo sipearuu', toromarara nkaning taakore'ning ninka nkavampeu'nung? 28Tee narung kokorei'namiku pari'erira tee naning kivora kokorei'namiku oto'evuing averiai. 29Ai' baa tee naning bereng-anta-nko dau basina' napo' avu'koong. Ee'noko tee naning bereng-anta-nko deeaung teing oto'evuining naro'ka pari'koonge. 30Enang dama'du dua'eriai aung botovotonaa' tamunsi'nung te' mutaananoo', te' ee'noo' nantoong biromparima si'da' dovang kakirinkuarimatoainoo' sisikeera-koo otoroi.’” 31“Tenang ee'nang tee ning Tee Naning-naumpo' Paning-etaing nkaang meenasi ninka moainang teing ninka nkaning koosinunanka ninka nari' ning tee tee-koo nkaang ba'nava'nani' pipi'daari-koo paning-koong-koo ba'nanampaing daurarong taa'ni'antamari. 32Ee'noko ookara kansi'koo muu'nanka amutemuu' teing ning-koo uro'kanoo' oosiariaining ee'noko teka siivenke'arampaing tee' sipisipi' tarenarai sipisipi' ee'noko mee'mee' simpe'uripeu'na'. 33Ee'noko aa'noai, sipisipi'nanka ning-koo tampavine-aape siparampai, mee'mee'nanka mare'aanavine-aape. 34Teketa tenang ninge dauraronge aa'parampaing teing tampavine-koo otoroaining, ‘Porira dii' Mma'ke biraankeruru'ning barenku konsiiriai, ai' tee muu' paninung tee dii'koo maamu-antavuu'nung kansi' tutumparu'noo'keta. 35Ai' dii'ke tee ning tenang peeramoko bau'meriko'. Ntong-koo karaa'marako kapoo' nai-koong ameriko'. Tenang damisimai deemari o'noko kuung bokumeriko'. 36Tenang duaana o'noaruko duaameriko'. Napo' siipamoko tanatameriko'. Tenang kiimatanava-koo o'noko porima beero'meriko'.’ 37“Teketa tenang teinge koonto'nukai maku'aama aa'paavai tee, ‘Ovoring, are'ka peeraroko oorampima bau'dampiko', ee'noko ntong-koo nekeru'kiko kapoo' nai-koong arompiko'? 38Napo' are'ka damisimai deentari otoko oorampima kuung bokurampiko', ee'noko are'ka duaana oto'deruaruko duaantampiko'? 39Napo' are'ka siiparoko oorampima nii'noo' kiimatanava-koo otoko beero'dampiko'?’ 40Ee'noko ninge dauraronge maku'arama aa'parampaing, ‘Masika' naurampimang dii', aming kapoo' dii'ke aing-koo mmarang-koo baru' miring otoroaing-koo nkoveru'nung tee tee ning-koo nkoveru'nung.’ 41“Napo' aa'parampaing teing mare'aanavine-koo-nupoong, ‘Dii' barakosi'nisinuka, beriai ning-ankoita tee-koo nta'koo otoi oto'koo Sietani'koo ee'noko bakaning koosinunanka-koo maamu-antanisi-koo. 42Ai' ning tee peeramoko dii'ke bau'meriaruko'. Ntong-koo nekeru'kanko kapoo' nai-koong ameriaruko'. 43Damisimai deemari o'noko kuung bokumeriaruko'. Duaana-koo ata'teenko duaanameriaruko'. Napo' siipamoko ee'noko kiimatanava-koo o'noko dii'ke tee ning taremeriaruko'.’ 44Ee'noko teinge napo' maku'aama aa'paavai, ‘Ovoring ee, arenang nii'ke da' aa'noko oorampima pakurampiaruko', peeraroko, ntong-koo nekeru'kiko, damisimai deentari otoko, duaana-koo ata'siiko, siiparoko nii'noo' kiimatanava-koo otoko?’ 45Ee'noko ninge maku'arama aa'parampai, ‘Masika' naurampimang, aming kapoo' dii'ke aing-koo mmaikori'koo baru' miring otoroaing-koo nkoveriaruu'nung tee tee ning-koo nkoveriaruu'nung.’ 46Teketa tee teing kiimatavariri doong kante tee' nari' otoroainoo' beroaing, teka teing koonto'nuka domampariri tee' nari' otoroainoo' beroaing.”

will be added

X\